تاراز قالاسىنداعى «جەڭىس» ساياباعى جۋىردا قايتادان كۇردەلى جوندەۋدەن ءوتىپ, كوپشىلىكتىڭ كوز توقتاتىپ قارايتىن ورنىنا اينالعانى بەلگىلى. ساياباق ورتاسىنا باۋىرجان مومىش ۇلىنىڭ ەڭسەلى ەسكەرتكىشى ورناتىلىپ, سونىمەن قاتار جامبىل جەرىنەن مايدانعا اتتانعان مىڭداعان جاۋىنگەرلەردىڭ ەسىمى جازىلعان تاقتالار ورناتىلعان بولاتىن. جۋىردا اۋليەاتا وڭىرىنە باتىردىڭ كەلىنى, جازۋشى زەينەپ احمەتوۆا كەلىپ, جامبىلدىق جۇرتشىلىقپەن جۇزدەستى. اۋەلى باتىردىڭ ەڭسەلى ەسكەرتكىشىنە گۇل شوقتارىن قويىپ, رۋحىنا تاعزىم ەتتى. سونىمەن قاتار, «جەڭىس» ساياباعىن ارالاپ كورىپ, ءوزىنىڭ ريزاشىلىعىن ءبىلدىردى.
بۇدان كەيىن زەينەپ احمەتوۆانىڭ قاتىسۋىمەن «بالاساعۇن» ورتالىق كونتسەرت زالىندا كوپشىلىكپەن كەزدەسۋ ءوتتى. داڭقتى باتىر تۋرالى تاعىلىمدى اڭگىمەنى تىڭداۋعا جۇرتشىلىق كوپتەپ جينالدى. اتالعان شارانى جامبىل وبلىستىق ىشكى ساياسات باسقارماسى ۇيىمداستىرعان بولاتىن. كەزدەسۋدى باسقارما باسشىسى بەرىك قۇرمانعالي اشىپ, ەركىن فورماتتا جۇرگىزىپ وتىردى. «زەينەپتى حالىق تاربيەلەدى. مەن مىنا سانالى عۇمىرىمدا اتا بەدەلىنە تيتتەي داق ءتۇسىرىپ, نۇقسان كەلتىرمەۋگە تىرىسىپ كەلەمىن. «بىرەۋدى ماقتاساڭ دا, جاعىمپازدانبا. بىرەۋدىڭ كەمشىلىگىن ايتساڭ, كوزىنە تىكە قاراپ ايتاتىن بول» دەيتىن اتا. ول كىسىنىڭ وسيەتى بىزگە مۇرا. «باسىندا بۇلاعى بار وزەن ۇزاق اعادى» دەمەكشى, ءبىزدىڭ باستاۋ-بۇلاعىمىز – اتا. نەمەرە-شوبەرەلەرىنە اتانىڭ اڭگىمەلەرىن, وسيەتىن ايتىپ, قۇلاقتارىنا قۇيىپ وتىرامىن», دەدى زەينەپ احمەتوۆا ءوز سوزىندە.
كەزدەسۋ بارىسىندا زەينەپ احمەتوۆا باتىر تۋرالى تولعانىستارىن ايتا كەلىپ, ۇلتتىق قۇندىلىقتار, سالت پەن سانا, بۇگىنگى قازاق كەلىندەرى تۋرالى دا ءوز ويىمەن ءبولىستى. وسى ورايدا جۇرتشىلىق باتىردىڭ كەلىنىنە ساۋالدارىن اۋىزشا جانە جازباشا تۇردە جولداپ, ءتيىستى جاۋاپ الدى. سونىمەن قاتار, جامبىل وڭىرىنە كەلىپ-كەتىپ جۇرگەنىمەن, تۇلعا رەتىندە تۇڭعىش رەت شاقىرتۋ تۇسكەنىن دە ايتىپ ءوتتى. «بۇل مەنىڭ جولىم ەمەس, باقىتجاننىڭ جولى ەدى. امال نەشىك, تاعدىردىڭ جازۋىنا كىم قارسى تۇرا العان؟ باقىتجاننىڭ ورنىنا ءوزىم كەلىپ وتىرمىن. وسىناۋ قۇرمەت مەنىڭ مىقتىلىعىم دەمەيمىن, اتانىڭ ارقاسى», دەپ كىسىلىك جونىنەن اڭگىمە ءوربىتتى. ءوز سوزىندە جازۋشى انا تاربيەسى ۇلكەن ساباق ەكەنىن, سوندىقتان دا قازاق قىزدارىنىڭ يناباتتى, تاربيەلى بولۋ كەرەكتىگىن جەتكىزدى.
كەلەسى كۇنى زەينەپ احمەتوۆا تاراز مەملەكەتتىك پەداگوگيكالىق ۋنيۆەرسيتەتىندە جانە تاراز يننوۆاتسيالىق-گۋمانيتارلىق ۋنيۆەرسيتەتىندە وتكەن كەزدەسۋلەرگە قاتىستى. مۇنداعى كەزدەسۋ بارىسىندا دا تاعىلىمدى ءارى تاربيەلى اڭگىمەلەر ايتىلدى. سونىمەن قاتار, جامبىل اتىنداعى «رۋحانيات» ورتالىعىنا دا كەلىپ, كوپشىلىكپەن جۇزدەستى. كەزدەسۋدى جامبىل وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى دۇيسەنالى بىقىباەۆ جۇرگىزىپ وتىردى.
زەينەپ احمەتوۆانىڭ ءۇش كۇنگە سوزىلعان جامبىل جۇرتشىلىعىمەن جۇزدەسۋى باتىردىڭ تۋعان جەرى جۋالى اۋدانىندا جالعاسىن تاپتى. مۇندا باتىردىڭ كەلىنى باۋىرجان مومىش ۇلىنىڭ ەسكەرتكىشىنە گۇل شوقتارىن قويۋ راسىمىنە قاتىسىپ, باتىر اتىنداعى مۋزەيدى ارالاپ كوردى. سونىمەن قاتار, اۋدان ورتالىعى باۋىرجان مومىش ۇلى اۋىلىنداعى اۋداندىق مادەنيەت ۇيىندە جۇرتشىلىقپەن جۇزدەستى.
حاميت ەسامان,
«ەگەمەن قازاقستان»
جامبىل وبلىسى
