ءماجىلىس توراعاسىنىڭ پىكىرىنشە, جولداۋ ەڭ الدىمەن حالىقتىڭ ءال-اۋقاتىن ارتتىرۋعا باعىتتالعان.
«الداعى ون جىلعا ارنالعان الەۋمەتتىك, ەكونوميكالىق جانە ايماقتىق دامۋ سالالارىنداعى ءىس-قيمىل جوسپارلارى بىرىكتىرىلگەن بۇل جولداۋ ماقساتتار مەن مىندەتتەردىڭ اۋقىمى جاعىنان تەڭدەسسىز ستراتەگيالىق قۇجات», دەدى پالاتا سپيكەرى.
سوندىقتان جولداۋدا ايتىلعان بارلىق باعدارلار دەپۋتاتتىق كورپۋستىڭ زاڭ شىعارۋ جۇمىسىنىڭ باسىم باعىتى بولماق.
سونىمەن قاتار, بيۋرو وتىرىسىندا پالاتانىڭ الداعى جالپى وتىرىسىنىڭ كۇن تارتىبىنە ەنگىزىلەتىن ماسەلەلەر قاتارى تالقىلاندى.
كۇن ءتارتىبىنىڭ جوباسىندا سالالىق كوميتەتتەرگە قورىتىندى ازىرلەۋ مەرزىمىن انىقتاۋ ءۇشىن جاڭا زاڭ جوبالارىن جۇمىسقا الۋ كوزدەلەدى.
ولاردىڭ قاتارىندا «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى ماسەلەلەرى بويىنشا وزگەرىستەر ەنگىزۋ تۋرالى» كونستيتۋتسيالىق زاڭ جوباسى جانە دەنە شىنىقتىرۋ مەن سپورت ماسەلەلەرىنە قاتىستى زاڭ جوباسى بار.
بۇدان باسقا, بيۋرو وتىرىسىندا ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ كوشپەلى وتىرىسىن وتكىزۋ تۋرالى ماسەلە قارالدى.
