بايقاۋ-سايىستىڭ باستى ماقساتى – اسكەري قىزمەتشىلەردىڭ كاسىپتىك دايىندىق دەڭگەيىن جوعارىلاتۋ, كولىكتەردى جوندەۋ, ساربازداردىڭ قىزمەت كورسەتۋ جانە باسقارۋداعى ماشىقتارىن شىڭداۋ. سايىسقا وڭىرلىك قولباسشىلىقتاردان ىرىكتەلىپ شىققان ۇزدىك اسكەري قىزمەتشىلەر قاتىستى.
باسەكە بارىسىندا ۇلاندىقتار بتر جۇرگىزۋ, بتر-دەن وق اتۋ, ءجۇرىپ بارا جاتىپ جانە قىسقا كىدىرىس جاساي وتىرىپ جىلجىمالى نىسانداردى پۋلەمەتپەن اتۋ, اۆتوموبيل جۇرگىزۋ, تەحنيكالىق دايىندىق بويىنشا نورماتيۆتەر ورىنداۋ, بتر-مەن سۋ كەدەرگىلەرىنەن ءوتۋ, ءاۆتوموبيلدى تەمىر جول پلاتفورماسىندا تيەۋ بويىنشا نورماتيۆ ورىنداۋ سىندى سايىستاردا باقتارىن سىنادى.
جۇرگىزۋشىلەر اراسىنداعى جەكەلەگەن جارىستا جيناعان جالپى ۇپاي ساندارىنا سايكەس 5516 اسكەري ءبولىمىنىڭ اعا مامانى سەرجانت جانتىلەۋ كاكەن «ۇزدىك جۇرگىزۋشى» دەپ تانىلدى. ءدال وسى اتالىمدا– 5511 اسكەري ءبولىمىنىڭ اعا مامانى كىشى سەرجانت ايدىن وماروۆ ەكىنشى ورىندى يەلەنسە, 5547 اسكەري ءبولىمىنىڭ اعا مامانى ستارشينا ماقسات ۇشاقباەۆ ۇزدىك ۇشتىكتى تۇيىندەدى. ال بتر ەكيپاجدارى اراسىندا وتكەن كوماندالىق بىرىنشىلىكتە جيناعان ۇپاي سانى بويىنشا 5516 اسكەري ءبولىمىنىڭ بتر ەكيپاجى 108 ۇپايمەن كوش باسىنان كورىندى. اتالعان سايىستا 101 ۇپاي جيناعان 6656 اسكەري ءبولىمىنىڭ بتر ەكيپاجى مەن 94 ۇپاي ەنشىلەگەن ۇلتتىق ۇلان اسكەري ينستيتۋتىنىڭ بتر ەكيپاجى ەكىنشى جانە ءۇشىنشى ورىنداردى ءوزارا ءبولىستى. سونداي-اق جۇرگىزۋشىلەر مەن بتر ەكيپاجى اراسىندا وتكەن توپتىق بىرىنشىلىكتە 5516 اسكەري ءبولىمىنىڭ كومانداسى «ۇزدىك كوماندا» رەتىندە تىركەلدى.
– بيىلعى جىل – قازاقستان رەسپۋبليكاسىنىڭ ۇلتتىق ۇلانىندا جەكە قۇرامنىڭ كاسىپتىك دايىندىعىن جوعارىلاتۋ جىلى بولىپ بەكىتىلدى. ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا قوعام مەن جەكە ادامنىڭ رۋحاني جاڭعىرۋعا قوسار ۇلەسى باسەكەگە قابىلەتتى بولۋىندا دەپ كورسەتىلگەن. ال اسكەري قىزمەتشىلەر ەڭبەگىنىڭ ناتيجەسى – جەكە قۇرامنىڭ الدىنا قويىلعان قىزمەتتىك-جاۋىنگەرلىك مىندەتتەر مەن اسكەري بورىشىن جاۋاپكەرشىلىكپەن ساپالى ورىنداۋعا ارقاشان دايىن بولا الۋىنا بايلانىستى. ۇلتتىق ۇلاندىقتار وزدەرىنىڭ كۇندەلىكتى قاجىرلى ەڭبەكتەرىمەن ەلباسىنىڭ العا قويعان ستراتەگيالىق ماقساتتارى مەن مىندەتتەرىن ورىنداۋعا ەلەۋلى ۇلەس قوسىپ كەلەدى. جاۋىنگەرلەردىڭ بىلىگىن ارتتىرۋعا باعىتتالعان بۇگىنگى شارانىڭ دا ماقساتى وسى, – دەيدى ۇلتتىق ۇلاننىڭ «وڭتۇستىك» وڭىرلىك قولباسشىلىعىنىڭ ءباسپاسوز قىزمەتشىسى دانارا بايماعانبەتوۆا.
جارىس قورىتىندىسىندا ۇزدىك دەپ تانىلعان ۇلاندىقتار قازاقستان رەسپۋبليكاسى ۇلتتىق ۇلانى باس قولباسشىسى گەنەرال – لەيتەنانت رۋسلان جاقسىلىقوۆتىڭ اتىنان كۋبوك, ديپلوم جانە باعالى سىيلىقتارمەن ماراپاتتالدى.
ارمان وكتيابر,
«ەگەمەن قازاقستان»
الماتى
