ەلباسى باستاماسىندا ناقتىلانعان باعىتتىڭ ءبىرى – قوسىمشا ءبىلىم گرانتتارىن ءبولۋ مەن ستۋدەنتتەردى جاتاقحانامەن قامتۋ جايى بولاتىن. جەتىسۋلىق جاستاردىڭ كەڭ قولداۋىنا يە بولىپ, اتا-انالاردىڭ ريزاشىلىعىنا بولەنگەن باستاما بويىنشا قازىر ناقتى شارالار قولعا الىندى. جوسپار بويىنشا وبلىستا ستۋدەنتتەرگە ارنالعان 10 جاتاقحانا سالۋ كوزدەلگەن. قازىر قۇرىلىس جۇرگىزۋگە قاجەتتى جەر تەلىمى ءبولىنىپ, جوبالاۋ جۇمىستارى باستالىپ تا كەتتى.
– بەس باستامانىڭ ىشىندەگى ەڭ وزەكتىسى مەملەكەتتىك گرانتتاردىڭ سانىن ارتتىرۋ جانە بىلىمگەرلەردى جاتاقحانامەن قامتۋ ماسەلەسى ەكەنى انىق. ەلباسىنىڭ شەشىمىمەن 2018-2019 جىلدارى بولىنەتىن قوسىمشا گرانتتار ءبىلىم سالاسىنا ەلەۋلى سەرپىن بەرەتىنى انىق. وقۋ وقىپ, ىزدەنەمىن دەگەن جاستاردى قولداۋ, بىلىمگە, جاتاقحاناعا دەگەن قولجەتىمدىلىك بويىنشا جاريا ەتىلگەن جاقسى جاڭالىق – جالپىعا ورتاق جاعىمدى ءىس. بۇعان دەيىن ەلىمىز بويىنشا مەملەكەت تاراپىنان جوعارى وقۋ ورىندارىنا 54 مىڭ گرانت ءبولىنىپ كەلگەن. ەندىگى كەزەكتە ەلباسى باستاماسىمەن اتالمىش تەگىن وقۋ جۇيەسى 20 مىڭ گرانتپەن تولىقتى, – دەيدى تالدىقورعان زاڭ كوللەدجىنىڭ ديرەكتورى مىقتىبەك راحىمبەكوۆ.
باستاما اياسىندا جاتاقحانامەن قامتۋ ۇلەسىن ارتتىرۋ دا ستۋدەنتتەردىڭ كوڭىلىنە سەنىم ۇيالاتتى. ويتكەنى ەلىمىزدىڭ بارلىق وڭىرىندە ستۋدەنتتىك باسپانا جايى سىن كوتەرمەيدى. بۇل جاعىنان جەتىسۋلىق جاستار دا قيىندىققا تاپ بولىپ وتىرعانى جاسىرىن ەمەس. وبلىستاعى بىرەگەي وقۋ ورنى – ءىلياس جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ وزىندە دە جاتاقحانا جەتىسپەۋشىلىگى بار. ۋنيۆەرسيتەتتىڭ ەكى جاتاقحاناسى 500 ستۋدەنتكە عانا لايىقتالعان. ال مىڭنان استام جاس قالادان پاتەر جالداپ نەمەسە تۋىس-تۋعانىنىڭ ءۇيىن ساعالاۋعا ءماجبۇر. ەندى «پرەزيدەنتتىڭ بەس الەۋمەتتىك باستاماسى» نەگىزىندە جاسالعان جول كارتاسى بويىنشا تاعى دا 500 ورىندىق جاتاقحانا قۇرىلىسى باستالماقشى. ءدال وسىنداي جاتاقحانا تاپشىلىعى ايماقتاعى سۇلەيمەن دەميرەل ۋنيۆەرسيتەتىندە دە سەزىلىپ وتىر. جوسپار بويىنشا بۇل وقۋ ورنى اۋماعىنا 1000 ورىندىق ستۋدەنتتەر ءۇيى سالىنباق. بۇيىرسا, قۇرىلىس جۇمىستارى 2024 جىلى تولىق اياقتالادى. مۇنان بولەك, وبلىستاعى 8 كوللەدجگە جاڭادان جاتاقحانا سالۋعا جەر تەلىمى قاراستىرىلىپ وتىر. عيماراتتىڭ جوبالىق-سمەتالىق قۇجاتتارىن رەتتەۋگە 16 ملن تەڭگە بولىنگەن.
سونداي-اق بيىلدان باستاپ مەملەكەتتىك گرانت ۇلەسىنىڭ ارتۋى دا جاستاردىڭ ءبىلىم الۋعا دەگەن قۇشتارلىعىن ۇشتاپ, سەنىمىن نىقتادى. ماسەلەن, ەسەپ بويىنشا الماتى وبلىسىندا 17 مىڭ ۇل-قىز مەكتەپ بىتىرسە, ۇبت سىناعىنان سۇرىنبەي وتكەن 5198 جاس گرانت يەلەنىپ, جوعارى وقۋ ورنىنا تۇسكەن ەكەن. بۇل كورسەتكىش وتكەن جىلعىمەن سالىستىرعاندا 1334 ادامعا كوبەيگەن. دەمەك, ەلباسى باستاماسى بويىنشا گرانت سانىنىڭ كوبەيگەنى ايماقتارداعى ءبىلىم الۋعا ىنتالى جاستاردىڭ جولىن اشقانى انىق.
ال الماتى وبلىسى وڭىردەگى كادرلارعا دەگەن قاجەتتىلىكتى ەسكەرە وتىرىپ, ۇبت قورىتىندىسى بويىنشا جوعارى بالعا يە بولعان 100 تالاپكەرگە بىلتىر دا ءبىلىم بەرۋ گرانتتارىن بولگەن بولاتىن. ول بويىنشا پەداگوگيكالىق, اۋىل شارۋاشىلىعى جانە مەديتسينالىق ماماندىقتارعا باسىمدىق بەرىلگەن ەدى. بيىل بۇل ءۇردىس تاعى جالعاسىن تاۋىپ, وبلىس اكىمى تاراپىنان وعان قوسىمشا تاعى 100 گرانت ءبولىندى. ياعني 2018-2019 وقۋ جىلىندا بۇل ماقساتقا جەرگىلىكتى بيۋدجەتتەن قوسىمشا 47,5 ملن تەڭگە قاراستىرىلىپ وتىر.
– قازىر جەرگىلىكتى بيۋدجەت ەسەبىنەن 438 ستۋدەنت اكىم گرانتىنا وقىپ جاتىر. ولاردىڭ سەكسەن توعىزى مەديتسينا, ەكى ءجۇز جيىرما جەتىسى پەداگوگيكا, جيىرما ءۇشى اۋىل شارۋاشىلىعى, جيىرما ءبىرى مادەنيەت سالاسىنداعى ماماندىقتارعا بولىنسە, باسقا دا ماماندىقتار بويىنشا تاعى 78 ستۋدەنت تەگىن ءبىلىم الۋدا, – دەيدى بۇل جايىندا وبلىس اكىمىنىڭ ورىنباسارى ايداربەك بايجانوۆ.
قالماحانبەت مۇقامەتقالي,
«ەگەمەن قازاقستان»
الماتى وبلىسى
