شىنىندا دا, حالقىنىڭ قاجىر-قاۋقارى, جاستارىنىڭ جالىن-كۇشى كەم بولسا, ياعني ەلدىڭ ادامي تۇرعىداعى دەنساۋلىق ماسەلەسى اقساپ تۇرسا, تابىس پەن تۇرماستىڭ ساپاسى قايتىپ ارتپاق؟ يگىلىكتەردى ىسكە اسىراتىن الدىمەن ادام ەمەس پە؟! مىنە, وسى تۇرعىدان كەلگەندە, قازاقستاندىقتاردىڭ ءال-اۋقاتىنىڭ ءوسۋى – دەنى ساۋ ۇلتتىڭ, اياق-قولى بالعاداي العاداي جاستاردىڭ قولىندا.
ۇزاق جىلداردان بەرى قازاق كۇرەس ونەرىنىڭ وركەن جايۋىنا قىزمەت ەتىپ كەلە جاتقان, جارتى عاسىرلىق عۇمىرىن جاتتىقتىرۋشىلىققا سارپ ەتكەن ادام رەتىندە ايتارىم: ءبىزدىڭ ەلىمىزدە دەنە شىنىقتىرۋ مەن سپورت ارقىلى حالىقتىڭ دەنساۋلىعىن تۇزەگەندە عانا, قازاقستان بارلىق سالادا بيىك بەلەستەردى باعىندىرادى دەگەنگە نىق سەنەمىن. ەلباسى وسى جولعى جولداۋىندا: «ۇكىمەتكە جانە اكىمدەرگە كەم دەگەندە 100 دەنە شىنىقتىرۋ-ساۋىقتىرۋ كەشەنىن سالۋدى تاپسىرامىن. سونداي-اق, قولدانىستاعى, اسىرەسە مەكتەپتەردەگى سپورت عيماراتتارىن ءتيىمدى پايدالانىپ, دەنە شىنىقتىرۋمەن اينالىسۋ ءۇشىن اۋلالاردى, پاركتەردى, ساياباقتاردى جابدىقتاۋ قاجەت», دەپ ناقتى تاپسىرمالار بەردى.
البەتتە, قازىرگى تاڭدا ەلىمىزدىڭ ءىرى قالالارىندا, اۋدان ورتالىقتارىندا دەنە شىنىقتىرۋ-ساۋىقتىرۋ كەشەندەرىن سالۋدا ايتارلىقتاي ارتىقشىلىقتار بار. سۇرانىس – جوعارى, قارجىلىق مۇمكىندىك – مول. ال اۋىلدا شە؟ وكىنىشكە قاراي, ءدال قازىرگى ۋاقىتتا اۋىلدىق جەرلەردىڭ ەڭ قۇرىعاندا قاراپايىم سپورت زالىنا دەگەن مۇقتاجدىعى زور. الەمدىك دەڭگەيدەگى جارىستاردا ەلىمىزدىڭ جاقسى اتىن شىعارىپ جۇرگەن ساڭلاقتاردىڭ دەنى اۋىلدان شىعاتىنىن ەسكە الساق, مۇنى سپورتىمىزدىڭ تامىرىنا بالتا شابار, وتە وتكىر تۇرعان ماسەلە دەپ ايتپاسقا لاج جوق.
ياعني, تۇپتەپ كەلگەندە, ەلباسى ايتقان دەنە-شىنىقتىرۋ-ساۋىقتىرۋ كەشەندەرىنىڭ ەڭ قۇرىعاندا كىشى مودەلدەرىن اۋىلدىق جەرلەردە كوپتەپ سالۋعا ەرەكشە نازار اۋدارعان ءجون دەپ ويلايمىن.
جاسىراتىنى جوق, بۇگىنگى كۇندە جاتتىقتىرۋشىلاردىڭ الاتىن جالاقىسى دا ماردىمسىز. اۋىلدىق جەردە سپورتپەن اينالىسۋعا جاعداي جاسالماسا, بالا باۋلىعان باپكەردىڭ ەڭبەكاقىسى تىم از بولسا, ول جاققا كىم بارعانداي؟ اۋىلدا قاراپايىم سپورت سارايى بولماسا, باپكەر بارماسا, قانشاما بالانىڭ تالانتى توپشىسىنان قيىلادى دەسەڭىزشى... وسى ورايدا ەلباسىنىڭ ورتاشا جالاقىنى ءوسىرۋ جونىندەگى تاپسىرماسى نىساناعا ءدوپ تيگەندەي. مۇنىڭ شاراپاتىن باپكەرلەر, سپورت ماماندارى دا كورسە, نۇر ۇستىنە نۇر بولار ەدى.
سونىمەن قاتار, بيىلعى جولداۋدا ۇستازدار مارتەبەسىنىڭ مەرەيىن ۇستەم ەتەر, قۇقىعىن قىزعىشتاي قورعار العىشارتتارعا باسا ءمان بەرىلۋىن ءوز باسىم قازاقستاننىڭ ەڭبەك سىڭىرگەن مۇعالىمى رەتىندە قۋانا قابىلدادىم. نەگە دەسەڭىز, ۇرپاق تاربيەسىمەن اينالىسقان ادامعا قاتىستى قوعامنىڭ, مەملەكەتتىڭ كوزقاراسى وزگەرمەيىنشە, «ماڭگىلىك ەل» يدەياسىن جۇزەگە اسىراتىن جاس بۋىنعا دەگەن زارۋلىك كۇننەن كۇنگە ارتا بەرمەك.
ديقانباي بيتكوزوۆ,
كسرو جانە قازاقستاننىڭ ەڭبەك سىڭىرگەن جاتتىقتىرۋشىسى,
قازاقستان رەسپۋبليكاسىنىڭ ەڭبەك سىڭىرگەن مۇعالىمى
قاراعاندى
