ۇسىنىس قولداۋ تابار, ال بىزگە ۇمىت بولىپ بارا جاتقان ۇلتتىق قۇندىلىقتارىمىزدىڭ ۇلىقتالعانى ۇنادى. كەزىندە ءوزى كۋا بولعان اعا بۋىننىڭ «تۇيەمۇرىندىق» سالت - ءداستۇرىنىڭ ماڭىزى مەن ءمانى ەسىندە شىعار. ال جاستارعا بەيمالىمدەۋ. ارىس اۋدانىندا «تۇيەمۇرىندىقتى» قايتا جاڭعىرتىپ, قولدانىسقا ەنگىزۋ ماقساتىندا مادەني ءىس-شارا ءوتتى. تۇيە قومدالىپ, ۇلكەندەر باتا بەرىپ, جاستار سەيىل قۇرىپ, قىز سىڭسىپ, ۇزاتىلدى. بۇل كورىنىسكە ارىس اۋدانىنىڭ تۇرعىندارى دا قۋانا اتسالىستى. «مەنىڭ ويىمشا, بۇل ءداستۇر قازىرگى قوعامعا اۋاداي قاجەت. كوبىنە قالانىڭ اۋماعىندا تۇيە مەن جىلقىعا وتىرىپ, ءوز جۇرتىمەن قوشتاسۋعا مۇمكىندىك بولا بەرمەۋى مۇمكىن. بىراق, اتالعان عۇرىپتى زاماناۋي تۇردە قولدانىسقا ەنگىزۋىمىزگە ابدەن بولادى», - دەيدى وبلىستىق ادەت-عۇرىپ جانە سالت-ءداستۇر ورتالىعىنىڭ ديرەكتورى جانىبەك تاعاەۆ.
«تۇيەمۇرىندىق» — ۇزاتىلىپ جاتقان قىز كوشىنىڭ جولىندا وتىرعان اۋىلدىڭ ادامدارى كەرۋەن اتىنىڭ نوقتاسىنان, نە تۇيەسىنىڭ بۇيداسىنان ۇستاپ تۇرىپ سۇرايتىن كادەسى. قىز اناسى ولارعا كادەسىن جاسايدى, سىي العاندار باقىت تىلەي باتاسىن بەرىپ, ريزاشىلىعىن ءبىلدىرىپ تاراسادى. اۋىل ارداگەرلەرىنىڭ ايتۋىنشا, «تۇيەمۇرىندىق» بەرگەندە قىزدىڭ توركىنى قۇدالارعا قىزدى عانا ەمەس, تۇيەنى دە بەرەدى. ال بوتاسىن وزدەرى الىپ قالادى ەكەن. اراعا جىلدار سالىپ, قىزى كۇيەۋبالامەن بىرگە ۇيىنە بالاسىن كوتەرىپ كەلگەندە, بوتانى نەمەرەسىنە باسىرە رەتىندە بەرىپ جىبەرەتىن بولعان.
ءيا, بۇگىندە ەلىمىزدەگى ۇيلەنۋ نەمەسە باسقا دا تويلاردا داڭعازالىق پەن ىسىراپشىلدىق باسىم ەكەنى ءجيى ايتىلىپ ءجۇر. ءتىپتى كۇنى كەشە سەنات توراعاسى قاسىم-جومارت توقاەۆ جاۋىر بولعان اتاققۇمارلىق ىسىراپشىلدىقتان, ءسان-سالتاناتتان قۇتىلاتىن جاڭا ۇلگى, وزبەكتەر, تۇرىكتەر, تۇرىكمەندەردىڭ ۇلگىلەرى بويىنشا ۇلتتىق سالت-داستۇرگە دەن قويۋ قاجەتتىگىن ايتتى. ارىستاعى مادەني ءىس-شارانى ۇيىمداستىرۋشىلار دا قازاقىلىقتىڭ قايماعى بۇزىلماعان وڭىردە وسى ءبىر ۇلتتىق سالت-ءداستۇردىڭ قايتا جاڭعىرعانىن قالايدى.
عالىمجان ەلشىباي,
«ەگەمەن قازاقستان»
تۇركىستان وبلىسى
