لاڭكەستىڭ قولىنان قازا تاپقان پوليتسەيدىڭ جارى ءۇيسىز ءجۇر

ءبىز ايگەرىممەن شىمكەنت قالاسىنىڭ ورتالىعىندا جولىقتىق. قازىر قازىعۇرت اۋدانى, قاراباستاۋ اۋىلىنداعى اتا-ەنەسىنىڭ قولىندا تۇراتىن ول وڭتۇستىك قازاقستان مەديتسينا اكادەمياسىنا ينتەرناتۋراعا قۇجات تاپسىرۋ ءۇشىن كەلگەن ەكەن. وزىمەن بىرگە 2 جاسار قىزى رايانانى دا ەرتە كەلىپتى.

– ول ۋاقىتتا جولداسىم مەيرامبەك ۋچاسكەلىك ينسپەكتور بولىپ قىزمەت ىستەپ جۇرگەن ەدى. ۇيلەنگەنىمىزگە ءبىر اي تولار-تولماستان جولداسىما وق ءتيىپ, قىزمەت بابىندا قايتىس بولدى. ءوزىم قىزىلوردا وبلىسىنىڭ تۋماسىمىن. پوليتسيا قىزمەتكەرى بولعان اكەم دە كەزىندە قىزمەت بابىندا قايتىس بولىپ, شىمكەنتتەگى ناعاشىلارىمنىڭ قولىندا ءوستىم, – دەپ ەسكە الدى وتكەن كۇندەرى جايلى.

ايگەرىمنىڭ ايتۋىنشا, 2016 جىلى مەيرامبەك پەن ايگەرىم قازىعۇرتتا قازاقتىڭ سالت-داستۇرىنە ساي ۇيلەنۋ تويىن وتكىزگەن سوڭ, احاج-عا نەكەگە وتىرۋ ءۇشىن تىركەلگەن. سول جىلى ساۋىردە كۇيەۋى مەيرامبەك المالى اۋداندىق ءىىب-نەن ءبىر اي ءىس-تاجىريبەدەن وتكەن سوڭ, ماۋسىمنىڭ تورتىندە ديپلومىن الا سالا جۇمىسقا كىرىسىپ كەتەدى.

– ول كەزدە م.وسپانوۆ اتىنداعى باتىس قازاقستان مەملەكەتتىك مەديتسينالىق ۋنيۆەرسيتەتىندە وقىپ جۇرگەن ەدىم. قۇجاتتارىمدى الماتىعا اۋىستىرۋ ماقساتىندا اقتوبەگە كەتتىم. وعان دەيىن اۋىلدا ۇيلەنۋ تويىمىزدى وتكىزگەن سوڭ, 12 شىلدە قازىعۇرت اۋدانىنىڭ حقو ارقىلى الماتى قالاسى, المالى اۋدانى احاج بولىمىنە ەلەكتروندى تۇردە تىركەلدىك. تولەم تۇبىرتەگى ساقتاۋلى, – دەيدى ايگەرىم.

ايگەرىم اقتىلەۋوۆا قىزى رايانامەن, شىمكەنت قالاسى, 2018 جىل

2016 جىلى 18 شىلدە كۇنى الماتى قالاسىندا لاڭكەس رۋسلان كۇلەكباەۆتىڭ قۇقىق قورعاۋ ورگانى وكىلدەرىنە جاساعان اتىشۋلى شابۋىلى كەزىندە بىرنەشە پوليتسيا قىزمەتكەرلەرىمەن بىرگە مەيرامبەك راحمەتۋللاەۆ تا وققا ۇشتى.

– كۇيەۋىم اۋرۋحانادا 14 كۇن جاتىپ, 1 تامىز كۇنى قايتىس بولدى. نەكە كۋالىگى 15 تامىز كۇنى دايىن بولۋى ءتيىس ەدى. المالى اۋداندىق احاج بولىمىندەگىلەر ءوتىنىش بەرۋشىلەر قاتار كەلمەسە, بىرلەسكەن ءوتىنىشتىڭ قابىلدانبايتىنىن ايتىپ, شىعارىپ سالدى. وسىلايشا نەكە قيۋ تۋرالى كۋالىك بەرىلمەگەن سوڭ, كوپتەگەن الەۋمەتتىك كومەكتەردى دەر كەزىندە الا الماي ءجۇرمىن. قايعىلى جاعدايدان سوڭ دەنساۋلىعىم ناشارلاپ, ءبىر جىل اكادەميالىق دەمالىس الدىم. ال بالام اۋرۋشاڭ بولىپ دۇنيەگە كەلدى. قازىعۇرت اۋداندىق سوتىنا شاعىمدانىپ ءجۇرىپ, قىزىمدى اكەسىنىڭ اتىنا جازدىرتىپ, تۋ تۋرالى كۋالىگىن الدىم, دەيدى ايگەرىم.

تۇراقتى تىركەۋدە كەمى 3 جىل بولۋ كەرەك

مارقۇم مەيرامبەك راحمەتۋللاەۆتىڭ وتباسىنا الماتى قالاسى اكىمدىگى 15 ميلليون تەڭگە, قايتىس بولۋ جاعدايى جانە جەرلەۋگە ارنالعان وتەماقىدان بولەك جينالعان قاراجات ەسەبىنەن 11 ميلليون 500 مىڭ تەڭگە كولەمىندە ءبىر رەتتىك ماتەريالدىق كومەك كورسەتكەن. بىراق  ايگەرىم الماتى قالالىق اكىمدىگىنىڭ بۇل كومەگى جەتكىلىكسىز ەكەنىن ايتادى. ول جارىنىڭ قىزمەتىن اتقارۋ كەزىندە وق تيگەنىن, سول وقيعا كەزىندە كوز جۇمعان وزگە اسكەري قىزمەتشىلەردىڭ وتباسىنا الەۋمەتتىك قامقورلىق رەتىندە الماتى اكىمدىگى تاراپىنان باسپانا بەرىلگەنىن كولدەنەڭ تارتادى.  راحمەتۋللاەۆتىڭ زايىبى الماتى قالاسىنان ءۇي الۋعا كومەك بەرۋ تۋرالى قالا اكىمدىگىنە بىرنەشە مارتە ءوتىنىش تە جولداعان. ال الماتى قالاسى تۇرعىن ءۇي جانە تۇرعىن ءۇي ينسپەكتسياسىنىڭ باسقارماسى ءوز كەزەگىندە ولاردىڭ بۇعان دەيىن تۇرعىن ۇيگە مۇقتاجدار ەسەبىندە تۇرماعانى سەبەپتى ءۇي الۋ تۋرالى تالابىنىڭ نەگىزسىز ەكەنىن العا تارتىپ وتىر.

«مۇقتاجدار ەسەبىنە قويۋ ءۇشىن الماتى قالاسىندا كەمىندە 3 جىل تۇراقتى تۇرۋى, سونىمەن بىرگە مەنشىك قۇقىعىندا تۇرعىن ءۇيى بولماۋى تالاپ ەتىلەدى», دەيدى باسقارما باسشىسىنىڭ ورىنباسارى ت. ءابىلوۆ.

ءبىز  ىشكى ىستەر مينيسترلىگىنە دە قايرىلدىق. ولار «قۇقىق قورعاۋ قىزمەتى تۋرالى» زاڭىنىڭ 68 بابىنا سايكەس قىزمەتكەر قىزمەتتىك مىندەتىن اتقارۋ كەزىندە قازا تاپقان جاعدايدا قازا تاپقان ادامنىڭ وتباسى زاڭنامادا بەلگىلەنگەن شارتتار مەن مەملەكەتتىك تۇرعىن ءۇي قورىنان باسپانا الۋعا قۇقىلى ەكەنىن ايتادى. ىشكى ىستەر ورگاندارىندا ارنايى ءۇي قورى بولماعاندىقتان مينيسترلىك ايگەرىم اقتىلەۋوۆاعا ءۇي ءبولۋ تۋرالى الماتى اكىمدىگىنە قولداۋ حات جولداعان. ايتسە دە «تۇرعىلىقتى مەكەن-جاي بويىنشا تۇراقتى تىركەۋدە كەمى 3 جىل بولۋ كەرەك جانە ۇيگە مۇقتاجدار ەسەبىندە تۇرۋى ءتيىس» دەگەن زاڭ بابى جەسىردىڭ الدىنان قايتا-قايتا اينالىپ شىعادى.

«ايگەرىمنىڭ سوتقا جۇگىنۋگە تولىق قۇقىعى بار»

ايگەرىم باسىنداعى كەپكە قاتىستى زاڭگەر ابزال قۇسپان تۇرعىلىقتى جەرى بويىنشا سوتقا جۇگىنۋگە تولىق قۇقىعى بار ەكەنىن ايتادى.

«ايگەرىمنىڭ جولداسى مەيرامبەكپەن زاڭدى نەكەگە تۇرعانىن دالەلدەۋ ءۇشىن قازاقستان رەسپۋبليكاسىنىڭ ازاماتتىق پروتسەستىك كودەكسىنىڭ 292-293 بابى بويىنشا سوتقا ارىز بەرە الادى. ارىزدا تويداعى فوتولاردى, ۆيدەو ماتەريالدى, كۋالەردى كورسەتۋگە بولادى», دەيدى زاڭگەر.

زاڭگەردىڭ سوزىنشە, الماتى قالاسى تۇرعىن ءۇي جانە تۇرعىن ءۇي ينسپەكتسياسىنىڭ جاۋابى دا تولىعىمەن زاڭدى.

– ولار ايگەرىم ءۇشىن قۇجات جيناۋ جۇمىستارىن ىستەپ بەرە المايدى عوي. اۋەلى زاڭدىق نەكەدە بولعاندىعىن انىقتاپ الۋ كەرەك. ال ايگەرىمگە ءتيىستى الەۋمەتتىك كومەكتەردى الۋى ءۇشىن ەڭ الدىمەن مەيرامبەك راحمەتۋللاەۆتىڭ نەكەلى جارى ەكەنىن, ودان بالاسىنىڭ بار ەكەنىن سوت ارقىلى انىقتاۋ كەرەك. وسىنى باسشىلىققا الا وتىرىپ, نەكەدە تۇرعاننان باستاپ باستارىندا ءۇي بولماعاندىعى تۋرالى انىقتامامەن اكىمدىككە جۇگىنە الادى. جاۋاپ بەرىلگەن جاعدايدا اكىمشىلىك جاۋابىن سوتقا بەرۋگە بولادى. بۇل ءىس ءبىر ايدا شەشىلە قالمايدى, اسىقپاي رەت-رەتىمەن ىسكە اسىرىلاتىن دۇنيە, - دەدى.

ارقاسۇيەر ازاماتى مەملەكەتتى قورعاۋ قىزمەتى جولىندا قاپيادا قازا تاپقان كەلىنشەكتىڭ بۇگىنگى كەيپى وسىنداي.

P.S: بەيبىت كۇننىڭ ساقشىسى بولعان الماتىلىق پوليتسەيلەردىڭ بەيمەزگىل قازاسى قوعامدا ۇلكەن ءدۇمپۋ تۋعىزعانى بەلگىلى. ال ەل تىنىشتىعى جولىندا ءومىرىن قۇرباندىققا شالعان قىزمەتكەرلەردىڭ سوڭىندا قايعى جۇتىپ قالعان جاقىندارىنا جۇرت بولىپ قولداۋ كورسەتۋ قوعامنىڭ بەلسەندىلىگىنە سىن. سوندىقتان باتىردىڭ جارىنا كومەك قولىن سوزىپ, قوعامدىق قولداۋ كورسەتۋ ءبىزدىڭ پارىزىمىز دەپ تۇسىنسەك, قانە...

ايا ءومىرتاي,

«ەگەمەن قازاقستان»

سۋرەتتى تۇسىرگەن ايگەرىم بەگىمبەت