دارحان كالەتاەۆ ىشكى ساياسي تۇراقتىلىق, دىنارالىق جانە ەتنوسارالىق ۇيلەسىمدى قامتاماسىز ەتۋ ماسەلەلەرى تىكەلەي قازاقستان رەسپۋبليكاسى پرەزيدەنتىنىڭ نازارىندا ەكەنىن اتاپ ءوتتى. سونداي-اق بىرىككەن اراب امىرلىكتەرىنىڭ ءومىردىڭ بارلىق سالالارىنا توزىمدىلىك پرينتسيپتەرىن ەنگىزۋ ۇدەرىسى كەشەندى كوزقاراس ەكەنىن ايتتى. تاراپتار الەمنىڭ ءتۇرلى وڭىرلەرىندە مەملەكەت ىشىلىك جانە جاھاندىق دەڭگەيدەگى ءار ءتۇرلى ەتنيكالىق توپتار مەن دىندەر وكىلدەرىنىڭ اراسىنداعى قاقتىعىستىڭ ورىن الۋى ءوزارا بايلانىسى مەن ىنتىماقتاستىعىنىڭ السىرەۋىمەن تىعىز بايلانىستى ەكەنىن اتادى.
حالىقارالىق ىنتىماقتاستىقتى نىعايتۋ قاجەتتىلىگىنە توقتالا وتىرىپ, شەيح ناحايان بەن مۋباراك ءال ناحايان قازاقستان كوشباسشىسىنىڭ دىنارالىق ديالوگتى ىلگەرىلەتۋدەگى كۇش-جىگەرىن, سونداي-اق حالىقارالىق تۇراقتىلىق پەن ءتۇرلى قاقتىعىستاردى رەتتەۋدى كۇشەيتۋگە باعىتتالعان وزگە دە بىتىمگەرشىلىك باستامالارىن جوعارى باعالادى. وسى تۇرعىدا, ناحايان بەن مۋباراك ءال ناحايان قازاقستان پرەزيدەنتىنىڭ باستاماسىمەن وتەتىن الەمدىك جانە ءداستۇرلى دىندەر ليدەرلەرىنىڭ سەزى شىن مانىندە ءتۇرلى ءدىن وكىلدەرىن بىرىكتىرەتىن جاھاندىق ديالوگ الاڭىنا اينالعانىن جانە بۇدان بولەك, الداعى 2018 جىلعى 10-11 قازان كۇندەرى وتەتىن VI استانا سەزىنە وزدەرىنىڭ قاتىسۋىن راستايتىنىن مالىمدەدى.
بىرىككەن اراب امىرلىكتەرىنە ساپارى اياسىندا قر قوعامدىق دامۋ ءمينيسترى د.كالەتاەۆ بىرىككەن اراب امىرلىكتەرىنىڭ ۇلتتىق فەدەرالدىق ءماجىلىسى توراعاسىنىڭ ءبىرىنشى ورىنباسارى مارۋان بەن گلەيتپەن كەزدەستى. تاراپتار ەكى ەل اراسىنداعى پارلامەنتارالىق بايلانىستاردىڭ تۇراقتى دامۋىنا كوڭىلدەرى تولاتىندارىن جەتكىزدى. مينيستر ءباا ۇلتتىق فەدەرالدىق ءماجىلىسىنىڭ ەلدىڭ ىشىندە جانە حالىقارالىق دەڭگەيدە تولەرانتتىلىق, كونفەسسياارالىق جانە دىنارالىق ديالوگ يدەيالارىن كەڭەيتۋ جانە نىعايتۋعا قوسقان ۇلەسىن اتاپ ءوتتى. بۇعان بىرىككەن اراب امىرلىكتەرىنىڭ ءدىني توزبەۋشىلىك جانە كەمسىتۋشىلىكپەن كۇرەسۋ, سونداي-اق تەرروريزمگە قارسى كۇرەس تۋرالى زاڭدارى دالەل.
سونداي-اق, مينيستر دۋباي امىرلىگىنىڭ يسلام جانە قايىرىمدىلىق ىستەرى دەپارتامەنتىنىڭ باس ديرەكتورى حاماد اش-شەيبانيمەن كەزدەستى. اتالعان قۇرىلىم قايىرىمدىلىق قاۋىمداستىقتار مەن يسلام ينستيتۋتتارىنا ليتسەنزيا بەرۋ, قوعامداعى ءدىني ساۋاتتىلىقتى ارتتىرۋ ماسەلەلەرىمەن اينالىسادى. حاماد ءاش- شەيباني دارحان كالەتاەۆقا اعىمداعى جىلدىڭ 15-16 قاراشاسىندا دۋبايدا حالىقارالىق تولەرانتتىلىق ءسامميتىن وتكىزۋدى ۇيىمداستىرۋ بويىنشا جوسپارلارىمەن ءبولىسىپ, قازاقستان دەلەگاتسياسىنىڭ اتالعان سامميتكە قاتىسۋىنا سەنىم ءبىلدىردى. سونداي-اق, دەپارتامەنت باسشىسى استانادا وتەتىن الەمدىك جانە ءداستۇرلى دىندەر ليدەرلەرىنىڭ VI سەزىنە قاتىسۋعا دايىن ەكەندىكتەرىن ءبىلدىردى. بىرىككەن اراب امىرلىكتەرىنىڭ باقىت مينيسترلىگىنىڭ وكىلدەرىمەن كەزدەسۋ بارىسىندا ءباا تاراپى بۇل قۇرىلىمنىڭ قىزمەتى تۋرالى حاباردار ەتتى جانە قازاقستاندىق ارىپتەستەرىمەن ىنتىماقتاستىقتى دامىتۋعا جانە تاجىريبە الماسۋعا دايىن ەكەندىكتەرىن جەتكىزدى.
