باسقوسۋدىڭ ماڭىزى تۋرالى بارشا قاۋىمدى حاباردار ەتكەن باسىلىم باسشىسى دارحان قىدىرالى بايىرعى قالامگەردىڭ نەگىزگى ەرەكشەلىگى – اعامىزدىڭ كىندىگى ارقاشان ەل گازەتى «ەگەمەنگە» بايلاۋلى, كەلەر جىلى 100 جىلدىق مەرەيتويى اتاپ وتكىزىلگەلى وتىرعان باس باسىلىم تاريحىنداعى ەلەۋلى تۇلعالاردىڭ ءبىرى دەگەندى ىزگى ءىلتيپاتىن جەتكىزە وتىرىپ, اقپارات جانە كوممۋنيكاتسيالار ءمينيسترى داۋرەن اباەۆتىڭ قۇتتىقتاۋ حاتىن وقىپ بەردى.
راسىندا 1960 جىلداردىڭ سوڭىندا ۋنيۆەرسيتەتتىڭ سوڭعى كۋرسىندا وقىپ ءجۇرىپ «سوتسياليستىك قازاقستان» گازەتىنە كىشى ادەبي قىزمەتكەر بولىپ ورنالاسقان قالامگەر وسىندا تابان اۋدارماي 40 جىلعا جۋىق قىزمەت اتقارىپ, ءبىر ىزبەن زەينەتكە شىققان ەكەن.
ءادىل اعا وسى ارالىقتا گازەتتىڭ كۇندەلىكتى قۇج-قۇج قايناپ جاتقان شارۋاسىن اتقارا ءجۇرىپ, كوركەم ادەبيەتكە دە قالام تارتقان. اتاپ ايتقاندا, «اق كۇمبەز», «كوكجيەك», « جۇرەك جىلۋى», «تەرگەۋ ءالى بىتكەن جوق», «قارا شاڭىراق», «شەراعامنىڭ شەرۋى» جانە «مەنىڭ شەراعام» اتتى ەسسە-اڭگىمە, نوۆەللالار جيناعى ەڭبەكقور ءجۋرناليستىڭ قالام قۋاتىنىڭ ايعاعى ىسپەتتەس.
كەزدەسۋ بارىسىندا ءادىل اعا باسىلىم قىزمەتكەرلەرىنە جۋرناليست كاسىبى وتە قادىرلى ماماندىق ەكەنىن, سوندىقتان مىنا وتىرعان سىزدەر ونىڭ قادىر-قاسيەتىن ءبىلىپ, ادالدىق تانىتۋ باستى قاجەتتىلىك دەگەندى باسىپ ايتتى. سونىمەن بىرگە كوپتى كورگەن كوشەلى اعا ۇجىمنىڭ بەرەكەسىن ۇستاپ تۇراتىن تاتۋلىق پەن بەرەكە-بىرلىك, سول سەبەپتى اركەز ءبىر-بىرلەرىڭىزدى سىيلاپ, قۇرمەتتەپ جۇرىڭىزدەر, ءوزىڭ جاقسى بولساڭ ءومىرىڭ دە ءماندى بولادى دەگەن ونەگە-وسيەتىن جەتكىزدى.
ءوز كەزەگىندە ادەكەننىڭ ارىپتەستەرى جانات ەلشىبەك, سۇلەيمەن مامەت, سەيفوللا شايىنعازى قاتارلى الدىڭعى بۋىن وكىلدەرى جانە ءىزىن باسقان سامات مۇسا, عابيت مۇسىرەپ, تالعات باتىرحان, جاقسىباي سامرات سەكىلدى ىنىلەرى جۇرەكجاردى لەبىزدەرىن ءبىلدىرىپ, تىلەكتەستىك تانىتتى.
بەكەن قايرات ۇلى,
«ەگەمەن قازاقستان»
