قازاقستاندا بالالار جالپى حالىق سانىنىڭ 31% قۇرايدى. كورسەتكىشتى وڭىرلەر بويىنشا قاراستىراتىن بولساق, بالالار ۇلەسى ەڭ تومەنگى ايماقتار قوستاناي - 23%, پاۆلودار وبلىستارى - 25%. اتىراۋ - 36%, جامبىل - 37 %, قىزىلوردا - 37%, ماڭعىستاۋ - 38%, ەڭ جوعارى كورسەتكىش وڭتۇستىك قازاقستان وبلىسىندا بايقالادى - 41% .
«ەگەر دە بالالاردىڭ ۇلەسى, مىسالى 35%-دان جوعارى بولاتىن بولسا, وندا الەۋمەتتىك ينفراقۇرىلىمعا سالماق تۇسەدى, ال 25%-دان تومەن بولسا, جەتىسپەۋشىلىك بايقالادى, سوندىقتان ايماقتاردى دامىتۋدا وسى ماسەلەگە نازار اۋدارۋ قاجەت»,-دەيدى زۋلفيا مۇحامەدبەكقىزى.
ستاتيستيكا كوميتەتىنىڭ مالىمەتى بويىنشا, نارەستەلەر مەن 17 جاس ارالىعىنداعى بالالاردىڭ سانى 5 623 387 قۇرايدى - 51/49 (ۇل/قىز). 2017 جىلدىڭ باستاپقى كەزەڭىندە اۋىلدىق جەرلەردە تۇراتىن بالالار - 47%, ال قالا وڭىرلەرىندە 53% قۇراعان. اۋىل-ايماقتاردا تۇراتىن بالالار كورسەتكىشى جوعارى وبلىستار: وڭتۇستىك قازاقستاندا - 655 مىڭ, الماتىدا - 510 مىڭ جانە جامبىل وبلىسىندا - 255 مىڭ.
بۇگىندە قازاقستاندا بالالار مەن جاسوسپىرىمدەردىڭ قۇقىقتارىن رەتتەيتىن 45-تەن اسا نورماتيۆتىك اكتىلەر قابىلدانعان, ياعني «قازاقستان رەسپۋبليكاسىنداعى بالانىڭ قۇقىقتارى تۋرالى» زاڭى مەن وزگە دە نورماتيۆتىك قۇقىقتىق اكتىلەردىڭ ەرەجەلەرىنە نەگىزدەلەدى.
سوڭعى جىلداردا بالالارعا قاتىستى قىلمىس كورسەتكىشى تومەندەگەن. 100 مىڭ بالاعا شاققاندا زارداپ شەككەندەر سانى سوڭعى بەس جىلدا 3,7 ەسەگە ازايىپ وتىر.
قازاقستاندا بالالاردىڭ قۇقىقتارىن قورعاۋعا ۋاكىلەتتى ورگان – قر ءبىلىم جانە عىلىم مينيسترلىگىنىڭ بالالار قۇقىقتارىن قورعاۋ كوميتەتى. بالالار مەكەمەلەرى قر دەنساۋلىق ساقتاۋ جانە ىشكى ىستەر مينيسترلىگىنىڭ قاراۋىندا. بالالار ومىرىنە قول سۇقپاۋ ماسەلەسىنە بارلىق مينيسترلىكتەر مەن ۆەدومستۆولار جاۋاپتى ءارى قوعامدىق ۇيىمدار دا بۇل شارادان تىس قالماۋى ءتيىس.
زورلىق-زومبىلىقپەن كۇرەستە «بالالاردى بىرگە قورعايمىز!» جول كارتاسى قر مەملەكەتتىك ۇيلەستىرۋىمەن ىسكە قوسىلعان. جوبا شەڭبەرىندە بالالار ءۇيىنىڭ تاربيەلەنۋشىلەرىنە ارنالعان ء«ۇي-مەكتەپ» (پاترۋلدەر, جارىقتاندىرۋ جانە ت.ب.), قاۋىپسىزدىك كارتاسى ازىرلەنىپ, سەمينارلار, دارىستەر, اڭگىمەلەر وتكىزۋمەن قاتار كىتاپشالار, ەسكەرتپە حابارلامالار ۇلەستىرىلگەن. مۇنداي شارالار بالالاردىڭ قاۋىپسىزدىگىن كۇشەيتۋدە بىردەن-ءبىر اقپاراتتىق كومەكشى قۇرال مەن ءتيىمدى ادىستەر بولىپ تابىلادى.
ەلۆيرا سەرىكقىزى,
«ەگەمەن قازاقستان»
الماتى
