مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل تۋرالى اگەنتتىگىنىڭ باتىس قازاقستان وبلىسى بويىنشا دەپارتامەنتى قازاقستان رەسپۋبليكاسىنىڭ پرەزيدەنتى جانىنداعى مەملەكەتتىك باسقارۋ اكادەمياسىنىڭ باتىس قازاقستان وبلىستىق فيليالىمەن بىرلەسىپ تالانتتى جاستاردى مەملەكەتتىك قىزمەتكە تارتۋ, كادر قورىن قالىپتاستىرۋ ماقساتىندا وڭىردە العاش رەت جوعارى وقۋ ورىندارى تۇلەكتەرى ءۇشىن باتىس قازاقستان وبلىسىنىڭ مەملەكەتتىك قىزمەت مەكتەبىن اشتى. قازىر جاڭا مەكتەپكە قابىلداۋ شارالارى ءجۇرىپ جاتىر.
مەملەكەتتىك قىزمەت مەكتەبى جاس كوشباسشىلاردى وقىتۋ, مەملەكەتتىك ورگانداردا تاعىلىمدامادان وتكىزۋ ارقىلى مەملەكەتتىك قىزمەتتىڭ ءىس جۇزىندەگى داعدىلارىن ۇيرەنۋگە مۇمكىندىك بەرەدى.
جاقىندا جاڭگىر حات اتىنداعى باتىس قازاقستان اگرارلىق-تەحنيكالىق ۋنيۆەرسيتەتى, ماحامبەت وتەمىس ۇلى اتىنداعى باتىس قازاقستان مەملەكەتتىك ۋنيۆەرسيتەتى, باتىس قازاقستان يننوۆاتسيالىق-تەحنولوگيالىق ۋنيۆەرسيتەتى جانە قازاقستان يننوۆاتسيالىق جانە تەلەكوممۋنيكاتسيالىق جۇيەلەر ۋنيۆەرسيتەتى ستۋدەنتتەرمەن كەزدەسۋ ءوتتى. كەزدەسۋدە مەملەكەتتىك قىزمەت مەكتەبىنىڭ مىندەتتەرى مەن ماقساتتارى تانىستىرىلىپ, تەستىلەۋ باعدارلاماسىنا قاجەتتى قازاقستان رەسپۋبليكاسىنىڭ نورماتيۆتىك قۇقىقتىق اكتىلەرىنىڭ نەگىزگى باعىتتارى تۋرالى ايتىلدى.
- ورالداعى مەملەكەتتىك قىزمەت مەكتەبىنە جوعارى وقۋ ورىندارىنىڭ 4 كۋرس ستۋدەنتتەرى عانا قابىلدانادى. ماقساتىمىز – كەلەشەگىن مەملەكەتتىك قىزمەتكە ارناعىسى كەلەتىن كەلەتىن جاس ماماننىڭ جوو ديپلومىمەن بىرگە مەمقىزمەتتىڭ تالاپ-داعدىلارىن دا قوسا مەڭگەرىپ شىعۋىنا كومەكتەسۋ, - دەيدى اگەنتتىكتىڭ باتىس قازاقستان وبلىسى بويىنشا دەپارتامەنت باسشىسىنىڭ ورىنباسارى ميربولات نۇرتازين.
ميربولات سۇيەۋ ۇلىنىڭ ايتۋىنشا, مەكتەپتە العان ساباق مەملەكەتتىك قىزمەتتىڭ ءيميدجىن كوتەرىپ, جاس مامانداردى وسى سالاداعى رەفورمالارمەن تانىستىرادى, ناقتى ءىس-تاجىريبەگە باعىتتالعان كومەك الادى.
ايتا كەتەيىك, ورالداعى مەملەكەتتىك قىزمەت مەكتەبىندە وقۋعا قازىردىڭ وزىندە 50 شاقتى جوعارى كۋرس ستۋدەنتى نيەت ءبىلدىرىپتى. ارنايى سىناقتان وتكەننەن كەيىن ولاردىڭ 30-35-ءى عانا قازاقستان رەسپۋبليكاسىنىڭ پرەزيدەنتى جانىنداعى مەملەكەتتىك باسقارۋ اكادەمياسىنىڭ باتىس قازاقستان وبلىستىق فيليالىندا شەبەرلىك ساباقتارىن الاتىن بولادى. ال مەكتەپتىڭ تولىق كۋرسىنان وتكەن ستۋدەنتكە قورىتىندى شەشىم بەرىلمەك. ءبىر قىزىعى, بۇل سەرتيفيكات جاس مامانعا مەملەكەتتىك قىزمەتكە كىرەتىن تەست سىناعىندا ەشقانداي جەڭىلدىك بەرمەيدى. باسقالارمەن قاتار تولىق سىناقتان وتەدى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
