جوبا مەملەكەت باسشىسىنىڭ تاپسىرماسى شەڭبەرىندە ىسكە اسىپ جاتقان, ۇشتىلدىلىكتى ەنگىزۋ جونىندەگى اۋقىمدى باعدارلامانى قولداۋ باعىتىندا دايىندالدى. باستى ماقسات – وقۋشىلاردىڭ اعىلشىن ءتىلىن مەڭگەرۋ دەڭگەيىن ارتتىرۋعا جانە قارىم-قاتىناس ماشىعىن جاقسارتۋعا كومەكتەسۋ.
«English for Jastar» قاناتقاقتى رەجىمدە 2 اي بويى جۇرگىزىلەدى.
اعىلشىن ءتىلىن وقۋدى, ءتىلدىڭ قولدانۋشىلارى مەن «جاس وتان» جاستار قاناتى ارنايى ىرىكتەگەن وتاندىق ماماندار ۇيرەتەدى. رەسپۋبليكامىزدا ۇشتىلدىلىكتى دامىتۋعا نيەت بىلدىرگەن ەرىكتىلەردىڭ سانى 141 ادام بولدى. ولاردىڭ 75-ءى جوعارى وقۋ ورنىندا ءبىلىم الىپ جاتقان ستۋدەنتتەر.
سولاردىڭ ءبىرى – اباي مىرزاحمەتوۆ اتىنداعى كوكشەتاۋ ۋنيۆەرسيتەتىنىڭ 4-كۋرس ستۋدەنتى ميراس وزبەكوۆ. ول ءتىلدى ۇيرەتۋ جۇمىسىن «زەلەنىي بور» اۋىلىندا جۇزەگە اسىرماق.
– مەنىڭ ماقساتىم – اۋىلدىق مەكتەپتەردەگى بالالاردى اعىلشىن تىلىنە وقىتۋ. سونىمەن بىرگە مەن ءوزىمنىڭ ءبىلىم دەڭگەيىمدى ارتتىرا ءتۇسۋدى دە جالعاستىرامىن. بۇل مەن ءۇشىن ءتيىمدى تاجىريبە بولاتىن شىعار دەگەن ويدامىن, – دەيدى ول.
اعىلشىن ءتىلىن وقىتۋ بويىنشا فاكۋلتاتيۆتىك كۋرستار تاعى ءبىر پارتيالىق جوبا شەڭبەرىندە بارلىق ەلىمىز بويىنشا اشىلعان, 20 كوۆوركينگ-ورتالىقتا, سونىمەن بىرگە قازاقستاننىڭ 64 مەكتەبىندە ۇيىمداستىرىلدى.
– فاكۋلتاتيۆتەردە وقۋشىلار مەكتەپكە قاراعاندا اناعۇرلىم تەرەڭ ءبىلىم الاتىن بولادى. سونىمەن بىرگە تاياۋ ۋاقىتتا بالالاردىڭ شەت ەلدەن كەلگەن ءتىل قولدانۋشىلارىمەن ارالاسۋعا مۇمكىندىگى بولادى, – دەپ اتاپ ءوتتى پارتيا حاتشىسى تامارا دۇيسەنوۆا.
«English for Jastar» جوباسى جۇزەگە اسىپ جاتقان بارلىق اۋداندارعا قاجەتتى وقۋ قۇرالدارى جەتكىزىلدى. وسىعان وراي 172 Elementary مەن Pre-Intermediate وكسفوردتىق قۇرال جيىنتىعى ءبولىندى. ءار جيىنتىقتا وقۋشىلارعا ارنالعان Student`s Book, تاپسىرمانى جاساۋعا ارنالعان Workbook, سونىمەن بىرگە اعىلشىن تىلىندەگى فيلمدەردىڭ DVD-ديسكىلەرى بار.
