وسى ءبىر دەمەۋ اسىرەسە, جالعىزباستى انالارعا جاقسى بولىپ تۇر. جۇمىسپەن قامتۋ ورتالىقتارى كومەكتىڭ بۇل ءتۇرى شالعايداعى شاعىن اۋىلدار ءۇشىن ماڭىزدى ەكەندىگىن ايتىپ وتىر. الەۋمەتتىك جاعىنان از قامتىلعان وتباسىلار ءۇشىن قالاي بولعان كۇندە دە ءتاپ-ءتاۋىر تالعاجاۋ. كومەك اياسىندا جاردەماقىمەن قوسا تۇرعىندارعا تۇراقتى تابىس كوزى, جۇمىس ورنى دا ۇسىنىلادى. قورعالجىن اۋداندىق جۇمىسپەن قامتۋ ورتالىعى وسى جىلى 700-گە جۋىق تۇرعىندى الەۋمەتتىك كومەكپەن قامتۋعا ءتيىس بولاتىن.
– اتاۋلى كومەك بويىنشا بيىل رەسپۋبليكالىق بيۋدجەتتەن 17 ميلليون 363 مىڭ تەڭگە قاراجات ءبولىندى. بۇل قاراجات 105 وتباسىعا ەسەپتەلىپ وتىر. ازىرگە 480 ادامدى قۇرايتىن 96 وتباسى قامتىلدى. كومەكتىڭ ەكى ءتۇرى بار: شارتتى جانە شارتسىز. كومەك الۋ ءۇشىن الەۋمەتتىك جاعدايى تومەن وتباسىلار, مۇگەدەكتەر مەن كوپبالالى وتباسىلار ءوتىنىم جاساي الادى. شارتسىز الەۋمەتتىك كومەك دەگەنىمىز – جالعىز باستى انالارعا, زەينەتكەرلەرگە, ءبىرىنشى جانە ەكىنشى توپتاعى مۇگەدەكتەرگە اي سايىن تولەنەتىن تولەم. شارتتى كومەك جۇمىسپەن قامتۋعا جاردەمدەسۋ جانە قاجەت بولعان جاعدايدا الەۋمەتتىك بەيىمدەۋ شارالارىنا قاتىسۋدى كوزدەيدى, – دەيدى اۋداندىق جۇمىسپەن قامتۋ ورتالىعىنىڭ ديرەكتورى اسىلبەك مۇستافين.
جوعارىدا ايتىلعان كومەك تۇرلەرى 3-6 ايعا تاعايىندالادى ەكەن. قاجەت بولعان تۇستا مەرزىمى ودان دا ۇزارتىلۋى مۇمكىن. وسىنداي شارانىڭ ناتيجەسىندە تۇرمىسىن جاقسارتقان ادامداردىڭ ءبىرى – زۋلفيا يدياتۋللينا. جالعىزباستى اناعا ورتالىق ماماندارى تۇراقتى جۇمىس ورنىن تاۋىپ بەرىپتى.
– الەۋمەتتىك كومەك قىسىلعاندا كوپ-كورىم دەمەۋ بولدى. ورتالىق ماماندارى ەل ىشىندە الەۋمەتتىك كومەك تۋرالى اقپارات تاراتتى. مەن قۇجاتتارىمدى جيناپ باردىم. كوميسسيا وتىرىسىنان كەيىن اي سايىن وزىمە جانە بالالارىما 47672 تەڭگە كومەك كورسەتىلەتىن بولدى. بۇل شالعايداعى شاعىن اۋىلدىڭ جۇمىسسىز وتىرعان تۇرعىنى ءۇشىن ناپاقا. ەڭ باستىسى, جەرگىلىكتى قورىققا باعبان بولىپ جۇمىسقا ورنالاستىم, – دەيدى ول.
تۇراقتى جۇمىس ىستەپ, تابىس تاپقانعا نە جەتسىن, شىركىن. قازىر جالعىزباستى انا ەشكىمگە الاقان جايىپ وتىرعان جوق. ءوز ەڭبەگىنىڭ ارقاسىندا جەتىلىپ كەلەدى. بالالارىن دا جاڭا وقۋ جىلىنا جاقسىلاپ ازىرلەدى.
اتاۋلى الەۋمەتتىك كومەك ءبىردىڭ عانا ەمەس, مىڭنىڭ جاعدايىن جاقسارتۋعا سەپتىگىن تيگىزىپ وتىر. قاراپايىم حالىق كوڭىلگە دەم بەرگەن كومەك ءوز ەڭبەگىنە جالىناتىن كاسىپ تاۋىپ بەرۋىمەن قۇندى دەيدى.
بايقال ءبايادىل,
«ەگەمەن قازاقستان»
اقمولا وبلىسى,
قورعالجىن اۋدانى
