«باس دارىگەردىڭ جۇمىستان بوساتىلۋى تۋرالى, مەنىڭ قولىمدا بار اقپارات بويىنشا ول جۇمىستان كەتۋ تۋرالى ءوتىنىشتى ءوز قولىمەن جازعان. نەلىكتەن بۇلاي ەتكەنى دە تۇسىنىكتى. شىنىنا كەلگەندە, كوپتەگەن دارىگەرلەر دە جۇمىستان كەتكىسى كەلگەن. مەن ول ورتالىققا ارنايى بارىپ, دارىگەرلەرمەن سويلەسكەن ەدىم. بۇنىڭ وتە ۇلكەن قىسىم ەكەنى بەلگىلى. ءبارى دە قىلمىستىق جاۋاپكەرشىلىكتەن قورقادى. دارىگەرلەردىڭ ءتىپتى كەيدە نەگىزسىز قىلمىستىق قۋدالاۋعا ۇشىراعان كەزدەرى دە بولعان. ءبىز بۇل جاعدايعا وتە ابايلاپ كەلۋىمىز كەرەك. وتە شىنايى باعا بەرە ءبىلۋىمىز كەرەك. سەبەبى, سوت شەشىمى شىقپاي تۇرىپ, نەگىزسىز ايىپتاۋ وكىنىشكە قاراي پەريناتالدىق ورتالىقتا ەڭبەك ەتەتىن كاسىبي دارىگەرلەردىڭ جۇرەكتەرىن شايلىقتىرىپ جىبەرۋى مۇمكىن. وسىدان كەيىن ءبىز ونداي مامانداردى تاپپاي, ماسەلەنى ودان ارى قيىنداتا تۇسەمىز», - دەيدى مينيستر.
ول بۇل جاعدايدا ەڭ الدىمەن جەرگىلىكتى اتقارۋشى ورگاندار شەشىم شىعاراتىنىن اتاپ ءوتتى.
«مەديتسينالىق كومەكتى ۇيىمداستىرۋ, دەنساۋلىق ساقتاۋ سالاسىنىڭ مەملەكەتتىك-كوممۋنالدىق نىساندارىن باسقارۋ, باس دارىگەردى تاعايىنداۋ نەمەسە الىپ تاستاۋ بۇل جەرگىلىكتى اتقارۋشى بيلىكتىڭ قۇزىرەتىنە جاتادى. ءبىز نەلىكتەن شتابتاردىڭ جۇمىسىن اۋدان نەمەسە قالا اكىمدەردىڭ ورىنباسارلارىن جۇمىلدىرا وتىرىپ جۇرگىزەمىز؟ سەبەبى, بۇل تىكەلەي سولاردىڭ جۇمىستارى. دەمەك, ءبىز ەمدەۋدىڭ ستاندارتتارىن, حاتتالامالارىن, كادردى بەرەمىز, سالانى رەتتەيمىز, بىراق تىكەلەي جەرگىلىكتى اتقارۋشى ورگان بەلسەندى تۇردە بۇل شارۋامەن اينالىسۋى كەرەك», - دەدى مينيستر.
ايتا كەتەيىك, استانادا 4 انا ءولىمى بولعان پەرزەنتحانانىڭ باس دارىگەرى قىزمەتىنەن بوساتىلعان.
