بۇل زاڭ جوباسى دەنساۋلىق ساقتاۋ سالاسىنا مەملەكەت باسشىسى مەن ۇكىمەت قويعان باسىم مىندەتتەردى ورىنداۋ ماقساتىندا ازىرلەنگەنى ايتىلدى. مينيستر تەگىن مەديتسينالىق كومەكتىڭ كەپىلدەندىرىلگەن كولەمى (تمككك) مەن مىندەتتى الەۋمەتتىك مەديتسينالىق ساقتاندىرۋدىڭ ء(مامس) جاڭا مودەلى ددۇ-نىڭ حالىقتى دەنساۋلىق ساقتاۋ قىزمەتتەرىمەن جاپپاي قامتۋ جونىندەگى پرينتسيپتەرىنە سايكەس ەكەندىگىن اتاپ ءوتتى. ماسەلەن, تمككك شەڭبەرىندە امبۋلاتوريالىق-ەمحانالىق قىزمەت كورسەتۋ مەن ستاتسيونارلىق كومەكتى قوسا العاندا, مەديتسينالىق كومەك بارلىق ازاماتتارعا, ورالماندارعا جانە قازاقستاندا تۇراقتى تۇرىپ جاتقان شەتەلدىكتەر مەن ازاماتتىعى جوق ادامدارعا كورسەتىلەدى. ءمامس جۇيەسىندەگى مەديتسينالىق كومەك تمككك تىس مەديتسينالىق قىزمەتتەردى قامتيدى. سونىمەن بىرگە ءمامس كولەمى تمككك پاكەتىمەن سالىستىرعاندا 42,4 مىڭ تەڭگەگە ارتىق بولادى. بۇل حالىقتىڭ ءمامس جۇيەسىنە قاتىسۋىن ايتارلىقتاي ىنتالاندىرماق.
«دەنساۋلىق ساقتاۋ سالاسىنداعى ءتيىمدى باسقارۋ مەن باسەكەلەستىكتى دامىتۋدى قامتاماسىز ەتۋ ماقساتىندا زاڭ جوباسىندا: 1) شارۋاشىلىق جۇرگىزۋ قۇقىعىنداعى مەملەكەتتىك كاسىپورىندارداعى قاداعالاۋ كەڭەستەرىنىڭ وكىلەتتىگىن كەڭەيتۋ; 2) شارۋاشىلىق جۇرگىزۋ قۇقىعىنداعى مەملەكەتتىك كاسىپورىنداردا القالىق اتقارۋشى ورگاندار ەنگىزۋ; 3) شارۋاشىلىق جۇرگىزۋ قۇقىعىنداعى مەملەكەتتىك كاسىپورىنداردا ىشكى اۋديت قىزمەتىن ەنگىزۋ كوزدەلەدى», – دەدى مينيستر. سونىمەن قاتار زاڭ جوباسىندا دسم-گە دەنساۋلىق ساقتاۋ ينفراقۇرىلىمىن دامىتۋدىڭ بىرىڭعاي پەرسپەكتيۆالىق جوسپارىن قالىپتاستىرۋ قاعيدالارىن ازىرلەۋ جانە بەكىتۋ بويىنشا جانە جاو-عا دسم-ءنىڭ كەلىسىمى بويىنشا دەنساۋلىق ساقتاۋ ينفراقۇرىلىمىن دامىتۋدىڭ پەرسپەكتيۆالىق جوسپارلارىن بەكىتۋ بويىنشا وكىلەتتىكتەر بەرۋدىڭ كوزدەلەتىنى اتالدى. وسى نورمالاردى ىسكە اسىرۋ ناتيجەسىندە: 1) مەملەكەتتىك ينۆەستيتسيالاردى جوسپارلاۋدى وڭتايلاندىرۋ; 2) اۋرۋحانا ۇيىمدارىنىڭ شىعىندارىن وڭتايلاندىرۋ; 3) مەديتسينالىق كومەكتى ينتەگراتسيالاۋ; 3) جەكە بيزنەس ءۇشىن ينفراقۇرىلىمدى دامىتۋعا قاتىسۋدىڭ تارتىمدىلىعىن ارتتىرۋ كۇتىلەدى. وسىلايشا, ءمامس ەنگىزۋ جاعدايىندا مەديتسينالىق كومەك كورسەتۋ ساپاسى, دەنساۋلىق ساقتاۋ جۇيەسىنىڭ ەكونوميكالىق تيىمدىلىگى مەن باسەكەگە قابىلەتتىگى ارتادى. «مەديتسينالىق ءبىلىم مەن عىلىم جۇيەسىن جەتىلدىرۋ ماقساتىندا, سونداي-اق «دەنساۋلىق» مەملەكەتتىك باعدارلاماسىندا كوزدەلگەن مىندەتتەردى شەشۋ ءۇشىن زاڭ جوباسىندا مەديتسينالىق ءبىلىم مەن عىلىم سالاسىنداعى ستراتەگيالىق ارىپتەستىك ينستيتۋتى ەنگىزىلەدى; مەديتسيناداعى عىلىمي قىزمەت جەتىلدىرىلەدى; دەنساۋلىق ساقتاۋ سالاسىنداعى ءبىلىم مەن عىلىم ۇيىمدارىنىڭ عىلىمي-پەداگوگيكالىق كادرلارىنىڭ قۇزىرەتىن باعالاۋ جۇيەسى ەنگىزىلەدى, سونداي-اق نازارباەۆ ۋنيۆەرسيتەتكە ۇقساس ينتەگراتسيالاعان اكادەميالىق مەديتسينالىق ورتالىقتار مەن ۋنيۆەرسيتەتتىك كلينيكالار قۇرۋ مەحانيزمى ارقىلى عىلىم, پراكتيكا مەن ءبىلىمنىڭ ۇشتۇعىرلىعى ءۇشىن جاعداي جاساۋ كوزدەلەدى», – دەلىندى باياندامادا. ءوزىنىڭ ءسوزىن تۇيىندەي كەلە ەلجان ءبىرتانوۆ وسى زاڭ جوباسى دونور ينستيتۋتىن جانە تۋبەركۋلەزبەن اۋىراتىندارعا مەديتسينالىق كومەك كورسەتۋدى, ءمامس-ءتى ودان ءارى جەتىلدىرۋدى; دەنساۋلىق ساقتاۋدىڭ ۇلتتىق شوتتارىن ەنگىزۋدى جانە ت.ب. قامتىپ, قولدانىستاعى زاڭناماداعى دەنساۋلىق ساقتاۋ جۇيەسى ماسەلەلەرى بويىنشا ولقىلىقتاردى تۇزەتۋگە باعىتتالاتىنىن ايتتى.
دەپۋتاتتار گ.يحسانوۆا, ك.مۇسىرمان, ت.سىزدىقوۆ جانە ت.ب. مينيسترگە سۇراق قويىپ, زاڭ جوباسىندا قامتىلعان ماسەلەلەردى انىقتادى. سونىڭ ىشىندە اۋىلدىق, اۋداندىق جەرلەردەگى مەديتسينا ۇيىمدارىن كادرلارمەن جابدىقتاۋ ماسەلەسى كوپ سۇرالدى. مينيستر بۇل ماسەلەنىڭ زاڭ جوباسىندا قامتىلىپ, مەديتسينالىق ۋنيۆەرسيتەتتى بىتىرگەن جاستاردىڭ ءۇش جىلعا جىبەرگەن ورىندارعا بارىپ, پراكتيكالىق جۇمىستار جاسايتىنى تۋرالى زاڭ جوباسىندا ارنايى باپ قاراستىرىلعانىن جەتكىزدى.
جاقسىباي سامرات,
«ەگەمەن قازاقستان»
