اتالعان پالاتا كوميتەتىنىڭ توراعاسى جەڭىس نۇرعاليەۆتىڭ توراعالىعىمەن وبلىس ورتالىعىندا كوميتەتتىڭ «جەر جانە جەر قويناۋىن پايدالانۋ تۋرالى» كودەكستى ىسكە اسىرۋ ماسەلەلەرى بويىنشا كوشپەلى وتىرىسى بولدى. كوميتەت توراعاسى ج.نۇرعاليەۆ اقتوبە وبلىسى جەر قويناۋىن پايدالانۋ بويىنشا جوعارعى دەڭگەيدەگى ءىرى ايماقتاردىڭ ءبىرى ەكەنىن ايتا كەلىپ, كوميتەت وتىرىسىن ءوندىرىستى ايماقتا وتكىزۋدىڭ ماڭىزىنا توقتالدى.
اقتوبە وبلىسىنىڭ اكىمى بەردىبەك ساپارباەۆ پايدالى قازبالاردى ءوندىرۋشى كومپانيالاردىڭ اقتوبە وبلىسىنىڭ ەكونوميكاسىنا قوسقان ۇلەسى تۋرالى سەناتورلاردى حاباردار ەتتى. وبلىستا وسى كودەكستى ىسكە اسىرۋ جانە جەر قويناۋىن پايدالانۋشىلار بارلىق كەلىسىمشارت مىندەتتەمەلەرىن ورىنداۋدى قامتاماسىز ەتۋ بويىنشا بەلسەندى جۇمىس جۇرگىزىلىپ كەلەدى. سونداي-اق وبلىس باسشىسى ايماقتىڭ الەۋمەتتىك-ەكونوميكالىق دامۋىنىڭ كورسەتكىشتەرى تۋرالى اڭگىمەلەدى.
پارلامەنت سەناتىنىڭ دەپۋتاتى مۇحتار جۇماعازيەۆ «جەر قويناۋىن پايدالانۋ قىزمەتىن ىنتالاندىرۋدىڭ قۇقىقتىق تەتىكتەرى» تۋرالى بايانداما جاسادى. باياندامادا جەر قويناۋىن پايدالانۋ ماسەلەلەرى جونىندەگى زاڭنامانىڭ نەگىزگى ماسەلەلەرى قامتىلدى. دەپۋتات 2017 جىلعى 27 جەلتوقسانداعى «جەر جانە جەر قويناۋىن پايدالانۋ تۋرالى» كودەكستىڭ تۇجىرىمداماسىنا جانە وسى ماسەلە بويىنشا زاڭناماعا ەنگىزىلگەن نەگىزگى قۇقىقتىق جاڭالىقتارعا كەڭىنەن توقتالدى. سونداي-اق كودەكستى جانە ىلەسپە زاڭدى ىسكە اسىرۋ بويىنشا الداعى قابىلداناتىن شارالار تۋرالى ايتىلدى.
ەنەرگەتيكا ءمينيسترىنىڭ ورىنباسارى ماحامبەت دوسمۇحامبەتوۆ, ينۆەستيتسيالار جانە دامۋ مينيسترلىگىنىڭ جەر قويناۋىن پايدالانۋ دەپارتامەنتىنىڭ ديرەكتورى رۋسلان بايميشەۆ تاقىرىپ بويىنشا باعىنىشتى مەكەمەلەردىڭ قاعيدالارى تۋرالى باياندادى.
پارلامەنتشىلەر وبلىس ورتالىعىندا اۋىلشارۋاشىلىق ونىمدەرىن وندىرۋشىلەرمەن دە كەزدەسىپ, ايماقتىڭ اگرارلىق سالاسىنىڭ جەتىستىكتەرىمەن جان-جاقتى تانىستى.
پارلامەنت سەناتىنىڭ دەپۋتاتى دۇيسەنعازى مۋسين كەزدەسۋدە بايانداما جاساپ, پرەزيدەنت نۇرسۇلتان ءابىش ۇلى نازارباەۆ التىنشى شاقىرىلىمداعى پارلامەنتتىڭ ءتورتىنشى سەسسياسىنىڭ اشىلۋىنداعى سويلەگەن سوزىندە ساقتاندىرۋ, اگرارلىق مىندەتتەمە, نەسيەلىك سەرىكتەستىكتەردى دامىتۋ, سونداي-اق ۆەتەريناريالىق باقىلاۋ جۇيەسىن جەتىلدىرۋ ماسەلەلەرى بويىنشا اگروونەركاسىپ سالاسىنداعى زاڭنامانى ودان ءارى جەتىلدىرۋ مىندەتىن العا قويعانىن اتاپ ءوتتى.
بۇدان سوڭ دەپۋتاتتار العا اۋدانىنداعى «امك» ەت كومبيناتى, «اكتەپ» مال شارۋاشىلىعى كەشەنى مەن «پاريجسكايا كوممۋنا-ءححى» سەرىكتەستىكتەرىنىڭ جۇمىسىمەن تانىستى. سونداي-اق اقتوبەدەگى «ايبەك» اكك جانە «گرينحاۋس كازاحستان» جىلىجاي كەشەنىندە بولدى. قارعالى اۋدانىنداعى «ارداعىم» مەكەمەسىندە دەپۋتاتتارعا جەرگىلىكتى توعان شارۋاشىلىعىندا ۋىلدىرىق وندىرۋدە زاماناۋي تەحنولوگيالاردىڭ پايدالانىلۋى كورسەتىلدى.
تەمىر قۇسايىن,
«ەگەمەن قازاقستان»
اقتوبە وبلىسى
