پارلامەنت سەناتىنىڭ دەپۋتاتى, «پرەزيدەنتتىڭ بەس الەۋمەتتىك باستاماسىن» باقىلاۋ جونىندەگى رەسپۋبليكالىق قوعامدىق كەڭەستىڭ توراعاسى باقىتجان جۇماعۇلوۆتىڭ توراعالىق ەتۋىمەن وتكەن جيىنعا ءبىلىم جانە عىلىم مينيسترلىگىنىڭ لاۋازىمدى قىزمەتكەرلەرى مەن الماتى قالاسىندا ورنالاسقان جوعارى وقۋ ورىندارىنىڭ رەكتورلارى قاتىستى. كەزدەسۋ بارىسىندا جوو-نىڭ الماتى قالاسىنداعى جاتاقحانالار قۇرىلىسىنىڭ بارىسى ەگجەي-تەگجەيلى تالقىلاندى. اتاپ ايتقاندا, قاجەتتى قۇجاتتاردى ۋاقتىلى دايىنداۋ, وسى ىسكە ينۆەستورلاردى تارتۋ, كەزەك كۇتتىرمەيتىن ماڭىزدى شارۋالاردى جۇزەگە اسىرۋدىڭ تەتىكتەرىن تابۋ جانە باسقا دا كەلەلى ماسەلەلەر بويىنشا كەڭىنەن اڭگىمە قوزعالدى.
جوعارىدا ايتىلعان ۇندەۋدىڭ ءۇشىنشى باستاماسىندا مەملەكەت باسشىسى بىلاي دەگەن ەدى:
ءبىز الەمدىك ستاندارتتارعا ساي ءبىلىم بەرۋ جۇيەسىن قالىپتاستىرا وتىرىپ, ستۋدەنتتەردىڭ ءبىلىم الۋىنا جانە تۇراتىن جەرىنە جاعداي جاساۋعا ءتيىستى نازار اۋدارۋىمىز قاجەت.
قازىر جوعارى وقۋ ورىندارى مەن كوللەدجدەردىڭ ستۋدەنتتەرىن جاتاقحانامەن قامتاماسىز ەتۋ ماسەلەسى وتە وزەكتى.
بۇل مىندەتتى شەشۋ ءۇشىن جوعارى وقۋ ورىندارى, كوللەدجدەر مەن دەۆەلوپەرلىك كومپانيالار مەملەكەت پەن جەكە مەنشىكتىڭ سەرىكتەستىگى قاعيداسىمەن جاتاقحانا سالۋدى باستاۋى كەرەك.
مەملەكەت ءوز تاراپىنان ءبىلىم جانە عىلىم مينيسترلىگى ارقىلى جاتاقحانا قۇرىلىسىنا جۇمسالعان ينۆەستيتسيالاردىڭ بەلگىلى ءبىر بولىگى بىرتىندەپ قايتارىلۋىنا كەپىلدىك بەرەدى.
2022 جىلدىڭ سوڭىنا دەيىن ستۋدەنتتەرگە ارناپ كەمىندە 75 مىڭ ورىندىق جاڭا جاتاقحانا سالۋدى تاپسىرامىن.
بۇل الداعى جىلداردا وسە تۇسەتىن سۇرانىستى ەسكەرگەننىڭ وزىندە جاتاقحانا تاپشىلىعىن ءبىرجولا شەشەدى».
مىنە, وسى تاپسىرمانىڭ ورىندالۋى بارىسى جايىندا پارلامەنت سەناتىنىڭ دەپۋتاتى, «پرەزيدەنتتىڭ بەس الەۋمەتتىك باستاماسىن» باقىلاۋ جونىندەگى رەسپۋبليكالىق قوعامدىق كەڭەستىڭ توراعاسى باقىتجان جۇماعۇلوۆ, ءبىلىم جانە عىلىم ۆيتسە-ءمينيسترى بيبىگۇل اسىلوۆا جانە باسقا دا وسى ىسكە جاۋاپتى قىزمەتكەرلەر بايانداما جاسادى. ال جوو-نىڭ رەكتورلارى ءالى دە شەشىلمەي جاتقان تۇيتكىلدى ماسەلەلەردى تىلگە تيەك ەتىپ, العا قويعان جوسپارلارىمەن دە ءبولىستى.
عالىم سۇلەيمەن,
«ەگەمەن قازاقستان»
الماتى
