ەلباسى نۇرسۇلتان نازارباەۆتىڭ قازاقستان حالقىنا ارناعان جولداۋىنىڭ باستى ەرەكشەلىگى ارينە ونىڭ الەۋمەتتىك تۇرعىدان از قامتىلعان, ءالسىز قامتىلعان قالىڭ حالىق قامىنا باعىشتالۋى بولدى. بۇگىندە ۇلكەن قالادا نەمەرەلەرىمىزدى جەتەكتەپ بالاباقشاعا بارامىز, مەكتەپكە بارامىز, اۋرۋحاناعا بارامىز. سوندا الدىمىزدان ادام ايتسا نانعىسىز ايلىق الاتىن جاس ۇستازدار شىعادى, تاربيەشىلەر, مەدبيكەلەر شىعادى. ءبىز ىڭعايسىز كۇيگە تۇسەمىز. ماردىمسىز ايلىق الاتىن ادامنان قالاي ماردىمدى جەمىستى جۇمىس تالاپ ەتۋگە بولادى؟! جولداۋ وسى كەمشىلىكتىڭ ورنىن تولتىرۋعا باعىتتالعان. راسىندا بالاباقشا, مەكتەپ ءبىزدىڭ بولاشاعىمىزدى تەربەتكەن تال بەسىك ەمەس پە؟ ودان نەگە قارجى اياۋعا ءتيىسپىز؟! نەمەسە ءوز دەنساۋلىعىمىزدان ءوزىمىز نەگە قارجى اياۋعا ءتيىسپىز؟ جولداۋ وسىناۋ الەۋمەتتىك تۇرعىدان ءالسىز قامتىلعان كوپشىلىكتىڭ ەڭ تومەنگى جالاقىسىن 1,5 ەسەگە كوتەردى. جانە الداعى جىلدى «جاستار جىلى» دەپ جاريالادى. الماتىدا تۇرامىز. سوڭعى شيرەك عاسىردا جاستار اۋىلدان الماتىعا شۇبىردى. قايدا قاراساڭ دا مىقشىڭداپ قالانىڭ قارا جۇمىسىن ىستەپ جاتقان جاستاردى كورەمىز. ءبارى كەشەگى اۋىل جاستارى. كوبى ۇيلەنبەگەن. ۇيلەنۋ ءۇشىن ءۇي كەرەك. ءۇي الۋعا قالتا جۇقا. مىنەكي, بۇگىندە جۇزدەگەن مىڭ جاستاردىڭ باسىندا بار وسىناۋ پروبلەمالاردى شاپشاڭ شەشۋدىڭ جولدارىن نۇسقاپ وتىر جاڭا جولداۋ.
الداعى «جاستار جىلىندا» سول پاتەردەن پاتەرگە كوشىپ جۇرگەن جۇزدەگەن مىڭ جاستاردىڭ باسپانا ماسەلەسىن شەشۋدىڭ جولدارىن كورسەتتى. جۇزدەگەن ميلليارد قارجى ءبولىندى. جۇرتقا ۇناعانى سول, ەلباسى جەرگىلىكتى اكىمدەرگە قاتتى ايتتى. قاداپ ايتتى. «قولىڭا قاراجات بەرىلدى. سونى ۇنەمدەپ جۇمسا! شاشپاي-توكپەي حالىقتىڭ قامىنا جۇمسا! قالاي دا حالىقتىڭ الەۋمەتتىك ماسەلەسىن شەش» دەدى. مەكتەپ مۇعالىمدەرىنىڭ مارتەبەسىن كوتەرەتىن زاڭ قابىلداۋ قاجەتتىگىن ايتتى نۇرسۇلتان ءابىش ۇلى. بۇل ءتىپتى جۇرت كۇتپەگەن جاڭالىق بولدى. ەلىمىزدە سوڭعى ەلۋ جىلدا ۇستاز بەدەلى ءتۇسىپ كەتكەنى راس. جالاقىسى از بولعاننان كەيىن مەكتەپكە ەر ادامدار بارۋدى قويدى. مەكتەپتەردە ەر ۇستازداردىڭ جوق بولۋى ۇل بالالار تاربيەسىنە كەرى اسەر ەتتى. مەكتەپ مۇعالىمدەرىن ساباقتان تىس جينالىستارعا قۋالاي بەرۋ ادەتكە اينالدى. دەمەك, جاڭا زاڭ بۇدان بىلاي مۇعالىم مارتەبەسىن كوتەرەدى دەپ ۇمىتتەنەمىز. جولداۋدىڭ ءون بويىنان وسىنداي قالىڭ حالىق قامىنا ارنالعان قامقورلىق رۋحى ەسىپ تۇردى. لايىم وسى قامقورلىق حالىق يگىلىگىنە اينالعاي!
سماعۇل ەلۋباي,
جازۋشى
