ال رۋحاني جاڭعىرۋ تۋعان جەردىڭ تاريحىن, مادەني تابىستارىن, داستۇرلەرىن بىلمەي ىسكە اسپايدى. مىنە, وسى باعىتتا مۋزەيلەردىڭ الاتىن ورنى زور. ولار تۋعان ەل مەن حالقىمىزدىڭ ازاماتتىق قالىپتاسۋى مەن پاتريوتتىق سەزىمىنىڭ جاندانۋىنا اسا قۋاتتى فاكتور رەتىندە قىزمەت ەتە الادى.
بۇگىنگى تاڭدا مۋزەي قورلارى مەن ساقتاۋ ورىندارىنىڭ ماتەريالدىق-تەحنيكالىق قامسىزداندىرىلۋ ماسەلەلەرى كۇردەلى پروبلەماعا اينالىپ وتىر. ەلىمىزدەگى بارلىق مۋزەيلەردىڭ ەكسپوناتتارى 3 ملن بىرلىككە تەڭ دەسەك, سونىڭ 70 پروتسەنتىنىڭ ساقتالۋ ورىندارى مەن ارناۋلى عىلىمي-وندىرىستىك زەرتحانالارىنىڭ, رەستاۆراتسيا جاسايتىن شەبەرحانالارىنىڭ جاعدايى وتە ناشار جاعدايدا. قازىر مۋزەيلەرگە رەستاۆراتسيالار جاساۋ, كوللەكتسيالاردى كونسەرۆاتسيالاۋ عانا ەمەس, ەكسپوزيتسيالىق دالىزدەر مەن ساقتاۋ ورىندارىن ءتيىستى رەجىمدەرگە كەلتىرۋ ءۇشىن زاماناۋي تەحنولوگيالار, ارناۋلى عىلىمي-زەرتتەۋ زەرتحانالارى كەرەك. بۇل جۇمىس مۋزەيلەر جۇمىسىنىڭ بارلىق باعىتتاعى تيىمدىلىكتەرىن ارتتىرار ەدى.
وتاندىق مۋزەيلەردىڭ تاعى ءبىر ۇلكەن پروبلەماسى – كاسىبي مامانداردىڭ ازدىعى. كوبىنىڭ دايىندىعى تومەن ەكەنى كوزگە ۇرادى. سوندىقتان ەلىمىزدىڭ جەتەكشى جوو-لارىندا ارناۋلى, جوعارى بىلىكتى مۋزەي قىزمەتكەرلەرىن دايىندايتىن فاكۋلتەتتەر اشۋ كەرەك. سونداي-اق مۋزەي قىزمەتكەرلەرىنىڭ بىلىكتىلىگىن ارتتىرۋ ءۇشىن ءبىلىم جەتىلدىرەتىن ورتالىقتار اشىپ, ولاردىڭ جۇمىسىن جوعارى دەڭگەيگە كوتەرۋ قاجەتتىگى كەزەك كۇتتىرمەيتىن ماسەلە ەكەنى داۋسىز. قىزمەتكەرلەردىڭ شەتەلدەرگە شىعىپ, ترەنينگتەر الۋىن دا قاراستىرعان ءجون. سوڭعى جىلدارى بۇل جۇمىستار بىزدە مۇلدە اتقارىلمايتىن بولدى.
مۋزەي قورلارىنىڭ عىلىمي تۇرعىدان جاراقتاندىرىلۋى دالا ەكسپەديتسيالارىنىڭ جۇمىسى (ارحەولوگيالىق, ەتنوگرافيالىق, ارحەوگرافيالىق ت.ب.) ارقىلى جانە تۇرعىنداردان مۋزەيلىك قۇندىلىعى بار زاتتاردى مەملەكەتتىك ساتىپ الۋ جولىمەن جينالادى. وكىنىشكە قاراي مەملەكەت تاراپىنان قارجىلاندىرۋ بولماعاندىقتان وسى جۇمىستار قازىر جۇرگىزىلمەي قالدى.
ۇكىمەتتىڭ 2007 جىلى قابىلداعان №1400 قاۋلىسىنىڭ №8 قوسىمشاسىنا سايكەس مۋزەيلەر قىزمەتىنىڭ دەنساۋلىققا زياندىلىعىنا بايلانىستى ونىڭ باسشىلارى مەن قىزمەتكەرلەرىنە ايلىق ەڭبەكاقىعا قوسا 30 پايىز ۇستەمەاقى تولەۋگە رۇقسات ەتىلگەن. الايدا ۇستەمەاقى الاتىندار تىزىمىنە وندىرىستە جۇمىس ىستەيتىندەر عانا كىرگىزىلىپ, مۋزەي قىزمەتكەرلەرى ەنگىزىلمەگەن. ولاردىڭ قىزمەتىندە سانيتارلىق-گيگيەنالىق تالاپتاردى بۇزاتىن زياندى ارەكەتتەر بار ەكەندىگى ەسكەرىلمەگەن. مىسالى, انتروپولوگيالىق جانە ەتنوگرافيالىق ەسكى كىتاپتار, گەرباريلەر, اڭدار مەن قۇستاردىڭ ەسكىرگەن مۇسىندەرى جانە ت.ب. ۇستاۋ, تازالاۋ دەنساۋلىققا زياندى ەكەنى بەلگىلى. وسى ماسەلە ءالى كۇنگە شەشىمىن تاپپاي كەلەدى.
ءبىز وسى ماسەلەلەردى مادەنيەت جانە سپورت ءمينيسترى ا.مۇحامەدي ۇلىنىڭ قۇزىرىنا جەتكىزىپ, ولاردى شەشۋگە ىقپال ەتۋدى سۇرادىق.
سەرىك قۇسايىنوۆ,
ءماجىلىس دەپۋتاتى
