«ەڭ اۋەلى, قازاقستانعا جانە قۇرمەتتى نۇرسۇلتان ءابىش ۇلىنا تۇركىتىلدەس مەملەكەتتەرى ىنتىماقتاستىق كەڭەسىندە ءساتتى توراعالىق ەتكەنى ءۇشىن ەرەكشە العىسىمدى ايتقىم كەلەدى. وسى ۋاقىت ارالىعىندا قازاقستان تۇركى كەڭەسىنىڭ ابىرويىن اسقاقتاتىپ, مۇشە-مەملەكەتتەر اراسىنداعى ماڭىزدى كەلىسىمدەردى جۇزەگە اسىرۋ بويىنشا اۋقىمدى جۇمىس اتقاردى. قازاقستان تاراپىنىڭ اتقارعان جۇمىسىنا العىسىمىز زور. س.جەەنبەكوۆ بيىلعى ءسامميتتىڭ ەرەكشە فورماتتا ءوتىپ وتىرعانىنا توقتالدى. وزبەكستان پرەزيدەنتى شافكات ميرزيەەۆ پەن ماجارستان پرەمەر-ءمينيسترى ۆيكتور ورباننىڭ ءىس-شاراعا كەلۋى كەڭەستىڭ اۋقىمى كەڭەيە تۇسكەنىن كورسەتەتىنىن ايتتى.
«وزبەكستان رەسپۋبليكاسىنىڭ تۇركى كەڭەسىنە مۇشە رەتىندە كىرۋگە تالپىنىسىن جوعارى باعالايمىن ءارى قولدايمىن. بۇل قادام تۇركى كەڭەسىنىڭ اۋقىمى كەڭەيىپ, حالىقارالىق ارەنادا ابىرويى ارتۋىنا قولايلى جاعداي جاسايدى. وزبەكستاننىڭ قوسىلۋى ۇيىمعا جاڭا سەرپىن بەرىپ, كوپتەگەن جاڭارتۋعا سەپ بولادى دەپ سەنەمىن. ەۋروپانىڭ ورتاسىندا ورنالاسقان ۆەنگريانىڭ شىققان ءتۇبى تۇركىلىكتى ۇمىتپاي, تامىرلاس ەلدەرەن دوستىق قارىم-قاتىناستى ساقتاپ, مادەنيەتى مەن ادەت-عۇرپىنا قۇرمەت ءبىلدىرۋى ءبىزدى قۋانتادى. بۇگىن ۆەنگريا تۇركى كەڭەسىنە باقىلاۋشى مەملەكەت مارتەبەسىنە يە بولادى», دەدى س.جەەنبەكوۆ.
قىرعىزستان پرەزيدەنتى ۇيىم اياسىنىڭ گەوگرافيالىق تۇرعىدا كەڭەيىپ, ىنتىماقتاستىقتىڭ نىعايا تۇسۋىنە سەپ بولاتىنىن اتاپ ءوتتى. سونداي-اق باۋىرلاس تۇركىمەنستان مەملەكەتىنە تۇركى كەڭەسىنىڭ ەسىگى ءاردايىم اشىق ەكەنىن مالىمدەدى.
اباي اسانكەلدى ۇلى,
"ەگەمەن قازاقستان"
