بۇگىندە الەمنىڭ كوپتەگەن مەملەكەتتەرىندە ىشكى جانە سىرتقى قاۋىپسىزدىك ماسەلەسىن كۇشەيتۋمەن قاتار ميگراتسيالىق جۇيەنى باقىلاۋ, ەڭبەك ميگرانتتارىنىڭ قاۋىپسىزدىگىن قورعاۋ سياقتى وزەكتى ماسەلەلەردى شەشۋدە زاماناۋي مۇمكىندىكتەرگە باسا نازار اۋدارىلۋدا. ازاماتتاردىڭ ەلەكتروندىق جۇيەدە تىركەلۋى, ساندىق جۇيە سياقتى باعدارلامالاردىڭ ناقتى ناتيجە بەرۋى الەمنىڭ وزىق ەلدەر تاجىريبەسىنەن ايقىن اڭعارىلادى. الماتىدا اشىلعان ميگرانتتارعا قىزمەت كورسەتۋ ورتالىعى وسىنداي الەۋمەتتىك ماڭىزى بار ماسەلەلەردى جاڭاشا ۇلگىدە شەشۋدىڭ ءبىر باعىتى ىسپەتتى.
كوشى-قون قىزمەتتەرىن كورسەتەتىن ورتالىقتار بۇعان دەيىن استانا جانە شىمكەنتتە اشىلعان بولاتىن. الماتى ەڭبەك ميگرانتتارى كوپ شوعىرلانعان اۋماق بولعاندىقتان, ولاردىڭ قۇجاتتاما راسىمدەرىن جەڭىلدەتۋ ۋاقىت ۇدەسىنەن تۋىنداپ وتىر. ناقتى دەرەكتەر بويىنشا اعىمداعى جىلدىڭ باسىنان بەرگى مەرزىمدە ميگراتسيا بويىنشا 50 مىڭنان اسا قىزمەت كورسەتىلگەن. ەندى ەڭبەك ميگرانتتارى مەملەكەتتىك قىزمەتتەردى حالىققا قىزمەت كورسەتۋ ورتالىقتارىنىڭ ستاندارتىنا ساي ء«بىر تەرەزە» قاعيداتى بويىنشا الا الادى.
شەتەلدىك ميگرانتتاردىڭ جۇمىس ىستەۋگە رۇقسات الۋىن راسىمدەۋگە بۇرىن بىرنەشە كۇن ءارى ءاربىر قۇجات ءۇشىن بىرقاتار مەكەمەنىڭ ەسىگىن اشۋعا تۋرا كەلسە, ەندىگى كەزەكتە شەتەلدىكتەر قۇجاتتاردى ءبىر ورتالىقتان از ۋاقىتتىڭ ىشىندە الۋ مۇمكىندىگىنە يە بولدى.
«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ الماتى قالاسى بويىنشا فيليالىنىڭ ديرەكتورى عالىم قارقىنباەۆتىڭ ايتۋىنشا, ورتالىقتىڭ مۇمكىندىگى مول. مۇندا قۇجاتتاردى جەدەل راسىمدەپ قانا قويماي, سىبايلاس جەمقورلىق ارەكەتتەرىن بولدىرماۋعا دا ىقپال ەتەرى ءسوزسىز ءارى جۇمىس بەرۋشى ءۇشىن دە قولايلى.
جاڭا ورتالىق الماتى قالاسىنداعى «العاباس-1» ىقشاماۋدانى, «اتلەتيكالىق قالاشىق», 5/22 مەكەن-جايىندا ورنالاسقان. زاماناۋي جابدىقتالعان عيماراتتا ماماندار ەرتەڭگى ساعات 9.00-دەن باستاپ كەشكى 18.00-گە دەيىن تۇسكى ءۇزىلىسسىز قىزمەت كورسەتەدى. ورتالىقتا كۇنىنە شامامەن 1,5 مىڭ ازاماتقا قىزمەت كورسەتۋ جوسپارلانىپ وتىر.
ەلۆيرا سەرىكقىزى,
«ەگەمەن قازاقستان»
الماتى
