جالپى تۇركىستان وڭىرىندەگى تاۋلاردىڭ كوپتەگەن ەرەكشەلىكتەرىنىڭ ءبىرى - جازعى ماۋسىمدا الپينيزم شارالارىن, جارىستار وتكىزۋگە ىڭعايلى. ۇلتتىق پارك دەرەكتەرىنە جۇگىنسەك, بيىلعى 8 ايدا رەسەي, بەلورۋسسيا, وزبەكستان, قىرعىزستان جانە ۋكراينا ەلدەرىنەن 600 - گە جۋىق الپينيست پەن تۋريستەر كەلگەن. ال كۇنى كەشە شىڭعا شىققانداردىڭ ءجونى بولەكتەۋ بولدى. «Kazakh Tourism» ۇلتتىق كومپانياسى استانانىڭ 20-جىلدىعىنا ارنالعان ءىس-شارالار اياسىندا, قازاقستاننىڭ 20 شىڭىنا ەكسپەديتسيا ۇيىمداستىرىپ وتىر. مادەنيەت جانە سپورت مينيسترلىگى تۋريزم يندۋسترياسى كوميتەتى تاپسىرماسى بويىنشا. مىنە سول شىڭداردىڭ ءبىرى, ياعني الپينيستەر باعىندىرعان تۇركىستان وبلىسىنىڭ سايرام-وگەم ۇلتتىق پاركىندە ورنالاسقان 20-شى شىڭ (3446م) جاڭا اتاۋعا يە بولدى.
«Kazakh Tourism» ۇك» اق ءباسپاسوز قىزمەتى حابارلاعانداي, ەكسپەديتسيا تان-شان تاۋلارىنىڭ سولتۇستىگىنەن, بيىكتىگى - 4330,9 مەتر, نۇرسۇلتان شىڭىنان باستالعان. ەكسپەديتسيا بارىسىندا قامتىلعان شىڭنىڭ ەڭ بيىگى - التاي تاۋلارىندا ورنالاسقان مۇزتاۋ شىڭى (4506 م) ەكەن. باتىس تيان-شانداعى جاڭا «استانانىڭ 20-جىلدىعى» اتاۋىن العان شىڭ ەكسپەديتسيا قامتىعان سوڭعى تاۋ شىڭى بولىپ وتىر. ەكسپەديتسيانى ۇيىمداستىرۋ بارىسىندا تۋريستىك, ەكسترەمالدىق سپورت تۇرلەرىن دامىتۋعا, ەكوتۋريزم جانە ترەكينگ باعدارلارىن ۇيىمداستىرۋ ءۇشىن الەۋەتى جوعارى 3 ءوڭىر - الماتى, تۇركىستان, شىعىس قازاقستان وبلىستارى تاڭدالىپ الىنعان. اتالمىش شاراعا 100-دەن استام ادام, ونىڭ ىشىندە كاسىبي الپينيستەر جانە تاجىريبەلى ساياحاتشىلار, تانىمال ينتەرنەت - بلوگەرلەر قاتىستى. ەندى وسى مارشرۋتتاردا ينفراقۇرىلىمدى دامىتۋ بويىنشا ۇسىنىستار ازىرلەنبەك. بۇل شارانىڭ ماقساتى - تيان-شان تاۋلارىنىڭ قازاقستان جاعىن الەمگە تانىتۋ, ەلىمىزدىڭ تاۋ ءتۋريزمىن دامىتۋداعى الەۋەتىن كورسەتۋ. ەكسپەديتسيا بارىسىندا جينالعان ماتەريالدار تۋريستىك باعدارلامالار مەن ءتيىستى حالىقارالىق گايبۋكتەرگە ەنگىزىلمەك.
ايتا كەتەلىك, تاۋ ءتۋريزمىن دامىتۋعا تۇركىستان وبلىسىندا ەرەكشە ءمان بەرىلۋدە. بۇگىنگە سايرام-وگەم ۇلتتىق پاركى اۋماعىندا 6 دەمالىس ءۇيى, اڭشىلار ءۇيى, ەتنواۋىل, كيىز ءۇي كەشەنى, 11 تۋريستىك باعىت, دەمالىس الاڭقايلارى, شولۋ الاڭدارى تۋريستەر مەن دەمالۋشىلارعا قىزمەت كورسەتۋدە. تۋريستەرگە قاجەتتى زاتتار مەن ءمىنىس اتتار جانە جول كورسەتۋشى بولىنەدى. تۋريستىك باعىتتار پارك اۋماعىنداعى ماقپال, سۋسىڭگەن, سايرامسۋ كورىنىسى ەرەكشە كولدەرى مەن بوزتورعاي, سايرامسۋ, سارىايعىر, وگەم جانە ماشات وزەندەرىنىڭ بويىنداعى تابيعاتى تۇنعان, كەرەمەت سۇلۋ ۋچاسكەلەردى قامتيدى. پارك تاراپىنان دەمالۋشىلارعا قىزمەت كورسەتۋدىڭ ساپاسى مەن تۇرلەرى دە جىلدان - جىلعا جاقسارىپ كەلەدى. بۇل ءوز كەزەگىندە پارك اۋماعىنا كەلگەن دەمالۋشىلاردىڭ جىلدان – جىلعا كوبەيۋىنە وڭ اسەر ەتۋدە. مىسالى, 2016 جىلى - 19,7 مىڭ, 2017 جىلى - 23,4 مىڭ, ال 2018 جىلدىڭ 8 ايىندا 27 مىڭ ادام كەلىپ, تىنىعىپ قايتقان. ولارعا قىزمەت كورسەتۋدەن بيىلعى 8 ايدا 8,7 ملن. تەڭگە قارجى تۇسكەن.
عالىمجان ەلشىباي,
«ەگەمەن قازاقستان»
تۇركىستان وبلىسى
