مىنە, استانانىڭ جۇپار اۋاسىن جۇتىپ, اقىننىڭ ولەڭ جولدارىنداي سۇلۋ عيماراتتارىنا تامسانىپ ءجۇرمىز. كۇنى كەشە كەلگەن قوناقتار بۋرابايعا, باياناۋىلعا بارىپ, قازاق دالاسىنىڭ قاسيەتى مەن قاستەرىن ۇعىنعانداي بولىپ قايتتى. اسىرەسە, شەتەلدەن كەلگەن قوناقتاردىڭ اسەرى ەرەكشە.
ءبىزدىڭ ۇلتتىق ماقتانىشىمىزعا اينالعان استانا – اسىل تاستان تۇرعىزىلعان اسقاق قالا. ەركە ەسىلدىڭ جاعاسىندا ورنالاسقان, جاڭا عاسىر عاجابىنان جارالعان ەرتەگىدەي ەلوردا, الەمدەگى ەڭ جاس قالا. كەڭ دالاداعى جاي قالا عانا ەمەس, ساياسي ەرىك-جىگەر, ۇكىلى ءۇمىت, كوركەيۋ, تاۋەلسىزدىك كورىنىسىنىڭ نىشانى.
استانا شاڭىراعى ءالى دە شارىقتاي تۇسپەك. جاڭا استانانىڭ كەلەشەگى تولىعىمەن XXI عاسىردىڭ ەنشىسىندە. استانانىڭ ءالى دە بولسا كوركەيە تۇسۋىنە ءبىز, قالامگەرلەر قاۋىمى دا ءوز ۇلەسىمىزدى قوسىپ كەلەمىز. ەلوردامىزدىڭ اڭىزعا بەرگىسىز كەلبەتى مەن سۇڭعاق كۇمبەزدەرىن جىرعا قوسىپ, قالا تۇرعىندارىنىڭ تىنىس-تىرشىلىگىن, ءومىرىن ارقاۋ ەتكەن شىعارمالاردى كوپتەپ جازىپ, استانامىزدىڭ مەرەيىن ۇستەم ەتۋ جولىندا ەڭبەكتەنۋدەمىز.
وسىناۋ جاس قالا اتاۋىنىڭ وزىندە ساكرالدىق ءمان بار. «استانا» نەگىزىنەن پارسى ءسوزى, قازاقشا تۇسىنىگى استانا – تابالدىرىق, بوساعا, كىرەبەرىس, سارايدىڭ قاقپاسى, سالتاناتتى وردا ەسىگى دەگەن ۇعىمداردى بىلدىرەدى.
تاريحقا باي سارىارقانىڭ ۇلان-بايتاق جەرىندە, قازاق جەرىنىڭ قاسيەتتى ورتالىعىندا مەملەكەتىمىزدىڭ جاڭا استاناسىنىڭ بوي كوتەرۋى, جاڭا ءبىر مادەني-عىلىمي, ساياسي ورتانىڭ شوعىرلانۋى, وتانىمىزدىڭ كوركەم, ساۋلەتتى, قۋاتتى وردانىڭ دۇنيەگە كەلۋى يگىلىكتىڭ نىشانى دەپ بىلەمىز.
استاناعا قىدىرىپ كەلگەن ءاربىر ادامنىڭ كوڭىلىندە ەرەكشە ءبىر سەزىم مەن تولقۋ, اسقاق ماقتانىش پەن سارقىلماس ءان تەربەلىپ جاتادى دەسەك قاتەلەسپەگەن بولار ەدىم.
ارۋ قالانىڭ ءاربىر ورالىمىن اشىق بۇرقاقتى اۋلالار مەن اسەم بەزەندىرىلگەن گۇلزارلار كومكەرگەن. شاھاردىڭ تورىنەن بوي تۇزەگەن «نۇر استانا» مەشىتى مەن «بايتەرەك», «تاۋەلسىزدىك جانە كەلىسىم سارايى», «حان شاتىر», تاعى باسقا ساياسي جانە مادەني ورتالىقتار مەن ءتۇرلى تاريحي مەموريالدى كەشەندەر جاڭا عاسىرداعى قازاقستاننىڭ اجار-كەلبەتى دەپ نىق سەنىممەن ايتا الامىن.
استانا قالاسىندا وتكەن ەكسپو بۇكىلالەمدىك بىرەگەي كورمەسى ماڭىزى جاعىنان دۇنيەجۇزىلىك ەكونوميكالىق فورۋمدارمەن, تۋريستىك تارتىمدىلىعىمەن الەمدىك دەڭگەيدە كورىنىس تاپتى. ەكسپو-2017 حالىقارالىق كورمەسىنىڭ تاقىرىبى – «بولاشاقتىڭ ەنەرگياسى». كورمە ارينە, ەلدىڭ وندىرىستىك قۋاتى مەن عىلىمي بازاسىن تەحنولوگيالىق جانە ەكونوميكالىق جاعىنان جاڭعىرتۋ جولىندا ۇلكەن پروگرەسس بولدى دەپ بىلەمىز. استانا قالاسى الەمنىڭ تۇكپىر-تۇكپىرىنەن كەلگەن ءتۇرلى مادەنيەتتەر ۇنىنە تولۋىمەن قاتار, اسەم قالا ءوزىنىڭ كورىكتى بەينەسىمەن قىزىعۋشىلىق اسەرىن مول تۋعىزدى دەپ سەنەمىن.
«استانا بۇگىندە – قازاقستان جەتىستىگى مەن جەڭىستەرىنىڭ سيمۆولى», دەپ ەلباسىمىز ن.نازارباەۆتىڭ ايتقانى ەش ءشۇباسىز شىندىق. جاڭا استانا سالۋ يدەياسىنىڭ اۆتورى ەلباسىمىزدىڭ «رۋحاني جاڭعىرۋ» تاريحي ستراتەگيالىق باعدارلاماسى مىنە, قازىردىڭ وزىندە ناتيجەسىن بەرۋدە.
بۇل شارا دا «رۋحاني جاڭعىرۋدىڭ» كورىنىسى. اقىندار دا, حالىق تا ىشتەي تۇلەپ, جاندارى نۇرلانىپ جاتقانى كوزدەرىنەن-اق كورىنىپ تۇر.
«اق وردالى استانام» جىر كەشىنە جينالىپ, اقىنداردىڭ جىرىنا سۋساپ وتىرعان استانالىق اعايىننىڭ اقەدىل كوڭىلىنە مىڭ العىس!
ۇلىقبەك ەسداۋلەت,
قازاقستان جازۋشىلار وداعى باسقارماسىنىڭ توراعاسى
