بۇل تۋرالى بۇگىن استانادا «بايتەرەك» حولدينگىنىڭ باسشىسى ايدار ءارىپحانوۆتىڭ توراعالىق ەتۋىمەن وتكەن بانكتىڭ ديرەكتورلارى كەڭەسى وتىرىسىندا بەلگىلى بولدى.
تۇرعىن ءۇي قۇرىلىس جيناق بانكى باسقارما ءتورايىمى ءلاززات يبراگيموۆا العاشقى جارتىجىلدىقتا جاسالعان جۇمىس تۋرالى ەسەپ بەرە كەلە, بانكتىڭ دەپوزيتتىك بازاسىنىڭ 5,6%-عا وسكەنىن اتاپ ءوتتى. ەسەپتىك كەزەڭ ناتيجەسى بويىنشا, تۇرعىن ءۇي قۇرىلىس جيناق بانكى حالىقتىڭ ۇزاقمەرزىمدى سالىمدارى نارىعىندا 1-ورىنعا يە بولىپ وتىر. جيناقتاردىڭ جالپى سوماسى 549 ملرد تەڭگەنى قۇرايدى. بۇل ەكىنشى دەڭگەيلى بانكتەردىڭ جالپى دەپوزيتتىك قورجىنىنىڭ 26%-نا تەڭ. 2018 جىلدىڭ 6 ايى ىشىندە بانكتە تۇرعىن ءۇي قۇرىلىس جيناق جۇيەسى تۋرالى 204 915 جاڭا كەلىسىم-شارت بەكىتىلگەن.
اتالعان كەزەڭ ىشىندەگى بانكتىڭ نەسيە قورجىنى دا ءوسىم كورسەتىپ وتىر. 2018 جىلدىڭ 1 شىلدەسىندەگى ستاتيستيكاعا سايكەس, نەسيە قورجىنى 527,8 ملرد تەڭگەنى قۇرايدى, بۇل جىل باسىنداعى كورسەتكىشكە قاراعاندا 63,3 ملن تەڭگەگە ارتىق. وسىعان قاراماستان, بانكتىڭ NPL دەڭگەيى (ۋاقتىلى وتەلمەگەن, وتەۋ مەرزىمى 90 كۇننەن اسىپ كەتكەن) 0,05%-عا تومەندەپ, 0,25%-عا دەيىن تۇسكەن. 2017 جىلدىڭ قورىتىندىسى بويىنشا بانكتەگى NPL دەڭگەيى 0,30%-دى قۇراعان بولاتىن.
كەلتىرىلگەن ەسەپكە سايكەس, تۇرعىن ءۇي قۇرىلىس جيناق بانكى جەتكىلىكتى دەڭگەيدەگى وتىمدىلىك قورىنا يە. ۇلتتىق بانكتىڭ قارجى ينستيتۋتى تۇراقتىلىعىن قامتاماسىز ەتۋ ءۇشىن تالاپ ەتەتىن كورسەتكىشتەرى دە (پرۋدەنتسيالدىق نورماتيۆتەر قورى) ءۇش ەسە جوعارى بولىپ وتىر.
بۇدان بولەك ديرەكتورلار كەڭەسى وتىرىسىندا بيۋدجەتتىڭ جانە بانك رەنتابەلدىگى كورسەتكىشتەرىنىڭ ورىندالۋى تۋرالى, قارجى تاۋەكەلدەرىن باسقارۋ جونىندەگى جانە باسقا تۇرعىن ءۇي قۇرىلىس جيناق بانكى قىزمەتى ناتيجەلەرىنە قاتىستى بىرقاتار ەسەپتەر قاراستىرىلىپ, بەكىتىلدى.
