مەملەكەتتىك دەنساۋلىق ساقتاۋ ۇيىمدارىنا كورپوراتيۆتىك باسقارۋدى ەنگىزۋدى كوزدەيتىن بۇيرىق بويىنشا وبلىستاردىڭ جانە استانا, الماتى, شىمكەنت قالالارىنىڭ دەنساۋلىق ساقتاۋ باسقارمالارى جانىنان 1 قاراشادان باستاپ بيزنەس كەڭەستەر قۇرىلماق. ماماندار بۇل ۇيىمنىڭ مەديتسيناداعى سالالىق ماسەلەلەردى شەشۋدە ماڭىزى زور ەكەنىن ايتادى.
«وڭىرلەردەگى تەگىن مەديتسينالىق كومەك الۋ, الەۋمەتتىك مەديتسينالىق ساقتاندىرۋ, تەگىن مەديتسينالىق كومەك شەڭبەرىندەگى ءدارى-دارمەكتەرمەن قامتاماسىز ەتۋ بويىنشا تۋىندايتىن ۇسىنىس-پىكىرلەر مەن ماسەلەلەر وسى بيزنەس كەڭەستەرىنىڭ وتىرىستارىندا قارالادى. بۇعان دەيىن مينيسترلىك جانىنان قۇرىلعان بيزنەس كەڭەس قۇرامىنا ۇكىمەتتىك ەمەس ۇيىمداردىڭ مۇشەلەرى قاتىسا وتىرىپ, مەديتسينا سالاسىنداعى كەيبىر ماسەلەلەردىڭ كۇرمەۋىن شەشكەن بولاتىن. سول تاجىريبە ارى قاراي وڭىرلەردە جالعاسپاق», دەدى دسم «دەنساۋلىق ساقتاۋدى دامىتۋ رەسپۋبليكالىق ورتالىعى» شجق رمك مەنەدجمەنت ورتالىعى كورپوراتيۆتىق باسقارۋ ءبولىمنىڭ باسشىسى ميرات جۇماكارىموۆ.
ميرات ابدىكارىم ۇلىنىڭ ايتۋىنشا بيزنەس كەڭەس قۇرىلعان سوڭ ەرەجە بەكىتىلىپ, جوسپار جاسالادى. جوسپارعا دەنساۋلىق ساقتاۋ سالاسى بويىنشا ءار سالا وكىلدەرىنەن كەلىپ تۇسكەن ءوڭىردىڭ اسا ماڭىزدى ماسەلەلەرى قامتىلادى.
سونداي-اق وسى بۇيرىققا سايكەس مينيستر ە.ءبىرتانوۆ مەملەكەتتىك دەنساۋلىق ساقتاۋ ۇيىمدارىندا قۇرىلعان بايقاۋ كەڭەستەرىنىڭ قۇرامىنداعى مۇشەلەردىڭ كەمىندە 30%-ءى ۇكىمەتتىك ەمەس ۇيىمداردىڭ, بيزنەس سالاسىنىڭ جانە بۇقارالىق اقپارات قۇرالدارىنىڭ وكىلدەرى بولۋى كەرەكتىگىن بەلگىلەدى.
«ەلىمىز دامىعان 30 ەلدىڭ قاتارىنا كىرۋ ءۇشىن ەكونوميكالىق ىنتىماقتاستىق جانە دامۋ ۇيىمىنىڭ (ەىدۇ) ساناتتارى مەن قاعيداتتارىن ەنگىزۋدە. وعان كورپوراتيۆتىك باسقارۋ دا جاتادى. ونىڭ باستى قاعيداتتارىنىڭ ءبىرى – اشىقتىق. بايقاۋ كەڭەسى قۇرامىنىڭ 30 پروتسەنتىن ۇكىمەتتىك ەمەس ۇيىمداردان, بيزنەس جانە باق وكىلدەرىنەن ەتىپ بەلگىلەۋ ارقىلى بايقاۋ كەڭەسى جۇمىسىن حالىققا اشىق, قوعامعا بەلگىلى ەتىپ كورسەتۋگە مۇمكىندىك الامىز. سونىمەن قاتار كاسىپورىندار ءوز ۇلەسىنىڭ قانداي ەكەنىن باعالاي الادى. وسىلايشا كەڭەس قۇرامىندا باسقا دا سالانىڭ ماماندارى بولعان سوڭ وندا پاراقورلىق, وزدەرىنىڭ ويىن تىقپالاۋ سياقتى كەلەڭسىزدىكتەر بولمايدى. مىسالى, بريتانيا ۇلتتىق دەنساۋلىق ساقتاۋ جۇيەسى مەملەكەتتىك كلينيكالارىنىڭ كورپوراتيۆتىك باسقارۋ ينستيتۋتتارى ەىدۇ-نىڭ باسقارۋشى قاعيداتتارىنا سايكەس قۇرىلىمدالعان جانە سول بويىنشا جۇمىس ىستەيدى», دەيدى ميرات جۇماكارىموۆ.
بيزنەس كەڭەسى مەن بايقاۋ كەڭەسىنىڭ ايىرماشىلىعىنا توقتالعان رەسمي وكىل الدىڭعىسى وڭىرلىك دەڭگەيدەگى ماسەلەنىڭ دۇرىس شەشىلۋىنە سەپتىگىن تيگىزسە, ەكىنشىسى كاسىپورىننىڭ ستراتەگيالىق دامۋىنا جول اشاتىنىن ايتادى. «استانا قالاسىندا بايقاۋ كەڭەسى ەنگىزىلگەن 29 مەديتسينالىق ۇيىم بار ەكەن. ولاردىڭ بارلىعىنا باسقا سالا ماماندارىن تارتۋ كوزدەلىپ وتىر», دەيدى ول.
ايتا كەتەيىك, بۇل بۇيرىق پرەزيدەنت نۇرسۇلتان نازارباەۆتىڭ 2015 جىلعى 20 مامىرداعى «ۇلت جوسپارى – 100 ناقتى قادام» اتتى باعدارلاماسىنىڭ 81-قادامىنا, دەنساۋلىق ساقتاۋ سالاسىن دامىتۋدىڭ 2016-2019 جىلدارعا ارنالعان «دەنساۋلىق» مەملەكەتتىك باعدارلاماسىنا سايكەس قابىلدانىپ وتىر.
مايگۇل سۇلتان,
«ەگەمەن قازاقستان»
