ماراپاتى مول مەرەكەلىك شارا

وبلىس ورتالىعىنداعى «قونىس» سپورت سارايىندا ەل تاۋەلسىزدىگىنىڭ 20 جىلدىعىنا ارنالعان سالتاناتتى شارا بولدى. مەرەكەلىك سالتاناتتا ءسوز العان وبلىس اكىمى ارحيمەد مۇحامبەتوۆ ءوڭىردىڭ ەكونوميكالىق-الەۋمەتتىك دامۋىنداعى قول جەتكىزىلگەن نەگىزگى جەتىستىكتەرگە توقتالدى. سودان كەيىن ءوڭىر باسشىسى وبلىستىڭ ەكونوميكالىق جانە الەۋمەتتىك-مادەني دامۋىنا ەلەۋلى ۇلەس قوسقان, مەملەكەتتىك جانە قوعامدىق قىزمەتتەردە تابىستى ەڭبەك ەتكەن اقتوبەلىكتەرگە قازاقستان رەسپۋبليكاسىنىڭ مەملەكەتتىك ناگرادالارىن تاپسىردى. ولاردىڭ اراسىنان ۇلى وتان سوعىسىنىڭ II توپتاعى مۇگەدەگى يسا دارمەنوۆ – III دارەجەلى «ايبىن», ايتەكە بي اۋدانىنىڭ اكىمى ەسىمحان ەسەنباەۆ – «پاراسات», «سنپس-اقتوبەمۇنايگاز» اق ديرەكتورلار كەڭەسىنىڭ توراعاسى سۋن بو – II دارەجەلى «دوستىق», ون ەكى ادام «قۇرمەت» وردەندەرىمەن, ون التى اقتوبەلىك «ەرەن ەڭبەگى ءۇشىن», بەس اقتوبەلىك «شاپاعات» مەدالدارىمەن ماراپاتتالدى. وبلىستىق فيلارمونيانىڭ ءانشىسى مارات ءايتىموۆ پەن وبلىستىق بالالار كلينيكالىق اۋرۋحانااسىنىڭ ءبولىم مەڭگەرۋشىسى ۆلاديمير كوتلوبوۆسكي «قازاقستاننىڭ ەڭبەك سىڭىرگەن قايراتكەرى» اتاعىنا يە بولدى. ءبىر توپ اقتوبەلىك قازاقستان رەسپۋبليكاسىنىڭ قۇرمەت گراموتاسىن الدى. ون ادام «وبلىستىڭ 2011 جىل ادامى» اتاندى. سونداي-اق, ءبىر توپ اقتوبەلىككە وبلىس اكىمىنىڭ العىس حاتى مەن اقشالاي سىيلىعى تاپسىرىلدى. مەرەكەلىك سالتاناتتىڭ ارتى كونتسەرتكە ۇلاستى. وبلىس ورتالىعىندا جانە اۋدانداردا ەل تاۋەلسىزدىگىنىڭ 20 جىلدىعىنا ارنالعان مەرەكەلىك شارالار جالعاسىن تابۋدا. ساتىبالدى ءساۋىرباي, اقتوبە وبلىسى.