قازاقستان رەسپۋبليكاسىنىڭ ۆەنا قالاسىنداعى حالىقارالىق ۇيىمدار جانىنداعى تۇراقتى وكىلى – ەقىۇ ەكونوميكا جانە ەكولوگيا كوميتەتىنىڭ توراعاسى قايرات سارىباي ءىس-شارانىڭ تسيفرلىق ەكونوميكا مۇمكىندىكتەرىن پايدالانۋ ماقساتىندا بارلىق ۇلەسكەرلەردىڭ مۇددەلەرىن ىلگەرىلەتۋ تاقىرىبىنا ارنالعان سەسسياعا مودەراتور رەتىندە قاتىستى.
سەسسيا بارىسىندا تەحنولوگيالار دامىعان كەزەڭدە بىرلەسە جۇمىس ىستەۋ, ىنتىماقتاستىق جانە ۇيلەستىرۋ جۇمىستارىن قوسا جۇرگىزۋ, اقپارات جانە بايلانىس سالاسىندا بيزنەس كونفەرەنتسيا وتكىزۋ جانە اقىلدى قالالار مەن ۋنيۆەرسيتەتتەردىڭ جەلىسىن ورناتۋ تۋرالى ۇسىنىس جاسالدى. بۇل ءوز كەزەگىندە تسيفرلى داۋىردە ۇسىنىلاتىن مۇمكىندىكتەردى ءتيىمدى پايدالانۋ ءارى اتقارىلىپ جاتقان جۇمىستىڭ قايتالانباۋ ماقساتىندا ماڭىزدى بولعانىنا نازار اۋدارىلدى.
سەسسيانىڭ پىكىرتالاس بولىگىندە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ايگۇل شايىموۆا فورۋمدا كوتەرىلگەن وزەكتى تاقىرىپتار بويىنشا قازاقستاننىڭ تاجىريبەسىن تانىستىرا كەلە اگەنتتىكتىڭ مەملەكەتتىك قىزمەتتى دامىتۋ جانە كاسىبيلىگىن ارتتىرۋ, ادام كاپيتالىن دامىتۋ, تسيفرلاندىرۋ مەن سىبايلاس جەمقورلىقپەن كۇرەس باعىتىندا اتقارىپ جاتقان جۇمىسى تۋرالى ماعلۇمات بەردى. ونىڭ ىشىدە مەملەكەتتىك اپپاراتتىڭ قىزمەتىن جەتىلدىرۋ, «ە-قىزمەت» اقپاراتتىق جۇيەسى ارقىلى كادرلىق قۇجات اينالىمىن ەلەكتروندىق جۇيەگە كوشىرۋ, قوسالقى مەملەكەتتىك قىزمەت كورسەتۋ مەكەمەلەرىنىڭ ورتالىقتاندىرىلۋى جانە اۆتوماتتاندىرىلۋى مەن ينۆەستورلاردى قورعاۋ جوباسىنىڭ جۇزەگە اسىرىلۋىنا نازار اۋداردى. وزەكتى تاقىرىپتاردىڭ ءبىرى رەتىندە قازاقستاندا ەڭبەكاقىنى تولەۋدىڭ جاڭا جۇيەسى تۋرالى اقپارات ۇسىنىلدى.
«تالاپ» قولدانبالى زەرتتەۋ ورتالىعىنىڭ ديرەكتورى راحىم وشاقباەۆ «تسيفرلىق داۋىردە يننوۆاتسيالىق بيزنەس مودەلدەرى مەن ەكونوميكالىق ءوزارا بايلانىستىقتى ىلگەرىلەتۋ» تاقىرىبىنا ارنالعان سەسسيادا سپيكەر رەتىندە قاتىسىپ «بەس ينستيتۋتسيونالدىق رەفورمانىڭ» شەڭبەرىندە قازاقستاننىڭ ەكونوميكالىق دامۋى مەن ادام كاپيتالىن جەتىلدىرۋ جونىندە ورتالىقتىڭ جۇمىسى تۋرالى اقپارات ۇسىندى. سونىمەن بىرگە, ەلەكتروندىق ۇكىمەت ارقىلى مەملەكەتتىڭ اشىقتىعىن قامتاماسىز ەتۋ تاقىرىبى بويىنشا قازاقستاننىڭ تاجىريبەسىمەن جانە قازاقستانداعى يننوۆاتسيالىق بيزنەستى دامىتۋ تەتىكتەرى تۋرالى ويلارىمەن ءبولىستى.
