«فوكۋس قازاقستان» جوباسى «رۋحاني جاڭعىرۋ» باعدارلاماسىنىڭ قازاقستان ونەرىن الەمدىك مادەني جانە زياتكەرلىك كەڭىستىكتە ىلگەرىلەتۋگە باعىتتالعان «جاھاندىق الەمدەگى زاماناۋي قازاقستاندىق مادەنيەت» ارنايى جوباسى شەڭبەرىندە ىسكە اسىرىلۋدا. جوبانىڭ ايرىقشا ەرەكشەلىگى — پرەزەنتاتسيالىق بولىمنەن جانە سۋرەتشىلەرگە ارنالعان كاسىبي–بىلىم بەرۋ باعدارلاماسىنان تۇراتىن ونى جۇزەگە اسىرۋدىڭ كەشەندى ءتاسىلى. جوبا زاماناۋي وتاندىق ونەردىڭ ءتۇرلى كورىنىستەرىن تۋدىراتىن سۋرەتشىلەرگە دەگەن شەتەلدىك قاۋىمنىڭ قىزىعۋشىلىعىن قالىپتاستىرۋعا باعىتتالعان.
كورمەلەر ءارتۇرلى كەزەڭدەر مەن ۇرپاقتاردىڭ سۋرەتشىلەرىنىڭ تۋىندىلارىن كورسەتۋگە, الەمدىك ونەر ساحناسى تۇرعىسىنان قازاقستاندىق ونەردى زەرتتەۋگە, كەڭەس كەزەڭىنىڭ جانە زاماناۋي سۋرەتشىلەردىڭ شىعارماشىلىعىن زەرتتەۋ ارقىلى حح جانە ءححى عاسىرلارداعى قازاقستان ونەرىنىڭ سيپاتىن ايقىنداۋعا, سونداي-اق رەسپۋبليكانىڭ تاۋەلسىزدىك العان كەزەڭىندەگى كوركەم ونەر ءداستۇرىنىڭ جالعاسى مەن قازىرگى زامانعى ونەردىڭ تۋىنداۋىن كورسەتۋگە باعىتتالعان. سونىمەن قاتار, قر ۇلتتىق مۋزەيى شەت ەلدەردە قازاقستاندىق سۋرەتشىلەرگە ارنالعان ارت-رەزيدەنتسيالاردى اشۋعا باستاما بىلدىرگەن. 1-ماۋسىمنان 30-قىركۇيەككە دەيىن بەتانيا (بەرلين) سۋرەتشىلەر ءۇيىنىڭ شەبەرحانالارى مەن ستۋديالارىندا سۋرەتشىلەر جاڭا تاجىريبە, ءبىلىم جانە داعدى جيناي الادى.
«فوكۋس قازاقستان» كورمەسىنىڭ باستى تاقىرىپتارى — قازاقستاندىق قوعامدى جاھانداندىرۋ, فەمينيستىك قوزعالىس, «جەرگىلىكتى مودەرنيزم» فەنومەنى جانە كوشپەلىدەن كەيىنگى ونەر.
بەس كورمە جوباسىندا 80-نەن استام سۋرەتشىنىڭ شىعارمالارى ۇسىنىلادى. ولاردىڭ قاتارىندا ءابىلحان قاستەەۆ, ۇكە اجيەۆ, اۋباكىر ىسمايىلوۆ, ايشا عالىمباەۆا, گۇلفايرۋز ىسمايىلوۆا, ساليحيتدين ايتباەۆ, جاڭاتاي شاردەنوۆ, ورالبەك نۇرجۇماەۆ, ەۆگەني سيدوركين, ەركىن مەرگەنوۆ جانە ت.ب. سۋرەتشىلەر, سونداي-اق, قازىرگى زامان سۋرەتشىلەرى: مولداقۇل نارىمبەتوۆ, رۋستام حالفين, سەرگەي ماسلوۆ, الماگۇل مەڭلىباەۆا, ساۋلە سۇلەيمەنوۆا, ەربوسىل مەلدىبەكوۆ, قىزىل تراكتور توبى, عالىم مادانوۆ جانە زاۋرەش تەرەكباي ت.ب., سونىمەن قاتار قازاقستان اۋماعىندا بولعان ءارى قازاقستان ونەرىنە ءوز شىعارماشىلىعىمەن ۇلەس قوسقان سۋرەتشىلەر: پەتر زالتسمان (1912–1985) جانە تاتيانا گلەبوۆا (1900–1985) — ورىس اۆانگاردى كوشباسشىسى جانە تالدامالى ونەردىڭ نەگىزىن سالۋشى پاۆەل فيلونوۆتىڭ وقۋشىلارى مەن ءىزباسارلارى, ۆلاديمير ستەرليگوۆ (1900–1973) — كازيمير مالەۆيچتىڭ وقۋشىسى, سەرگەي كالمىكوۆ (1891–1967) — سۋرەتشى–اۆانگاردشى, الپىسىنشى جىلداردىڭ سوڭىنا دەيىن ءومىر سۇرگەن كۇمىس ءداۋىردىڭ جالعىز شەبەرى, ورىس اۆانگاردىنىڭ سۋرەتشىسى ۆەرا ەرمولاەۆا (1893–1937) جانە ت.ب.
«كوشپەلىدەن كەيىنگى كوكجيەك» كورمەسى لوندوندا بيىل 18 قىركۇيەك–16 قازان ارالىعىندا وتەدى. مۇندا شىعارماشىلىق تاجىريبەلەر ارقىلى سۋرەتشىلەر وتكىزەتىن كوپتەگەن ديالوگتار تۇرىندە قازاقستاننىڭ زاماناۋي ونەرى ۇسىنىلادى. كورمە الەمدىك اعىم نەگىزىندە قازاقستاننىڭ زاماناۋي ونەرىن, سونداي-اق, جاھاندانۋ تۇرعىسىنان قازاقستاندىق الەۋمەت سيپاتىن قاراستىرادى. كورمەدە 31 سۋرەتشىنىڭ جۇمىستارى ۇسىنىلادى. كۋراتورلار: ينديرا دۇيسەباەۆا–زيابەك, اليا دە تيزەنگاۋزەن, كۋراتور-اسسيستەنت اليما بورانباەۆا جانە كونسۋلتانت ولگا سوۆا.
«استىق جانە راۋشان گۇلدەر» كورمەسى بەرليندە 25 قىركۇيەك–20 قازان ارالىعىندا وتەدى. بۇل كورمەدە 1945 جىلدان باستاپ قازىرگى تاڭعا دەيىنگى قازاقستاندىق ايەل-سۋرەتشىلەردىڭ ءتورت بۋىنىنىڭ جۇمىستارىنا جاسالعان زەرتتەۋ ناتيجەلەرى ۇسىنىلادى. كورمە مودەرنيستىك جانە قازىرگى زامانعى قازاقستاندىق ونەر مەن مادەنيەتتىڭ جاڭا پەرسپەكتيۆاسىن عانا ەمەس, سونداي-اق, پوستكەڭەستىك جانە پوستوتارشىلدىق كەزدەگى ايەلدەر ونەرىن زەرتتەۋدىڭ كەڭ مودەلىن ۇسىنادى. سونداي-اق, بەرليندە ارت-رەزيدەنتسيا قاتىسۋشىلارىنىڭ كورمەسى وتەدى. كۋراتورلار: دەۆيد ەلليوتت, رەيچيل ريتس-ۆوللوح, الماگۇل مەڭلىباەۆا.
«ويلار جيناعى: ويداعى وقيعالار» كورمەسى دجەرسي-سيتيدە وسى جىلدىڭ 14 قازانىنان 20 قاراشاسى ارالىعىندا وتەدى. كورمەنىڭ ماقساتى سۋرەتشىلەرگە ەڭ ءبىرىنشى كوللەكتسيا جيۋشى مارتەبەسىن بەكىتۋ. كوللەكتسيا جيناۋ دەگەنىمىز ماتەريالدىق زات نەمەسە رۋحاني دۇنيە ەكەنى ماڭىزدى ەمەس, قۇندى زاتتاردى جيناقتاۋ. ياعني, ءدال وسى سۋرەتشىلەر قورشاعان شىنايىلىقتىڭ, قيالدىڭ جەكەلەگەن اسپەكتىلەرى بولسىن نەمەسە ءارتۇرلى باعىتتاعى تاقىرىپتار بولسىن, ەڭ قۇندى دۇنيەلەردى جيناقتايدى. كورمەدە مولداقۇل نارىمبەتوۆ, ۆيتالي سيماكوۆ, سمايل باياليەۆ, ارىستانبەك شالباەۆ, سايد اتابەكوۆ سەكىلدى سۋرەتشىلەردەن تۇراتىن «قىزىل تراكتور» قازاقستاندىق زاماناۋي ونەر توبىنىڭ تۋىندىلارى ۇسىنىلادى. كورمە جىل سايىنعى ازيا ونەرى اپتالىعى (ACAW) اياسىندا نيۋ-يوركتە وتەدى. كۋراتور — ليزا احمادي, كۋراتور-اسسيستەنت — ۆلاديسلاۆ سلۋدسكي.
«ەۋرازيا قيالى: PostScriptum» كورمەسى بيىلعى 27 قاراشا مەن 2019 جىلعى 3 ناۋرىز ارالىعىندا سۋۆون قالاسىندا وتەدى. كورمە مودەرنيزمنىڭ حالىقارالىق ءتىلىن بايلانىستىرعان سۋرەتشىلەر تۋىندىلارىنىڭ زەرتتەۋلەرىن جانە قازاقستان مادەنيەتىنىڭ جەرگىلىكتى ەرەكشەلىكتەرىن ۇسىنادى. الەمدىك تاجىريبەدە وسىنداي كورسەتكىشتەرى بار ونەردى Local modernity — جەرگىلىكتى نوۆاتسيا نەمەسە جەرگىلىكتى مودەرنيزم دەپ اتايدى. ياعني, ءبىر جاعىنان, سۋرەتشىلەر قازاقستانداعى ءومىردى جانداندىرىپ, كەڭىنەن اشا وتىرىپ ونەردىڭ جاھاندىق تىلىندە سويلەيدى. ەكىنشى جاعىنان, ءتۇرلى بۋىن سۋرەتشىلەرى قازاقستاندىق contemporary art ءىزاشارى رۋستام ءحالفيننىڭ (1949–2008) «ەۋرازيا قيالىنان» كەيىن جاڭا شىعارماشىلىق «شىنايىلىعىن» قۇرا وتىرىپ, نوۆاتسيا مەن مودەرنيزم مۇراسىن قايتا جانداندىرادى. كۋراتورلار: يۋليا سوروكينا, شين ىن يانگ.
فوكۋس قازاقستان جوباسىن قر مادەنيەت جانە سپورت مينيسترلىگىنىڭ قولداۋىمەن قر ۇلتتىق مۋزەيى ۇيىمداستىرۋدا. جوبا جەتەكشىسى — لەونيد كوچەتوۆ, جوبا كۋراتورى — روزا ابەنوۆا.
