سپارتاكيادا 2016 جىلدان بەرى ء«ۆى-جۇلدىزاي» كورپوراتيۆتى قورىنىڭ باستاماسىمەن «نۇر وتان» پارتياسىنىڭ, ءبىلىم جانە عىلىم مينيسترلىگىنىڭ, مادەنيەت جانە سپورت مينيسترلىگىنىڭ, نازارباەۆ ۋنيۆەرسيتەتىنىڭ, سپورت فەدەراتسيالارىنىڭ, پاراليمپيادالىق كوميتەتتىڭ جانە استانا قالاسى اكىمدىگىنىڭ قولداۋىمەن وتكىزىلىپ كەلەدى.
قاتىسۋشىلار ميني-فۋتبول, گولبول, جەڭىل اتلەتيكا, ءجۇزۋ, ۇستەل تەننيسى سياقتى سپورت تۇرلەرىمەن قاتار اسىق اتۋ, بەس تاس سىندى ۇلتتىق ويىنداردان دا سىنعا تۇسەدى. رەسپۋبليكالىق سپارتاكياداعا ەلىمىزدىڭ بارلىق ايماعىندا وتكەن ىرىكتەۋ جارىستارىندا توپ جارعان بالالار قاتىسۋدا. ىرىكتەۋ سايىسىنا ەلىمىزدەگى 97 مامانداندىرىلعان ينتەرناتتا وقيتىن جانە جالپى ءبىلىم بەرەتىن مەكتەپ ۇستازدارىنىڭ جەتەكشىلىگىمەن ۇيدەن ءبىلىم الاتىن ءۇش مىڭعا جۋىق بالالار مەن جاسوسپىرىمدەر قاتىستى. ناتيجەسىندە ولاردىڭ 411-ءى رەسپۋبليكالىق دوداعا جولداما الدى.
سالتاناتتى راسىمدە بارشا قاتىسۋشىلاردى سپارتاكيادانىڭ اشىلۋىمەن قۇتتىقتاعان «نۇر وتان» پارتياسى توراعاسىنىڭ ءبىرىنشى ورىنباسارى جاس سپورتشىلارعا ساتتىلىك تىلەدى.
– بۇگىنگى سايىستى باتىلدىق پەن توزىمدىلىكتىڭ, قايرات پەن قاجىرلىقتىڭ جانە نامىس پەن اسقاق رۋحتىڭ جارقىن كورىنىسى دەۋگە ابدەن بولادى. سوندىقتان سپارتاكيادانىڭ ءار قاتىسۋشىسى قانداي ناتيجە كورسەتسە دە جەڭىمپاز دەپ تانىلاتىنى ءسوزسىز. ويتكەنى وسىنداي ءىرى جارىسقا كەلىپ, قاتىسۋدىڭ ءوزى, شىن مانىندە, ۇلكەن جەتىستىك, – دەدى ماۋلەن اشىمباەۆ.
سونىمەن قاتار ول بۇل باعىتتا ەلىمىزدە جاسالىپ جاتقان جۇمىستارعا نازار اۋدارىپ:
– كەز كەلگەن ەلدىڭ دامۋىن انىقتايتىن ءتۇرلى كورسەتكىشتەر بولادى. سولاردىڭ ءبىرى جانە ەڭ ماڭىزدىسى – مۇمكىندىگى شەكتەۋلى جانداردىڭ ءومىر ساپاسى. ەگەر مۇنداي جانداردىڭ قۇقىعى قورعالىپ, بارلىق قاجەتتى جاعداي جاسالسا, ونداي مەملەكەتتى جان-جاقتى دامىعان دەپ ايتۋعا تولىق نەگىز بار. وسى تۇرعىدان كەلگەندە, قازاقستاندا ەلباسىمىزدىڭ تىكەلەي تاپسىرماسىمەن جۇيەلى جۇمىستار جۇرگىزىلىپ جاتقانىن اتاپ وتكەن ءجون. ياعني, ەلىمىزدە ينكليۋزيۆتى ءبىلىم بەرۋ جۇيەسىن ەنگىزۋ, كەدەرگىسىز ورتا قالىپتاستىرۋ, مۇمكىندىگى شەكتەۋلى جانداردىڭ جۇمىسقا ورنالاسۋىنا قولداۋ كورسەتۋ جانە وسى سالاعا قاتىستى زاڭنامالاردى ودان ءارى جەتىلدىرۋ جۇمىستارى قارقىندى جۇرگىزىلىپ جاتىر, – دەدى.
سونداي-اق بۇل جۇمىستارعا تەك مەملەكەتتىك ورگاندار عانا ەمەس, ساياسي پارتيالار, قوعامدىق بىرلەستىكتەر, ۇكىمەتتىك ەمەس ۇيىمدار جانە بيزنەس قاۋىمداستىقتار دا بەلسەندى ات سالىسۋى ءتيىس ەكەنىن ايتقان «نۇر وتان» پارتياسى توراعاسىنىڭ ءبىرىنشى ورىنباسارى مەملەكەت پەن قوعام بىرلەسىپ ارەكەت ەتكەندە عانا جوعارى ناتيجەلەرگە قول جەتكىزۋگە بولاتىنىن اتاپ ءوتتى.
– «نۇر وتان» پارتياسى دا بۇل باعىتتا اۋقىمدى جۇمىستار اتقارىپ جاتىر. اتاپ ايتقاندا, «كەدەرگىسىز كەلەشەك» پارتيالىق جوباسى اياسىندا كوپتەگەن يگى باستامالار جۇزەگە اسىرىلۋدا. وسى رەتتە الداعى ۋاقىتتا پارتيا ء«ۆى-جۇلدىزاي قورىمەن جانە وسى سالادا ەڭبەك ەتىپ جۇرگەن باسقا دا ۇيىمدارمەن تىعىز بايلانىس ورناتۋعا ءاردايىم دايىن, – دەگەن ماۋلەن اشىمباەۆ بالالاردى ىنتالاندىرىپ, رۋحاني كۇش-قۋات بەرەتىن وسىنداي باستاما ءۇشىن ۇيىمداستىرۋشىلارعا العىسىن ءبىلدىردى.
جاس سپورتشىلارعا ساتتىلىك تىلەپ, قۇتتىقتاعانداردىڭ قاتارىندا جۇزۋدەن 2016 جىلى ريو-دە-جانەيرو قالاسىندا وتكەن پاراليمپيادا ويىندارىنىڭ چەمپيونى ءزۇلفيا عابيدۋللينا, «BI Group» كومپانياسى باسقارما توراعاسىنىڭ ورىنباسارى, ديرەكتورلار كەڭەسىنىڭ مۇشەسى ارمان احمەتوۆ جانە تاعى دا باسقا بەلگىلى قايراتكەرلەر بولدى.
سايىس قاتىسۋشىلارى ءۇشىن ەڭ جارقىن ساتتەردىڭ ءبىرى رەتىندە بەلگىلى تەلەجۇرگىزۋشى, قوعام قايراتكەرى ارۋجان سايننىڭ جەتەكشىلىگىمەن وتكەن جاتتىعۋ بولعانىن ايتۋعا بولادى. ودان بولەك, سپارتاكيادا اياسىندا ارباعا تانىلعان جاندارعا ارنالعان «بوچا» ويىنى بويىنشا بىلىكتى جاتتىقتىرۋشىلاردىڭ شەبەرلىك ساعاتتارى ۇيىمداستىرىلدى.
