بيىل وبلىستا قوعامدىق ىندەتكە قاتىستى 83 وقيعا تىركەلسە, 68-ءى تىكەلەي جەمقورلىققا قاتىستى ورىن العان. وتكەن جىلعا قاراعاندا زاڭدى بەلدەن باسۋ مىسالدارىنىڭ ەكى ەسەگە جۋىق كوبەيگەنى بايقالادى. قازىنا قاراجاتىن جىمقىرۋ, قىزمەت بابىن اسىرا پايدالانۋ,الاياقتىق ءجيى كەزدەسەدى. پاراقورلىقتىڭ 30 فاكتىسى اشكەرەلەنىپ, بىرقاتار لاۋازىمدى تۇلعالار جاۋاپكەرشىلىككە تارتىلعان. باسقا ايماقتارمەن سالىستىرعاندا جەمقورلىق دەڭگەيى تومەن, بىراق ارقانى كەڭگە سالۋعا بولمايدى. ويتكەنى, ءتارتىپ, باقىلاۋ بوساڭسىعان جەردە نەبىر كەلەڭسىزدىكتەردىڭ جەگى قۇرتتاي قاپتاپ كەتەتىنىن كۇندەلىكتى ءومىر كورسەتىپ ءجۇر.
وڭىرلىك كوممۋنيكاتسيالار قىزمەتى مەكەمەسىندە وتكەن بريفينگتە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى قوعاممەن بايلانىس دەپارتامەنتىنىڭ ديرەكتورى ارمان بەردالين جەرگىلىكتى جەردە 900-دەي مەملەكەتتىك قىزمەتشىنىڭ وقىتىلىپ, 300-گە جۋىعىنىڭ قايتا دايارلاۋدان ءوتىپ, 600-دەن استامىنىڭ بىلىكتىلىگىن ارتتىرۋ تاجىريبەسىن قولداپ, جولداۋدان تۋىندايتىن مىندەتتەرگە جان-جاقتى توقتالدى. ەلباسى ساپا–مەملەكەتتىك قىزمەتشى ءومىرىنىڭ جاڭا ءستيلى, ال ءوزىن-ءوزى جەتىلدىرۋ –ونىڭ باستى قاعيداتى بولۋ تالابىن قويدى. ەڭبەكاقى تولەۋدىڭ جاڭا مودەلىنە كوشۋگە بايلانىستى قاناتقاقتى جوبالاردىڭ ەنگىزىلۋى مەملەكەتتىك قىزمەتكە قىزىعۋشىلىقتىڭ ارتقانىن, كادرلاردىڭ تۇراقتانعانىن بايقاتادى. جالاقى كوبەيۋمەن قاتار جۇمىستى ءتيىمدى ءۇيىمداستىرۋدىڭ تىڭ تاسىلدەرى ورنىعا باستادى. دەسەك تە جەمقورلىق ماسەلەسىنىڭ وڭىرلىك دەڭگەيدە وزەكتىلىگى ءالى دە جوعارى. 8 ايدا ەلىمىزدە 511 تەكسەرىس جۇرگىزىلگەن, 100 مىڭنان استام زاڭ بۇزۋشىلىق انىقتالعان. وتكەن جىلعا قاراعاندا بۇل كورسەتكىش ەكى ەسەدەي كەمىگەنىن. جىل باسىنان بەرى 1577 «بارماق باستى, كوز قىستى» تەرىس ارەكەت تىركەلىپ, 19 رەسپۋبليكالىق, 63 وبلىستىق, 115 اۋداندىق دەڭگەيدەگى باسشىلار جازالانعان.
وبلىستىق مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنىڭ باسشىسى ەلەنا ستەپانەنكو ادەپ كەڭەسى وتىرىستارىندا مەملەكەتتىك قىزمەتتىڭ بەدەلىن ءتۇسىرىپ, قاراپايىم تالاپتاردى ساقتاماعان 32 باسشى مەن ماماننىڭ ماسەلەسى تالقىلانىپ, تارتىپكە شاقىرىلعانىن جەتكىزدى. فيليال ديرەكتورى لاۋرا قايىرجانوۆا مەملەكەتتىك قىزمەتشىلەردى قاشىقتىقتىقتان وقىتۋ, اعىلشىن ءتىلىن ۇيرەتۋ سياقتى جاڭالىقتارمەن ءبولىستى.
مونيتورينگتىك توپ مۇشەلەرى ەسىل اۋدانىندا بولىپ, وسكەلەڭ ۇرپاقتىڭ ءبىلىم الۋ ۇدەرىستەرىمەن, مەكتەپتەردىڭ ماتەريالدىق-تەحنيكالىق جابدىقتالۋ جايىمەن تانىستى. ولاردى الەۋمەتتىك ماڭىزى بار ورتالىق اۋرۋحانانىڭ جىلارمان كەيپى بەي-جاي قالدىرمادى. ءتورت جىل بۇرىن عانا قولدانىسقا بەرىلگەن عيماراتتىڭ قۇرىلىسىنا ەل قازىناسىنان باقانداي ءبىر ميلليراد تەڭگە جۇمسالدى دەگەنگە سەنۋ قيىن. ساپاسىز سالىنعانى كوزگە بادىرايىپ تۇر. ماسەلەنىڭ انىق-قانىعىنا جەتۋ ءۇشىن ەمحاناعا قاتىستى ءىستى ۇلتتىق بيۋروعا جولداۋعا شەشىم الىندى. اۋداندا حالىققا كورسەتىلەتىن كەي قىزمەت تۇرلەرىنىڭ كوڭىل كونشىتپەيتىنى, ينتەرنەت جۇمىس ىستەگەنىمەن,ەلەكتروندىق قىزمەت كورسەتۋ جۇيەسى قاناعاتتاندىرمايتىنى اتاپ كورسەتىلىپ, ولقىلىقتاردان قورىتىندى شىعارۋ ءتيىستى ورىندارعا جۇكتەلدى. مونيتورينگتىك توپتىڭ مۇشەسى الدان مانكەەۆ تاپسىرىلعان ىسكە ءجۇردىم-باردىم قارايتىن, كوميسسيا كەلەردە عانا قيمىلداي باستايتىن مەملەكەتتىك قىزمەتشىلەردى سىن تەزىنە الدى. ا. بەرداليننىڭ ايتۋىنا قاراعاندا, ەلىمىزدە 741 مەملەكەتتىك قىزمەت ءتۇرى بولسا, 60 پروتسەنتى ەلەكتروندىق ۇلگىدە ۇسىنىلادى. ونى جۇرتشىلىق بىلە بەرمەگەندىكتەن, ء الى كۇنگە دەيىن اۋدان ورتالىقتارىنا سابىلىپ ءجۇر.
شالعايداعى ءۋاليحانوۆ اۋدانىنا ات ءىزىن سالعان رەسپۋبليكالىق ارنايى مونيتورينگتىك توپ مۇشەلەرى ازاماتتاردى قابىلداپ, ولاردى تولعانتقان ماسەلەلەر بويىنشا جان-جاقتى تۇسىنىك بەردى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى
