ءبىلىم بەرۋ سالاسىنداعى جاڭالىقتار تۋرالى استانا قالاسىنىڭ ءبىلىم باسقارماسىنىڭ باسشىسى انۋار جانعوزين تامىز كونفەرەنتسياسىندا مالىمدەدى.
«جاڭا وقۋ جىلىندا اتا-انالاردان تۇسكەن يدەيانى قولداي وتىرىپ, استانادا جاڭاشىل سىنىپتاردى اشۋ كوزدەلىپ وتىر. جوبا مەملەكەتتىك ءتىلدى دامىتۋعا باعىتتالعان. نەگىزگى يدەياسى ورىس تىلىندە ءبىلىم الاتىن سىنىپتاردى كەزەڭ-كەزەڭمەن مەملەكەتتىك تىلدەگى سىنىپتارعا اينالدىرۋ. ءىس جۇزىندە ءبىرىنشى سىنىپقا كەلەتىن بالالار ساباق بارىسىندا اقپاراتتى باستاپقى قادامدا 70 پايىزىن ورىس تىلىندە, ال 30 پايىزىن قازاق تىلىندە وقيتىن بولسا, 5-سىنىپقا بارعاندا وقىتۋ ءتىلى تولىعىمەن مەملەكەتتىك تىلگە كوشىرىلەتىن بولادى», دەدى انۋار جانعوزين.
مۇنداي جاڭاشىل سىنىپتار استانا اكىمىنىڭ تاپسىرماسىنىڭ نەگىزىندە №60 مەكتەپ-ليتسەيىندە اشىلادى. سونداي-اق, قىزدارعا ارنالعان ء«بىلىم يننوۆاتسيا» ليتسەيىنە دە جاڭا جۇيە ەنگىزىلەتىن بولادى.
«جالپى, استانا قالاسى ءبىرىنشى بولىپ بارلىق پيلوتتىق جوبالارعا قاتىسادى. ءبىزدىڭ ۇستازدار ءاربىر وزگەرىستەر مەن جاڭاشىلدىققا تەز بەيىمدەلەدى. وسى جىلى ەلوردالىق ءبىلىم وردالارىندا جۇزەگە اسىرىلاتىن بىرنەشە پيلوتتىق جوبالار بار. مىسالى, ەلەكتروندىق وقۋلىقتاردى پايدالانۋ ەكى مەكتەپكە ەنگىزىلەدى. استانانىڭ 5 مەكتەبى مەن 3 كوللەدجى پيلوتتىق رەيجيمدە لاتىن الىپبيىنە كوشىرىلەدى», دەدى ول.
