ەلباسىنىڭ بۇل جولداۋى ەلىمىزدىڭ الەۋمەتتىك-ەكونوميكالىق دامۋ ماسەلەلەرىنە ارنالدى. جولداۋدا حالىقتىڭ ءال-اۋقاتىن ارتتىرۋ, كاسىپكەرلىكتى دامىتۋ, الەۋمەتتىك سالانى قولداۋ ماسەلەلەرىنە باسا نازار اۋدارىلدى. ەلباسى, اسىرەسە, ەكونوميكانىڭ نەگىزگى قوزعاۋشى كۇشى سانالاتىن شاعىن جانە ورتا بيزنەستىڭ بۇگىنگى دامۋىنا توقتالىپ, ونى ارى قاراي جانداندىرۋدىڭ نەگىزى جولدارىن ايقىندادى. مەملەكەت باسشىسى «بيزنەستىڭ جول كارتاسى» باعدارلاماسىن 2025 جىلعا دەيىن ۇزارتۋدى ۇسىندى.
«بيزنەستىڭ جول كارتاسى» باعدارلاماسى 2010 جىلدان بەرى جۇزەگە اسىپ كەلەدى. مەنىڭ وڭىرلەرگە بارعان ءىسساپارلارىمدا وسى باعدارلامانىڭ ءتيىمدى جۇرگىزىلىپ جاتقانىنا كوزىم جەتتى. سوندىقتان ونى 2025 جىلعا دەيىن سوزۋ قاجەت. وعان جىل سايىن مەملەكەتتەن قوسىمشا 30 ميلليارد تەڭگە ءبولىنۋى ءتيىس»,- دەدى نۇرسۇلتان نازارباەۆ. ونىڭ ايتۋىنشا, بۇل باعدارلاما ءۇش جىل ىشىندە 22 مىڭ جۇمىس ورنىن قۇرىپ, بيۋدجەتكە سالىق ەسەبىنەن 224 ملن تەڭگە پايدا اكەلمەك, سونىمەن قاتار 3 ترلن تەڭگەنىڭ ءونىمىن وندىرۋگە مۇمكىندىك بەرەدى.
سونداي-اق, پرەزيدەنت 2019 جىلدىڭ 1 قاڭتارىنان باستاپ, شاعىن جانە ورتا بيزنەسكە سالىقتىق امنيستيا جاريالاۋدى ۇسىندى. ەگەر كاسىپكەر نەگىزى سالىقتى تولەيتىن بولسا, وعان بۇعان دەيىنگى سالىنعان ايىپپۇلدارى مەن ۇستەماقىلار جويىلاتىن بولادى.
پرەزيدەنت بۇگىنگى جولداۋدا وتاندىق تاۋار وندىرۋشىلەردىڭ ءونىمىن قولداۋعا شاقىردى.
«ەكسپورتقا باعىتتالعان يندۋستريالاندىرۋ – ەكونوميكالىق ساياساتتىڭ العىشارتى بولۋى ءتيىس. ۇكىمەت ەكسپورتپەن اينالىساتىن تاۋاروندىرۋشىلەرگە نازارىن اۋدارۋ قاجەت. بۇل ەڭ الدىمەن , وڭدەۋشى ونەركاسىپكە قاتىستى بولۋ كەرەك», - دەدى ەلباسى ن.ءا. نازارباەۆ.
وسى ماقساتتا ول بارلىق قازاقستاندىقتاردى وتاندىق ءونىمدى قولدانۋعا شاقىردى. بۇگىنگى جولداۋدا مەملەكەت باسشىسى حالىقتىڭ دەنساۋلىعى مەن ءال-اۋقاتىن ارتتىرۋعا باسىمدىق بەرۋدى تالاپ ەتتى. بۇل ءۇشىن ءجىو 10% ءبىلىم, عىلىم, مەديتسينانى دامىتۋعا جۇمسالاتىن بولدى. سونداي-اق, پرەزيدەنت كەلەسى جىلى مۇعالىمنىڭ مارتەبەسى تۋرالى زاڭ قابىلداۋدى تاپسىردى. سونىمەن قاتار, ول حالىقتىڭ دەنساۋلىعىن جاقسارتۋ ماقساتىندا تاۋارلار مەن قىزمەت كورسەتۋدى قاداعالايتىن ارنايى كوميتەت قۇرۋدى ۇسىندى جانە اگرارلىق سەكتوردىڭ دامۋىنا باسا نازار اۋدارۋ كەرەكتىگىنە توقتالدى.
ەل پرەزيدەنتىنىڭ قازاقستان حالقىنا جولداۋىن تىڭداۋعا قاتىسقان كاسىپكەرلەر ءوز پىكىرلەرىمەن ءبولىستى:
«بۇگىنگى جولداۋدا ءبىراز تۇيتكىلدى ماسەلەلەر كوتەرىلدى دەپ ويلايمىن. ءبىز مەديتسينا سالاسىنىڭ جۇگىن كوتەرىپ جۇرگەن بيزنەس وكىلدەرى رەتىندە بارلىق مەملەكەتتىك قولداۋلارعا قاتىسامىز. سوندىقتان, مەملەكەت باسشىسىنىڭ كاسىپكەرلەرگە جانە الەۋمەتتىك سالا قىزمەتكەرلەرىنە نازار اۋدارۋى ءبىز ءۇشىن قۋانارلىق جايت. ەندى وسى ايتىلعان ماسەلەلەردى بەلسەندى جۇزەگە اسىرۋىمىز كەرەك»,-دەيدى «سەمەينىي ۆراچ ي كو» كلينيكاسىنىڭ باسشىسى ليۋدميلا پوكوتيلو.
«ەلباسىنىڭ تاربيەنى بالا-باقشالار مەن وقۋ ورىندارىنان باستاۋ كەرەك دەگەن ويى ۇنادى. شىنىندا دا ادامنىڭ ادام بولىپ قالىپتاسۋى بالالىقتان باستاۋ الادى ەمەس پە؟ جان-جاقتى دامىعان تۇلعانى قالىپتاستىرۋ ءۇشىن مۇعالىمدەر مەن تاربيەلەۋشىلەرگە قولداۋ كورسەتۋ كەرەك. اسىرەسە, جەكە بالا-باقشالارعا كوڭىل ءبولۋ قاجەت. بۇل جەردە ءبىز مەملەكەتتىك تاپسىرىستار مەن گرانت, سۋبسيديا ءبولۋ تۋرالى ايتىپ تۇرمىز. ءبىز بۇل ماسەلەنى ءاردايىم كوتەرىپ كەلەمىز»,-دەيدى اقتوبە وبلىسىنىڭ «اتامەكەن» كاسىپكەرلەر پالاتاسى ىسكەر ايەلدەر كەڭەسىنىڭ ءتورايىمى جانار ەلەۋسىزوۆا.
«بيزنەستىڭ جول كارتاسى باعدارلاماسىن 2025 جىلعا دەيىن ۇزارتۋ وتە دۇرىس شەشىم دەپ ەسەپتەيمىن. ويتكەنى جەكەلەگەن كاسىپكەرلەردىڭ, اسىرەسە, اۋىلدىق شارۋالاردىڭ بيزنەسى ءۇشىن بانكتەر نەسيە بەرە بەرمەيدى. بۇل رەتتە مەملەكەتتىڭ قولداۋىمەن جەڭىلدەتىلگەن نەسيە الۋ شارۋالارعا ايتارلىقتاي كومەك بولىپ تۇر. ال سالىق امنيستياسى تۋرالى ايتاتىن بولساق, ايىپپۇلدى تولەي الاماعان بيزنەس سۋبەكتىلەرىنىڭ جۇمىسى توقتاپ قالعان جاعدايلار كەزدەسەدى. وسى جولداۋ ارقىلى ولاردىڭ قايتا جاندانۋىنا مۇمكىندىك بەرىلمەك. سونىمەن قاتار, ەل پرەزيدەنتىنىڭ تاۋارلارىن ەكسپورتقا شىعاراتىن كاسىپكەرلەر تۋرالى ساۋالىنا ساپالى, باسەكەگە قابىلەتتى تاۋاروندىرۋشىلەردىڭ ءبىزدىڭ وڭىرىمىزدە كوپتەپ سانالاتىنىن ايتىپ وتسەم دەيمىن. ساپانى قاداعالاۋ ءىسى, اسىرەسە قۇرىلىس سالاسىنا قاجەت-اق. وسى ماسەلەلەرگە وراي, جولداۋ كاسىپكەرلەردىڭ كوكەيىندەگىسىن ءدوپ باستى دەۋگە ابدەن بولادى»,-دەيدى «اقتوبە وبلىسى «اتامەكەن» كاسىپكەرلەر پالاتاسىنىڭ كاسىپكەرلەردى قورعاۋ جانە اكىمشىلىك كەدەرگىلەردى ازايتۋ ءبولىمىنىڭ باسشىسى نۇرلان ماحامبەتوۆ.
كاسىپكەرلەر پالاتاسى بۇگىنگى جولداۋدا ايتىلعان ماسەلەلەردى ءبىراۋىزدان ماقۇلداپ, ءوز قىزمەتتەرىنىڭ بارلىق باعىتىندا پايدالاناتىن بولدى.
تەمىر قۇسايىن,
«ەگەمەن قازاقستان»
