وسكەمەن قالاسىنىڭ اكىمى جاقسىلىق ومار بۇگىن شاھارداعى بىرنەشە ءبىلىم ورداسىن ارالاپ, ۇستازدار قاۋىمى مەن وقۋشىلاردى مەرەكەمەن قۇتتىقتادى. سونىڭ ءبىرى - ورالحان بوكەي اتىنداعى №44 مەكتەپ-ليتسەي. ءبىلىم ورداسىنىڭ ديرەكتورى تاڭاتقان تۇمەنباەۆتىڭ ايتۋىنشا, بۇگىندە وقۋ وشاعىندا 900-دەن استام وقۋشى ءبىلىم الادى. «بىلتىر مەكتەبىمىزدى 871 وقۋشى اياقتادى. سونىڭ 73 پايىزى, ياعني 641-ءى مەكتەپتى ۇزدىك ءبىتىردى. 15 وقۋشى «التىن بەلگى» يەگەرى اتاندى. بيىل 100 وقۋشى 1 سىنىپقا قابىلداندى. ولاردىڭ قادامدارىنا اق جول, ۇستازداردىڭ ەڭبەگىنە جەمىس تىلەيمىز», - دەيدى مەكتەپ ديرەكتورى.
وسكەمەننىڭ اكىمى ج.ومار شاھارداعى №8, 15 مەكتەپتەن كەيىن جوعارىدا اتالعان №44 مەكتەپ-ليتسەيدە بولىپ, ۇستازدار مەن اتا-انالاردى ءبىلىم كۇنىمەن قۇتتىقتاپ, جوعارى سىنىپ وقۋشىلارىمەن پىكىر الماستى. ء«وزىم 1997 جىلى مەكتەپ ءبىتىردىم. ول كەزدە ەلدىڭ جاعدايى ناشار ەدى. تاڭەرتەڭ مەكتەپكە ەرتە كەپ وتىن جاعاتىنبىز. قىزدار ەدەن جۋعا كومەكتەسەتىن. جاقسى مۇعالىم, جاقسى سپورت زالى, جاقسى اسحانا تۇگىلى جارىقتىڭ وزىنە زار بولاتىنبىز. مەكتەپتە ەشقانداي مادەني شارا وتپەيتىن. سىنىپ سۋىق, قالىڭ كيىممەن وتىراتىنبىز. جاز بويى كانيكۋلعا بارماي, مەكتەپتى جوندەۋ جۇمىستارىنا قاتىساتىنبىز. مەن وتكەنگە وكپە ايتىپ وتىرعان جوقپىن. سىزدەر سونى سالىستىرىپ قاراسا دەگەن ويمەن ايتىپ وتىرمىن. قيىندىق تا ادامدى شىڭدايدى عوي. قيىنشىلىق بولدى. مۇمكىن قارنىمىز اش بولعان شىعار. كيىمىمىز جىرتىق بولعان شىعار. ءبىلىم الۋعا تولىق مۇمكىندىگىمىز بولماعان شىعار. بىراق ونىڭ دا وزىندىك جاقسىلىعى بولدى دەپ ويلايمىن. بۇگىن مىنە ەلباسىمىزدىڭ ساليقالى ساياساتىنىڭ, مەملەكەت قامقورلىعىنىڭ ارقاسىندا سىزدەرگە ءبىلىم الۋعا بارلىق جاعداي جاسالعان. ۇكىمەت مەكتەپتەرگە ميلليونداعان قارجى جۇمساسا, مۇعالىمدەر سىزدەردى وقىتۋ ءۇشىن ميللياردتتاعان نەرۆ تالشىقتارىن جۇمسايدى. سول ۇستازدارىڭىزدىڭ ەڭبەگىن اقتاڭىزدار», - دەدى قالا اكىمى.
رەتى كەلگەندە ايتا كەتەيىك, سوڭعى 3 جىلدا وبلىستىڭ 17 مىڭ مۇعالىمى كۋرستىق دايارلىقتان ءوتىپتى. بيىل ءوڭىر مەكتەپتەرىنىڭ وقۋشىلارىنا 1,5 ميلليون دانا جاڭا وقۋلىقتار ساتىپ الىنىپتى.
ەرەكشە اتاپ وتەرلىگى, جاڭا وقۋ جىلىندا «رۋحاني جاڭعىرۋ» باعدارلاماسىنىڭ اياسىنداعى «مەنىڭ مەكتەبىم» باعدارلاماسى ارقىلى شىعىس قازاقستانداعى 277 تولىق كومپلەكتىلى مەكتەپتە فيزيكا, حيميا, بيولوگيا جانە روبوت تەحنيكا كابينەتتەرى مەن ءىت-سىنىپتار اشىلدى.
ازامات قاسىم,
«ەگەمەن قازاقستان»
وسكەمەن
