وقۋ ورنى جانىنداعى الەۋمەتتىك جانە گەندەرلىك ينستيتۋتتىڭ ۇيىمداستىرۋىمەن وتكەن ءىس-شاراعا ءبىلىم وردلاسىنىڭ ستۋدەنتتەرى قاتىستى.
گ. سمايلوۆا ءدارىس بارىسىندا گەندەرلىك باعدارلانعان بيۋدجەتتەۋدى مەملەكەتتىك باعدارلامالارعا, جوسپارلار مەن بيۋدجەت جۇيەسىنە ەنگىزۋ تۋرالى, قازاقستاندىق قوعامنىڭ ءار مۇشەسىنىڭ مۇددەسىن, مۇمكىندىگى مەن قۇقىعىن ەسكەرە وتىرىپ, ولاردىڭ اشىقتىعى مەن تيىمدىلىگىن ارتتىرۋ جولدارى تۋرالى ءسوز قوزعادى. ەرلەر مەن ايەلدەردىڭ ەڭبەك تولەماقىسىنداعى كەزدەسەتىن ايىرماشىلىقتار تۋرالى دا ايتىلدى. وسى ماسەلەگە بايلانىستى «بۇۇ-ايەلدەر» ۇيىمىندا اتقارىلىپ جاتقان جۇمىستارعا دا توقتالىپ ءوتتى.
لەكتور جيىن اياسىندا تاقىرىپقا سايكەس دايىندالعان بەينەبايان مەن پرەزەنتاتسيانى قاتىسۋشىلار نازارىنا ۇسىندى. ءدارىس سوڭىندا گەندەرلىك ماسەلەلەر بويىنشا ءوز ويىن ءبىلدىرىپ, پىكىر ايتقان ستۋدەنتتەر ارنايى سىيلىقپەن ماراپاتتالدى.
ايتا كەتەيىك, اتالعان شارا قىزدار ۋنيۆەرسيتەتى مەن «بۇۇ-ايەلدەر» ۇيىمىنىڭ اراسىنداعى ءوزارا ارىپتەستىك كەلىسىم اياسىندا ءوتىپ وتىر.
– بۇگىندە قازاقستانداعى «بۇۇ-ايەلدەر» ۇيىمى نازىكجاندىلاردىڭ ەكونوميكالىق قۇقىقتارى مەن مۇمكىندىكتەر اياسىن كەڭەيتۋ, ايەلدەرگە قاتىستى زورلىق-زومبىلىقتى جويۋ, كوشباسشىلىق جانە ەلىمىزدىڭ قوعامدىق-ساياسي ومىرىنە قاتىسۋ جانە گەندەرلىك بيۋدجەتتەندىرۋدى ەنگىزۋ باعىتتارىندا قىزمەت اتقارادى. ءبىز ءوز باعدارلامالارىمىز ارقىلى اۋىلدىق ەلدىمەكەندەردە تۇراتىن ايەلدەرگە قولداۋ كورسەتىپ, ولاردىڭ بەلسەندىلىگىن ارتتىرماقپىز. ول ءۇشىن ءبىز نازىكجاندىلاردىڭ قارجى جاعىنان وزگەلەردەن تاۋەلسىز بولۋىنا, بيزنەس قىزمەتتەر مەن قارجى قۇرالدارىنىڭ قولجەتىمدى بولۋىنا كوڭىل بولەمىز. سونداي-اق, ايەلدەردىڭ قۇقىقتىق ساۋاتتىلىعىن ارتتىرۋعا جاعداي جاساۋدامىز, – دەپ اتاپ ءوتتى گۇلنار سمايلوۆا.
ونىڭ پىكىرىنشە, قازاقستانداعى ايەلدەردىڭ الەۋمەتتىك-ەكونوميكالىق ماسەلەلەرىن شەشۋ كەشەندى تۇردە جۇرگىزىلۋدە جانە مەملەكەتتىك باسقارۋ پروتسەسىنە, بارلىق شەشىم قابىلدايتىن دەڭگەيگە گەندەرلىك ءتاسىلدى ەنگىزۋ قاجەتتىگىن اتاپ ءوتتى.
