«تاۋەلسىز قازاقستاننىڭ سپورت تاريحىندا ەسكەك ەسۋدەن تاريحي جەڭىس ورىن الىپ وتىر. نەبارى 16 جاسىڭىزدا جاسوسپىرىمدەر وليمپيادا ويىندارىندا التىن مەدال الدىڭىز. ءسىزدىڭ سپورتتىق مانسابىڭىزدا بۇل العاشقى جارقىن جەڭىس. مەن سىزدەن وليمپيادا ويىندارىندا تاعى دا جارقىن جەڭىستەر كۇتەمىن.
بۇل جەڭىسىڭىز ءسىزدىڭ ەرىك-جىگەرىڭىزدىڭ مىقتىلىعىن, كاسىبي دايارلىعىڭىزدىڭ جوعارى ەكەندىگىن دالەلدەدى. بۇكىل الەم حالقىنىڭ الدىندا قازاق ەلىنىڭ ءانۇرانىن كوكتە شارىقتاتۋ ارقىلى, سوڭىڭىزدان ەرىپ كەلە جاتقان سپورتشىلاردىڭ جۇرەگىنە جەڭىسكە دەگەن سەنىم ۇيالاتتىڭىز. سىزدەي قازاقتىڭ دارا ۇلدارى باردا, ەل سپورتى قارىشتاپ داميتىنىنا سەنىمدىمىن.
سىزگە زور دەنساۋلىق, وتباسىڭىزعا اماندىق, بولاشاقتا ۇلكەن جەڭىستەر تىلەيمىن»- دەلىنگەن قۇتتىقتاۋ حاتىندا.
ەستەرىڭىزگە سالايىق, دياس باحراددين 1:54:66 كورسەتكىشىمەن, وزبەك سپورتشىسىنان باسىم ءتۇسىپ, ءبىرىنشى ورىن العان بولاتىن. بۇعان دەيىن ەسكەك ەسۋشى ستەللا سۋحانوۆا قولا مەدال العان بولاتىن.
بۇگىندە ۇلتتىق قۇراما قورجىنىندا ءتورت مەدال. دزيۋدوشى بەكارىس سادۋاقاس التىن مەدال, مارگاريتا گريتسەنكو كۇمىس مەدال العان بولاتىن.
ايتا كەتەيىك, III جازعى جاسوسپىرىمدەر وليمپيادا ويىندارى بۋەنوس –ايرەس قالاسىندا قازاننىڭ 6 - 18 ارالىعىندا ءوتىپ جاتىر. ەل نامىسىن 22 سپورت ءتۇرى بويىنشا 57 سپورتشى قورعاۋدا.
