جاسىراتىنى جوق بيزنەس تاقىرىبىن قامتىعان قازاق تىلىندەگى تانىمدىق كىتاپتار بۇگىندە جوقتىڭ قاسى. جازۋشىنىڭ قازىرگى نارىق زامانىندا وتە وزەكتى سانالاتىن بۇل تاقىرىپقا ەركىن قالام تەربەۋى قازاق جاستارىنىڭ ءوز كاسىبىن اشىپ, جەكە ىسپەن اينالىسۋعا دەگەن قىزىعۋشىلىعىنىڭ ارتقانىن بايقاتادى. اتىندا ايتىلىپ تۇرعانداي كىتاپتىڭ بولمىسى بيزنەس باستاۋدىڭ قىرى مەن سىرىنا قانىقتىرىپ, بۇل سالانىڭ قيىندىعى مەن قىزىعىنان حابار بەرەدى. ەل تاۋەلسىزدىگىمەن بىرگە بيزنەس باستاعان ەرلان ءاشىمنىڭ كاسىپتەگى جەتىستىكتەرىن, ءجۇرىپ وتكەن جولدارىن, قۇرعان كومپانيالارىنىڭ تاريحىن مىسال ەتە وتىرىپ, توقسانىنشى جىلدارداعى قيىن كەزەڭ, زاماننىڭ وزگەرۋى, بيزنەستەگى ساۋاتتىلىق, باتىستىق ءبىلىم مەن قازاقى قۇندىلىقتاردىڭ توعىسۋى تۇرعىسىنان مول دەرەككە قانىقتىراتىن شىعارما كوركەم ءارى تۇسىنىكتى تىلدە جازىلعان.
كىتاپتىڭ ءبىز بايقاعان باستى ارتىقشىلىعى سول – كاسىپكەرلىككە بەت العان وقىرمانداردى وي تەرەڭىنە تارتىپ, قانداي جەتىستىككە جەتسەڭ دە ۇلتتىق بولمىسىڭنان, رۋحاني قازىناڭنان اجىراماۋ ماسەلەسىن الدا ۇستاپ, ۇلتتىق برەند قالىپتاستىرۋ ارقىلى ەل مارتەبەسىن اسقاقتاتۋعا شاقىرادى. اۆتور اتا-اناعا دەگەن ەرەكشە قۇرمەت, اكە مەكتەبى, باۋىرمالدىلىق, نامىس, تازالىق, تەكتىلىك, سەنىم, وبال, ساۋاپ, جاناشىرلىق, قازاقى ينتەللەكت, ۇلتجاندىلىق, قاراپايىمدىلىق, قايىرىمدىلىق, ادالدىق سىندى ەڭ يگى قاسيەتتەردى ساقتاي وتىرىپ باستالعان كاسىپتىڭ شاراپاتى مول, بەرەكەسى باسىم بولاتىنىن وقىرمانعا ۇعىندىرعىسى كەلەدى. رۋحاني ءارى ماتەريالدىق قۇندىلىقتاردىڭ تىزگىنىن تەڭ ۇستاۋ ادامدىقتىڭ اداستىرماس كىلتى ەكەنىن العا تارتادى.
– كىتاپ بەلگىلى كاسىپكەردىڭ بيزنەستەگى اسقان اسۋلارى مەن اتتاعان بەلەستەرىنەن سىر شەرتەدى. بۇل ەڭبەگىمدە كوپتەگەن ىسكەرلىك كىتاپتار سياقتى قۇرعاق تەوريامەن شەكتەلۋدى ءجون كورمەدىم. ءتىپتى كىتاپتىڭ باس كەيىپكەرى بيزنەس سالاسىنداعى باستى ۇعىمدار مەن تەوريالاردى بىلمەي-اق ەكى كومپانيا قۇرعان. قالاي دەيسىزدەر عوي؟ قازاقى تاربيە مەن ۇلتتىق قۇندىلىقتار ارقىلى. وقىرمان بۇل ەڭبەگىم ارقىلى بيزنەس جاساۋدىڭ جولدارىمەن تانىسىپ قانا قويماي, كەيىپكەرىمنىڭ بويىنداعى ۇلتىمىزدىڭ اسىل قۇندىلىقتارىنا ءتانتى بولسا دەيمىن. بەرەكەلى بيزنەس بەسىكتەگى تاربيەدەن باستالادى. مەملەكەت باسشىسى, كاسىپكەرلەرگە ەڭ الدىمەن حالىققا جاقسىلىق جاساڭدار دەگەن ءسوزدى ۇنەمى ايتىپ كەلە جاتىر. ءاربىر ىسكەر ازامات حالىقشىل بولسا, ۇلت مۇراتىن باستى ورىنعا قويسا, بۇل ناعىز «رۋحاني جاڭعىرۋ» بولار ەدى دەپ ەسەپتەيمىن, – دەيدى اۆتور.
كىتاپتاعى كاسىپكەرلىككە قاتىستى ءتۇرلى دەرەكتەر, وي-پىكىرلەر جاس تالاپتانۋشىلاردىڭ عانا ەمەس, تاجىريبەلى كاسىپكەرلەر مەن مامانداردىڭ دا كادەسىنە جارايدى دەپ سەنەمىز.
ارمان وكتيابر,
«ەگەمەن قازاقستان»
الماتى
