سەنات توراعاسىنىڭ ورىنباسارى ب.بەكنازاروۆ كەزدەسۋدى اشا كەلىپ, بۇگىنگى تاڭدا دەپۋتاتتار كورپۋسىنىڭ اتقارىپ جاتقان جۇمىستارى تۋرالى حاباردار ەتتى. سونداي-اق ەلىمىزدىڭ دامۋ قارقىنى مەن جەتىستىكتەرى تۋرالى ايتا كەلىپ, قازىرگى زاماندا ماڭىزدى ماسەلەلەردىڭ ءبىرى – ۇرپاق تاربيەسى تۋرالى ءوز ويلارىن ورتاعا سالدى. بۇل رەتتە ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنان تۋىندايتىن مىندەتتەر اياسىندا ەل بولاشاعى تاربيەلى ۇرپاقتىڭ قولىندا ەكەنى اتاپ ءوتىلدى. ۇرپاق تاربيەسى ەكونوميكالىق مول تابىستار مەن تەحنولوگيالىق وركەندەۋدىڭ تاساسىندا قالاتىن بولسا, ول قوعام ءۇشىن ەلەۋلى قاۋىپتەردىڭ بىرىنە اينالادى. قوعام وركەنيەتكە قاراي دامىعان سايىن رۋحاني قۇلدىراۋدىڭ دا قاتەرى بايقالادى. توراعا ورىنباسارى تۇراقتىلىق ساقتالماعان ەلدەردەگى بوسقىنشىلىقتى مىسالعا الا وتىرىپ, بۇگىنگى ۇرپاقتى ەل تاۋەلسىزدىگىنە زياندى ءارتۇرلى قاۋىپتى قاتەرلەردەن ساقتاندىرۋ قاجەتتىگىن اتاپ ءوتتى.
كەزدەسۋ بارىسىندا قاتيموللا ريزۋانوۆ, باقتىبەك تاۋباەۆ, نۇرمۇحان تاڭباي, ءمادينا عابدىسالىموۆا جانە تاعى باسقا ارداگەرلەر ءسوز الىپ, ءوز ويلارىن ورتاعا سالدى. سەناتتىڭ ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ توراعاسى اسقار بەيسەنباەۆ تا جاستار تاربيەسى تۋرالى پىكىرىن ءبىلدىردى.
