«جاڭا فورماتسيانىڭ مەملەكەتتىك قىزمەتشىلەرى مەملەكەت پەن قوعام اراسىنداعى الشاقتىقتى قىسقارتۋعا ءتيىس», دەگەن بولاتىن مەملەكەت باسشىسى. وسىلاي دەي كەلىپ, پرەزيدەنت جالاقى تولەۋدىڭ جاڭا مودەلى ەنگىزىلگەننەن بەرى ورتالىق اپپاراتقا ارنالعان كونكۋرس ءبىر ورىنعا 28 ادامعا دەيىن, وڭىرلىك قۇرىلىمداردا ءبىر ورىنعا 60 ادامعا دەيىن وسكەنىن, ماڭعىستاۋ وبلىسىنىڭ اكىمدىگىندەگى 1 بوس ورىنعا 16 ادامعا دەيىن, ال ادىلەت مينيسترلىگىندە ورتا ەسەپپەن 13 ۇمىتكەر قاتىسقانىن ايتىپ وتكەن بولاتىن.
جوعارىدا اتالعانداي, ماڭعىستاۋ وبلىسىنداعى جەرگىلىكتى اتقارۋشى ورگاندارعا ەڭبەكاقى تولەۋدىڭ جاڭا جۇيەسىن ەنگىزۋدىڭ ناتيجەسى ازاماتتاردىڭ مەملەكەتتىك قىزمەتكە قىزىعۋشىلىعىن ايتارلىقتاي ارتتىرىپ وتىر. وتكەن جىلعى ەسەپتىك كەزەڭدە جەرگىلىكتى اتقارۋشى ورگاندارداعى بوس ورىندارعا جاريالانعان كونكۋرستارعا ۇمىتكەرلەر قۇجات تاپسىرماسا, اعىمداعى جىلدىڭ 9 ايىنىڭ قورىتىندىسى بويىنشا كونكۋرستاردىڭ ورتا ەسەپپەن ءاربىر بوس ورىنعا كەم دەگەندە 1 ۇمىتكەردەن قاتىسىپ وتىر.
ەسەپتىك كەزەڭدە 638 بوس جانە ۋاقىتشا بوس لاۋازىمدارعا كونكۋرس جاريالانىپ, وعان بارلىعى 771 ۇمىتكەر قاتىسقان. كونكۋرستىق ىرىكتەۋدىڭ اڭگىمەلەسۋ كەزەڭىنە بايقاۋشىلار مەن ساراپشىلاردىڭ قاتىسۋى 100% قامتاماسىز ەتىلگەن. ىشكى كونكۋرستىڭ ناتيجەسى بويىنشا تاعايىنداۋعا ۇسىنىلعان 104 ۇمىتكەردىڭ 61-ءى, ياعني, 59%-ى جوعارى لاۋازىمدارعا تاعايىندالىپتى. وتكەن جىلمەن سالىستىرمالى تۇردە قارايتىن بولساق, بۇل كورسەتكىشتەردىڭ بارلىعىندا وڭ سەرپىن بار. ناقتىراق ايتساق, جەرگىلىكتى اتقارۋشى ورگاندارداعى بوس ورىنعا ۇمىتكەرلەر كوبەيە ءتۇستى.
مىسالى, ماڭعىستاۋ وبلىسىنىڭ يندۋستريا جانە يننوۆاتسيا باسقارماسىندا جاريالانعان باس مامان لاۋازىمىنا 16 ۇمىتكەر, ماڭعىستاۋ وبلىسىنىڭ مەملەكەتتىك ساتىپ الۋ باسقارماسىندا جاريالانعان باس مامان لاۋازىمىنا 14 ۇمىتكەر, ماڭعىستاۋ وبلىسىنىڭ دەنساۋلىق ساقتاۋ باسقارماسىندا جاريالانعان باس مامان لاۋازىمىنا 8 ۇمىتكەر, ماڭعىستاۋ وبلىسىنىڭ مادەنيەت باسقارماسىندا جاريالانعان باس مامان لاۋازىمىنا 8 ۇمىتكەر, مۇنايلى اۋدانى قىزىلتوبە اۋىلدىق وكرۋگى اكىمىنىڭ اپپاراتى باس مامانىنا جاريالانعان لاۋازىمعا 5 ۇمىتكەر, اقتاۋ قالاسى اكىمىنىڭ اپپاراتىندا جاريالانعان باس مامان لاۋازىمىنا 9 ۇمىتكەر, ماڭعىستاۋ وبلىسىنىڭ ءدىن ىستەرى باسقارماسىندا جاريالانعان باس مامان لاۋازىمىنا 10 ۇمىتكەر, ماڭعىستاۋ وبلىسىنىڭ ەكونوميكا جانە بيۋدجەتتىك جوسپارلاۋ باسقارماسىندا جاريالانعان باس مامان لاۋازىمىنا 11 ۇمىتكەر قۇجات تاپسىرعان. سونداي-اق مەملەكەتتىك قىزمەتكە كەلۋ ءۇشىن تەستىلەۋگە نيەت بىلدىرگەن ازاماتتاردىڭ سانى ارتۋدا. جىل باسىنان بەرگى 9 اي قورىتىندىسى بويىنشا 4145 ازامات تەستىلەۋگە قاتىسىپ, ونىڭ 1395 تەستىلەۋدىڭ وڭ ناتيجەسىن الىپ وتىر. دەرەكتەر وتكەن جىلمەن سالىستىرعاندا, تەستىلەۋدەن وتۋگە نيەت بىلدىرگەن ۇمىتكەرلەردىڭ سانى 1,7 ەسەگە وسكەندىگىن دالەلدەيدى.
مەملەكەتتىك قىزمەتتى جانە وعان تولەنەتىن ەڭبەكاقىنى وڭتايلاندىرۋ – ۋاقىت تالابى. قوعامداعى جاڭارۋلار بۇل جۇيەدەگى تاپتاۋرىندىقتى تاستاپ, جاڭاشا فورمات ىزدەۋ قاجەتتىگىن اڭعارتقان بولاتىن. بۇل وزگەرىستەردىڭ وزەكتىلىگى ەلباسى ۇسىنعان «100 ناقتى قادام» ۇلت جوسپارىنىڭ 5 جانە 6 قادامدارىن جۇزەگە اسىرۋ بارىسىمەن ساباقتاستى. بيىل مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى, ادىلەت مينيسترلىگى, استانا قالاسى مەن ماڭعىستاۋ وبلىسى اكىمدىكتەرىنىڭ بازاسى اياسىندا اكىمشىلىك مەملەكەتتىك قىزمەتشىلەرگە فاكتورلىق-بالدىق شاكىل نەگىزىندە لاۋازىمدىق اقى مەن بونۋستار ەنگىزىلگەن قاناتقاقتى رەجىمدەگى ەڭبەكاقى تولەۋدىڭ جاڭا جۇيەسى پايدا بولدى جانە ءتيىمسىز شىعىنداردى وڭتايلاندىرۋ مەن باسشىلىق قۇرامىن قىسقارتۋ ەسەبىنەن تومەنگى جانە ورتا بۋىنداعى قىزمەتكەرلەردىڭ جالاقىسىن ارتتىرۋ باعىتىنداعى قاناتقاقتى جوبا باستالدى. ال قازاقستان ۇكىمەتىنىڭ «اكىمشىلىك مەملەكەتتىك قىزمەتشىلەردىڭ ەڭبەكاقىسىن قاناتقاقتى تارتىپتە تولەۋدىڭ كەيبىر ماسەلەلەرى جونىندە» 2017 جىلعى 29 جەلتوقساندا №939 قاۋلىسى قابىلدانىپ, اگەنتتىك توراعاسىنىڭ 2018 جىلعى 16 قاڭتارداعى №13 «مەملەكەتتىك اكىمشىلىك قىزمەتشىلەردىڭ قىزمەتىن باعالاۋدىڭ كەيبىر ماسەلەلەرى تۋرالى» جانە 2017 جىلعى 29 جەلتوقسانداعى «مەملەكەتتىك اكىمشىلىك لاۋازىمداردى دەڭگەيى مەن فۋنكتسيونالدىق توپتارعا قاناتقاقتى تارتىپتە ءبولۋدى باعالاۋ جانە ورنالاستىرۋ جونىندە ادىستەمەلىك ۇسىنىمداردى بەكىتۋ تۋرالى» بۇيرىقتارىنىڭ بەكىتىلۋى اتالعان جوبانى جۇزەگە اسىرۋعا جول اشتى.
– بۇل ەڭبەكاقى قىزمەتكەرلەردىڭ فۋنكتسيونالدىق باعىتى مەن جۇكتەلگەن مىندەتتەردىڭ كۇردەلىلىگىنە بايلانىستى, ال بونۋستار قىزمەتشىنىڭ تيىمدىلىگى مەن ناتيجەلىلىگىنە بايلانىستى تولەنەدى جانە مەملەكەتتىك ورگاننىڭ تاپسىرمالاردى ورىنداۋىنا قول جەتكىزۋگە قوسقان ۇلەسىن ەسەپكە الا وتىرىپ لاۋازىمنىڭ قۇندىلىعىن ولشەۋگە مۇمكىندىك بەرەدى. تاجىريبەدەگى بىردەي ءماندى سىياقىلاردىڭ ورنىنا ەنگىزىلەتىن بونۋستار قىزمەتشىنىڭ جۇمىس قورىتىندىسى بويىنشا ءتيىمدى قىزمەتشىلەرگە جىل سايىن تولەنەتىن بولادى, – دەيدى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتىنىڭ باسشىسى ن.جاننازاروۆا.
دەپارتامەنت باسشىسىنىڭ ايتۋىنشا, اتالعان جوبانى جۇزەگە اسىرۋ ماقساتىندا بىرقاتار شارالار ۇيىمداستىرىلعان. اتاپ ايتقاندا, تولىق جانە ناقتى تالداۋ ماقساتىندا ورتالىق مەملەكەتتىك ورگاندار مەن جەرگىلىكتى اتقارۋشى ورگانداردىڭ لاۋازىمدىق نۇسقاۋلىقتارى, ەرەجەلەرى مەن شتاتتىق كەستەلەرى زەردەلەنىپ, مەملەكەتتىك ورگاندار مەن اكىمدىكتەردىڭ پەرسونالدى باسقارۋ قىزمەتى مەن قارجى ماسەلەلەرىنە جەتەكشىلىك ەتەتىن قۇرىلىمدىق بولىمشەلەردىڭ وكىلدەرىن وقىتۋ ۇيىمداستىرىلدى. شەتەلدىك ساراپشىلارمەن بىرگە اكىمشىلىك لاۋازىمدار نەگىزگى ءۇش فاكتور بويىنشا باعالانىپ, ناتيجەسىندە بارلىق اكىمشىلىك لاۋازىمدار ءتورت فۋنكتسيونالدىق بلوك بويىنشا جۇمىستىڭ مازمۇنىنا بايلانىستى باسقارۋشى, نەگىزگى, ىقپالداستىرۋشى جانە كومەكشى پەرسونال بولىپ 15 دەڭگەيگە بولىنگەن.
ىزدەنىستەر مەن زەرتتەۋلەر ناتيجەسىندە قولدانىسقا ەنگىزىلگەن جوبا ءوز ناتيجەسىن ماڭعىستاۋ وڭىرىندە بەرە باستادى. قۇزىرلى ورىنداردىڭ مالىمەتىنە سۇيەنسەك, قاناتقاقتى جۇيە اياسىندا ورتالىق مەملەكەتتىك ورگاندار مەن اۋماقتارداعى قىزمەتشىلەر ايلىق اقىسىنداعى ايىرماشىلىق 70% -دان 10%-عا دەيىن تومەندەپ, جەرگىلىكتى دەڭگەيدەگى ەڭبەكاقى ورتاشا ەسەپپەن 2-2,5 ەسەگە وسكەن.
ماڭعىستاۋ وبلىسىنىڭ جەرگىلىكتى اتقارۋشى ورگاندارىنداعى قىزمەتشىلەردىڭ مەملەكەتتىك قىزمەتتەن ءوز ەركىمەن كەتۋى 2017 جىلمەن سالىستىرعاندا 2,5 ەسەگە ازايعاندىعى تاعى بار. مىسالى, مەملەكەتتىك ورگانداردىڭ كادر جاي-كۇيىنە جۇرگىزىلگەن مونيتورينگ قورىتىندىسى بويىنشا 2018 جىلدىڭ 1 قازانىندا قىزمەتشىلەردىڭ مەملەكەتتىك قىزمەتتەن ءوز ەركىمەن كەتۋ كورسەتكىشى – 37 بىرلىك (2,7%) بولسا, 2017 جىلدىڭ ەسەپتىك كەزەڭىندە 90 (6,7%) بىرلىكتى قۇراعان, ياعني مەملەكەتتىك قىزمەتشىلەردىڭ ەڭبەكاقى مولشەرىنىڭ ۇلعايۋى مەن ماتەريالدىق جاعدايىنىڭ جاقسارۋى اتقاراتىن قىزمەتىنە دەگەن جاۋاپكەرشىلىك پەن قىزىعۋشىلىعىن ارتتىرىپ وتىر.
جولداۋ بارىسىندا ايتىلعانداي, بەدەلدى جوعارى وقۋ ورىندارىن بىتىرگەن تۇلەكتەر مەن بىلىكتىلىگى جوعارى كادرلاردىڭ جەكە سەكتوردان كەلۋى ماڭعىستاۋ وبلىسىندا الدەقايدا جوعارى كورسەتكىشكە يە جانە بىلتىرمەن سالىستىرعاندا 7 ەسەگە ارتقان. مىسالى, 2018 جىلدىڭ 1 قازانىنداعى جاعداي بويىنشا جەرگىلىكتى اتقارۋشى ورگاندارداعى كونكۋرستارعا قاتىسۋعا جەكە سەكتوردان قىزىعۋشىلىق بىلدىرۋشىلەر سانى 44 ۇمىتكەر بولسا, وتكەن جىلى جەكە سەكتوردان مەملەكەتتىك قىزمەتكە قىزىعۋشىلىق بىلدىرگەن ۇمىتكەرلەر سانى 6-نى قۇراعان. سونىمەن بىرگە پرەزيدەنت جانىنداعى مەملەكەتتىك باسقارۋ اكادەمياسىن اياقتاعان 3 مەملەكەتتىك قىزمەتشى وڭىرگە قايتا كەلىپ, قىزمەتتەرىن جالعاستىرۋدا, ال وتكەن جىلى مۇنداي جاعداي بولماعان ەكەن.
جوبانى تابىستى ىسكە اسىرۋ بۇل تاجىريبەنى بولاشاقتا رەسپۋبليكا كولەمىندە قولدانۋعا مۇمكىندىك بەرمەك.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
