كوپ اسقانعا ءبىر توسقان

العاشقى رەت قىلمىس جاساپ قولعا تۇسپەي كەتۋ بال اراسىنىڭ ومارتاسىنان سۇق ساۋساعىڭدى باتىرىپ اساعان سياقتى بولۋى كەرەك. ايىرماسى, ومارتاشى بەتپەردە كيىپ, ەڭبەكقور ارالاردىڭ بالىن جيناپ الادى. ءوز ەڭبەگى, ءوز ومارتالارى. ال, بەتپەردە كيىپ كىسى ۇيىنە قاراقشىلىق شابۋىل جاسالعانداردىڭ كۇنىنىڭ ۇزاقتىعى ءبىر تۇتام. بىراق, وسىنى ولار ۋاقىتىندا سەزە قويمايدى. قولعا تۇسكەندە عانا ولەردەي وكىنەدى. سايرام اۋداندىق ىشكى ىستەر ءبولىمى قاماۋعا العان قىلمىستىق توپ ەگەر ايتقاندارى راس بولسا 2011 جىلدىڭ اقپانىندا قۇرىلعان. جيىرما توعىزداعى ازامات باسقارعان توپتىڭ ەڭ جاسى كىشىسى 1990 جىلى دۇنيەگە كەلگەن بوزبالا. اۋەلدە “بادام” اۋىلىندا ءبىر ۇيگە قاراقشىلىق شابۋىل جاساپ, 300 مىڭ تەڭگە الىپ ءىزىن جاسىرعاندار قولعا تۇسە قويمايدى. “داندەگەن قارساق قۇيرىعىمەن ءىن قازادى” دەگەندەي, وسىدان كەيىن بىرنەشە قىلمىس جاساپ, سايرام اۋدانىنداعى ءبىر ازاماتشانى قيناۋ ارقىلى 10 مىڭ دوللاردان استام قارجىسىن اكەتكەن. تاعى بىردە ءۇي يەسىمەن ارپالىسقا ءتۇسىپ, وزگەلەر كەلىپ قالاتىن بولعان سوڭ اياعىنان اتىپ كەتەدى. بۇلاردىڭ الماتى قالاسىندا دا قىلمىس جاساعاندارى بەلگىلى بولىپ وتىر. تالاي ءۇيدى قانقاقساتىپ, وڭاي ولجاعا دانىككەندەر ءومىرىمىز وسىلاي ەركىن وتەدى دەپ ويلاسا كەرەك. قولعا ءتۇستى. ەندى وگىزدەي وكىرىپ, وتكەنىنە وكىنىش بىلدىرگەنىمەن كەشۋ جوق. قىلمىستارى ءۇشىن سوت الدىندا ءادىل جازاسىن الاتىن بولادى. باقتيار تايجان, شىمكەنت