ەلوردانىڭ كەزەكتى ءبىر كەشىن ناعىز كينو اتموسفەراسىنا بولەگەن ايتۋلى شاراعا فيلم رەجيسسەرى بولات قالىمبەتوۆ, تۋىندى اۆتورى جۇسىپبەك قورعاسبەك, باستى رولدەگى اكتەرلەر – اسان ءماجيت, ەرىك جولجاقسىنوۆ, شىنار جانىسبەكوۆا, ەرجان نۇرىمبەت جانە دۋلات يسابەكوۆ, يسرايىل ساپارباي باستاعان ادەبيەت پەن ونەر الەمىنىڭ كورنەكتى تۇلعالارى قاتىستى.
«تالان» – بولات قالىمبەتوۆتىڭ «سارداردان» كەيىنگى 13 جىلدىق ۇزىلىستەن سوڭ جارىققا شىققان جاڭا تۋىندىسى. جازۋشى جۇسىپبەك قورعاسبەكتىڭ «قاسقىر-ادام» پوۆەسىنىڭ جەلىسى بويىنشا تۇسىرىلگەن رەجيسسەردىڭ كورەرمەنىن ۇزاق كۇتتىرگەن بۇل فيلمىندە جيىرماسىنشى عاسىردىڭ 30-40-شى جىلدارداعى ەل تاريحىندا ورىن العان وقيعالار قاراپايىم ادامداردىڭ ءومىرى ارقىلى باياندالادى.
– كەزىندە بولات ەكەۋمىز ءفيلمنىڭ اتاۋىن ۇزاق ويلاندىق. سودان تاعدىردىڭ ءبىر تەرەڭ تامىرىن ىزدەدىك تە, تالاندى تاۋىپ, جاڭا تۋىندىنى وسىلاي اتادىق. جالپى, بۇل – بولاتتىڭ كينوسى عوي. بىراق مەن بۇگىنگى تۋىندى تۋرالى «اياعانعا ارنالعان كينو» دەگەن ماقالا جازعىم كەلەدى. كىتاپتان شىعارمامدى كورىپ, ءفيلمنىڭ العاشقى جوباسىن ويلاعان اياعان ءشاجىمباي دەگەن دوسىم بولاتىن. مەنىڭ پوۆەسىم بويىنشا تۇسىرىلگەن وزدەرىڭىز جاقسى بىلەتىن «جانسەبىل» ءفيلمىنىڭ رەجيسسەرى. «قاسقىر-ادام» اياعاننىڭ ونەرگە اينالدىرسام دەگەن ەكىنشى كوركەم كينوسى بولاتىن. بىراق ۇلگەرمەدى. ەندى, مىنە ارادا كوپ جىل وتكەننەن كەيىن بولات سونى جاڭاشا ءتىرىلتتى. ءوزىنىڭ قولتاڭباسى كورىنىپ تۇر. مۇلدەم باسقا, جاڭا كينو جاسادى. قازىر «كود» دەگەن ءسوز سانگە اينالىپ كەتتى عوي. مەن سول كودتى شىعارماشىلىق ادام رەتىندە رەجيسسەر جۇمىسىنان كوردىم. كورەرمەنىن تاريح تەرەڭىنە بويلاتىپ, ويلانتاتىن ادام, ادامنىڭ تاعدىرى جايلى جاقسى ءبىر فيلم ومىرگە كەلدى عوي دەپ ويلايمىن, – دەدى تۋىندى اۆتورى, جازۋشى جۇسىپبەك قورعاسبەك كورسەتىلىمنەن كەيىنگى اسەرىمەن ءبولىسىپ.
«تالان» ءفيلمىنىڭ الەمدىك تۇساۋكەسەرى يراننىڭ تەگەران قالاسىندا ۇيىمداستىرىلعان 36-شى حالىقارالىق فادجر كينوفەستيۆالىنىڭ «شىعىس پانوراماسى» كونكۋرستىق باعدارلاماسى شەڭبەرىندە وتكەن بولاتىن. سونىمەن قاتار اتالعان تۋىندى جاقىندا عانا استانادا وتكەن XIV حالىقارالىق «ەۋرازيا» كينوفەستيۆالىنىڭ «ەۋرازيا» جۇرەگىنەن» باعدارلاماسىندا كورسەتىلدى.
– «تالان» ءسوزى – تاعدىر دەگەندى بىلدىرەدى. سوندىقتان دا بۇل فيلمدە مەن سول زامانداعى ادامنىڭ بەينەسىن جانە ەل باسىنا تونگەن ناۋبەت ارقىلى حالىقتىڭ تاعدىرىن كورسەتكىم كەلدى, – دەيدى كارتينانىڭ رەجيسسەرى بولات قالىمبەتوۆ.
ەستەرىڭىزگە سالا كەتەيىك, ادام تاعدىرى ءسوز بولاتىن «تالان» كوركەم ءفيلمى 2018 جىلدىڭ 20 قىركۇيەگىنەن باستاپ جالپىحالىقتىق پروكاتقا شىقتى.
نازەركە جۇماباي,
«ەگەمەن قازاقستان»
