بۇگىنگى تاڭدا ەۋرازيالىق ەكونوميكالىق وداق پەن تاۋەلسىز مەملەكەتتەر دوستاستىعى اياسىندا, سونىمەن بىرگە قازاقستان-بەلارۋس ۇكىمەتارالىق ساۋدا-ەكونوميكالىق ىنتىماقتاستىق جونىندەگى كوميسسيا شەڭبەرىندە الەۋمەتتىك-ەڭبەك سالاسى بويىنشا ەكى ەل اراسىندا ىنتىماقتاستىق جۇزەگە اسىرىلىپ كەلەدى.
قوس ەلدىڭ ۆەدومستۆو باسشىلارى ءمادينا ابىلقاسىموۆا مەن يرينا كوستەۆيچتىڭ كەزدەسۋىندە تاراپتار ءوزىن ءوزى جۇمىسپەن قامتىعان حالىقتى فورماليزاتسيالاۋ, الەۋمەتتىك قىزمەت كورسەتۋ جۇيەسىن جاڭعىرتۋ, الەۋمەتتىك-ەڭبەك سالاسىندا مەملەكەتتىك قىزمەتتەردى وڭتايلاندىرۋ جانە اۆتوماتتاندىرۋ, ەكى ەلدىڭ زەينەتاقى جۇيەسى جانە باسقا دا ماسەلەلەر بويىنشا قازاقستاندىق تاجىريبە توڭىرەگىندە بىرقاتار وزەكتى ماسەلەلەردى تالقىلادى.
ەكى جاقتى كەزدەسۋدە جالپى ەڭبەك نارىعىن دامىتۋدىڭ كەلەشەگى جانە «ەۋرازيالىق ەلەكتروندى ەڭبەك بيرجاسى» تسيفرلى جوباسىن قۇرۋ جونىندەگى قازاقستاننىڭ باستاماسى دا جان-جاقتى ءسوز بولدى. باستامانىڭ نەگىزگى باسىمدىعى – تسيفرلاندىرۋ ءتارتىبىنىڭ كوزدەگەن ماقساتتارىنا قول جەتكىزۋ. بۇل – ەۋرازيالىق ەكونوميكالىق وداق شەڭبەرىندە تسيفرلى ەكونوميكانى دامىتۋ جولىنداعى ەڭبەك رەسۋرستارىنىڭ ەركىن اينالىمى, ءبىرتۇتاس ەڭبەك نارىعىن قالىپتاستىرۋ جانە اتالعان وداققا مۇشە ەلدەردەگى ەڭبەككەرلەردىڭ جۇمىسپەن قامتىلۋىن جەڭىلدەتۋدى كوزدەيدى.
«اتالعان باستامانى ىسكە اسىرۋ ەۋرازيالىق ەكونوميكالىق وداق اياسىندا بيزنەسكە, مەملەكەتتىك ورگاندارعا جانە قىزمەتكەرلەرگە ۋاقىت پەن رەسۋرستاردى ۇنەمدەۋگە, قاعازباستىلىقتى ازايتۋعا, ءوزارا ءىس-قيمىل كەدەرگىلەرىن جەڭىلدەتۋگە, جۇمىسپەن قامتۋ پروتسەدۋرالارىن وڭتايلاندىرۋعا, قوس تاراپتىڭ اقپاراتتىق مۇمكىندىگىن ارتتىرۋعا كەڭىنەن جاعداي تۋعىزادى. سونىمەن بىرگە, كاسىپكەرلەردىڭ وسال توپتارى مەن كولەڭكەلى نارىق كورسەتكىشتەرىنىڭ تومەندەۋىنە سەپ بولادى», دەدى ەلىمىزدىڭ ەڭبەك جانە الەۋمەتتىك قورعاۋ ءمينيسترى م.ابىلقاسىموۆا.
سونىمەن قاتار ەكىجاقتى كەزدەسۋدە مينيسترلىكتەر اراسىندا الەۋمەتتىك جانە ەڭبەك سالاسىنداعى ىنتىماقتاستىق تۋرالى مەموراندۋمعا قول قويىلدى.
تاراپتار الەۋمەتتىك ەڭبەك جانە حالىقتى جۇمىسپەن قامتۋ سالاسىندا بىرلەسكەن جوبالاردى دايىنداۋ, وسى باعىتتاعى مەملەكەتتىك ساياساتتى جۇزەگە اسىرۋدا ءوزارا اقپارات, تاجىريبە جانە ءبىلىم الماسۋ, سونداي-اق عىلىمي-زەرتتەۋ مەن ونى دامىتۋ باعىتىندا ىنتىماقتاستىقتى جانداندىرۋ بويىنشا ۋاعدالاستى.
سونىمەن قاتار بەلارۋس دەلەگاتسياسى استانا قالاسىنىڭ ەسىل اۋدانىنىڭ حالىققا قىزمەت كورسەتۋ, جۇمىسپەن قامتۋ, «نۇرلى جۇرەك» الەۋمەتتىك قىزمەت كورسەتۋ ورتالىعى» مكم, «قارتتار مەن مۇگەدەك بالالاردى وڭالتۋ ورتالىعى» سەكىلدى بىرقاتار الەۋمەتتىك نىسانداردى ارالادى.
«ەكى كۇندىك باعدارلاما اياسىندا الەۋمەتتىك قورعاۋ مەن زەينەتاقىنى دامىتۋدىڭ, سونداي-اق ناتيجەلى جۇمىسپەن قامتۋدىڭ جانە حالىق تابىسىن كوتەرۋدىڭ وزەكتى ماسەلەلەرى بويىنشا تاجىريبە مەن پىكىر الماستىق. بۇگىنگى تاڭدا پروبلەمالاردى بارىنشا ءتيىمدى شەشۋگە ىقپال ەتەتىن الەۋمەتتىك ەڭبەك سالاسىن تسيفرلاندىرۋ ماڭىزدى. بۇل ەڭ الدىمەن قوس ەل ۇكىمەتىنىڭ نەگىزگى باسىمدىعى دەپ بىلەمىن. ارينە, ءبىز سىزدەردىڭ وسى سالاداعى تاجىريبەلەرىڭىزدى باعالايمىز. اتاپ ايتقاندا, بۇگىندە بەلارۋس رەسپۋبليكاسىنىڭ الەۋمەتتىك-ەكونوميكالىق دامۋىنىڭ كوپتەگەن ينديكاتورلارىندا الدىڭعى قاتارلى تاجىريبەلەر بار. ءبىزدىڭ تاراپتان وعان قىزىعۋشىلىق جوعارى جانە ونى وزىمىزدە قولدانا الامىز», دەدى ەلىمىزدىڭ ەڭبەك جانە حالىقتى الەۋمەتتىك قورعاۋ ءمينيسترى م.ابىلقاسىموۆا.
ء«بىز ء«بىر تەرەزە» قاعيداسىمەن جۇمىس ىستەپ جاتقان جۇمىسپەن قامتۋ ورتالىقتارىنا بارىپ وڭ اسەرمەن ورالدىق. سونىمەن قاتار ەڭبەك نارىعىن رەتتەۋ جۇيەسىندە قازاق ەلىنەن ۇيرەنەرىمىز بار. قازاقستانداعى ەڭبەكاقى تولەمدەرىنىڭ تاسىلدەرىنە ەرەكشە كوڭىل اۋداردىق. بۇل باعىتتا كوش ىلگەرى كەلە جاتىرسىزدار. مەنىڭ ويىمشا, بەلارۋس رەسپۋبليكاسىنىڭ اۋماعىندا جوسپارلانعان كەلەسى كەزدەسۋ بىلىكتىلىك جۇيەسىنىڭ ۇلتتىق تاقىرىبىنا ارنالادى دەپ ويلايمىن. بۇگىندە ءبىز وسى باعىتتا ستراتەگيالىق سەرىكتەستىك ورناتتىق. جۋىق ارادا بۇل قوس ەل ۇكىمەتى دەڭگەيىندە قابىلداناتىن بولادى», دەپ اتاپ ءوتتى بەلارۋس رەسپۋبليكاسىنىڭ ەڭبەك جانە الەۋمەتتىك قورعاۋ ءمينيسترى ي.كوستەۆيچ.
دۋمان اناش,
«ەگەمەن قازاقستان»
