اقتاۋلىق فۋتبولشىلار ستاديون جارامسىزدىعىنان 3 ماۋسىم بويى شىمكەنت ستاديوندارىنىڭ ءبىرىن ءوز الاڭىنا اينالدىرىپ كەلدى. باستى سەبەپ «جاس قانات» ستاديونىنىڭ قفف-نىڭ تالابىنان وتپەۋى. سەبەبى مۇنداعى 5 جىلعا جارامدى جاساندى الاڭ 12 جىل بويى اۋىسپادى جانە الاڭ ولشەمى دە تالاپقا ساي كەلمەدى. 12 جىل بويى اۋىستىرىلماعان جاسىل الاڭ بيىل تولىقتاي جاڭاردى. ۋەفا تالاپتارىنا ساي جاساقتالعان ستاديوننىڭ الاڭىمەن قوسا, قاقپالار, تابلو مەن ورىندىقتار دا جاڭارعان.
جاڭارعان ستاديونداعى العاشقى ويىن قازاقستان ءبىرىنشى ليگاسىنىڭ 28-ءشى تۋرى اياسىندا «كاسپي» مەن الماتىلىق «قايرات ا» اراسىندا ءوتتى. جەرگىلىكتى ويىنشىلارعا قولداۋ بىلدىرۋگە وبلىس باسشىسى ەرالى توعجانوۆ تا كەلدى. ءۇش جىلدىق ۇزىلىستەن كەيىن ءوز ستاديوندارىنا ورالعان ويىنشىلاردىڭ قادامىنا ساتتىلىك تىلەپ, فۋتبول جانكۇيەرلەرىن مەرەكەمەن قۇتتىقتادى.
سونداي-اق ستاديوندى قالپىنا كەلتىرۋگە دەمەۋشىلك ەتكەن كاسپكەرلەرگە دە العىس ايتىپ, ارنايى ديپلوم تاپسىردى. ال «كاسپي» كلۋبىنا جانكۇيەرلەر اتىنان اۆتوبۋس كىلتىن تابىستادى.
