ءىس-شارانىڭ ماقساتى – قازاقستانداعى تەاتر ونەرىن ناسيحاتتاۋ, ءداستۇرلى تەاتر ونەرىن ساقتاۋ جانە دامىتۋ, تالانتتى ءارى دارىندى تەاتر ارتىستەرى مەن رەجيسسەرلەردى انىقتاپ, ىنتالاندىرۋ, زاماناۋي ساحنا ۇردىستەرىنىڭ باسىم باعىتتارىن انىقتاپ, جاس ۇرپاقتى پاتريوتيزم مەن وتانسۇيگىشتىك سەزىمگە تاربيەلەۋ. تەاتر ومىرىندەگى بۇل اۋقىمدى وقيعا وسى ىزگى نيەتتىڭ ءبارىن كورنەكتى تەاتر اكتەرى جانە رەجيسسەرى, قازاقستاننىڭ حالىق ءارتيسى رايىمبەك سەيتمەتوۆتىڭ ءومىرى مەن قىزمەتىن ناسيحاتتاۋ مەن ونىڭ شىعارماشىلىعىمەن كوپشىلىكتى تانىستىرۋ, مادەنيەت قايراتكەرىنىڭ ەسىمىن ماڭگى ەستە قالدىرۋ ماقساتى توڭىرەگىنە توقايلاستىرىپ وتىر.
فەستيۆال اياسىندا الماتى قالاسىنىڭ تۇرعىندارى مەن قوناقتارى, استانا قالاسىنىڭ جاستار تەاترى, رايىمبەك سەيتمەتوۆ اتىنداعى تۇركىستان قالاسىنىڭ سازدى-دراما تەاترى, م. گوركي اتىنداعى مەملەكەتتىك اكادەميالىق ورىس دراما تەاترى, بايتەن وماروۆتىڭ «جاس ساحنا» تەاترى, رەسپۋبليكالىق مەملەكەتتىك اكادەميالىق كورەي مۋزىكالىق كومەديا تەاترى, ازامات ساتىبالدىنىڭ «Theatre 28» تەاترى, تاۋەلسىز «LABORATORY #316» تەاتر ترۋپپاسى ۇجىمدارىنىڭ ورىنداۋىندا ب.ۆاحاپزادە, ع.مۇسىرەپوۆ, ل.رازۋموۆسكايا, ب. جانداربەكوۆ, دون نيگرو, گ. بيۋحنەر جانە ف. ديۋررەنمات سياقتى شەتەلدىك, وتاندىق, كلاسسيكالىق جانە قازىرگى زامان اۆتورلارىنىڭ قويىلىمدارىمەن تانىسا الادى.
ال 21 قىركۇيەكتە م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ساحناسىندا لاۋرەاتتاردى ماراپاتتاۋ مەن فەستيۆالدىڭ جابىلۋ سالتاناتى بولادى.
سپەكتاكل كورسەتىلىمدەرىنە كىرۋ تەگىن.
ايگۇل احانبايقىزى,
«ەگەمەن قازاقستان»
الماتى
