ۇزىندىققا سەكىرۋشى بوب بيمون مەحيكوعا باستى فاۆوريتتەردىڭ ءبىرى رەتىندە اتاندى. سەبەبى وليمپيادا قارساڭىندا ءوزى قاتىسقان 23 جارىستىڭ 22-سىندە ول جەڭىمپاز اتانعان ەدى. تىپتەن, سول باسەكەلەردىڭ بىرىندە الەمدىك رەكوردتى جاڭارتقانىنا ءدۇيىم جۇرت كۋا. الايدا بۇل قاتارداعى كوپ تۋرنيرلەردىڭ ءبىرى بولعاندىقتان حالىقارالىق جەڭىل اتلەتيكا فەدەراتسياسى تاراپىنان بۇل كورسەتكىش رەسمي تۇردە تىركەلگەن جوق.
مەحيكو وليمپياداسى بيمون ءۇشىن ءساتسىز باستالدى. ءاۋ باستا ەكى رەت جولاقتى باسىپ كەتكەن ول جاعدايىن قيىنداتىپ الدى. دەسەك تە ءۇشىنشى مۇمكىندىگىن ءساتتى پايدالانىپ, 8 مەتر 19 سانتيمەترلىك كورسەتكىشپەن فينالعا شىقتى. اقتىق سىندا اقش سپورتشىسى ايدى اسپانعا شىعارىپ, 8 مەتر 90 سانتيمەترگە ءبىر-اق سەكىردى. ستاديون تولى جانكۇيەرلەر ورىندارىنان تىك تۇرىپ, كەدەيشىلىك پەن جوقشىلىقتىڭ تاۋقىمەتىن كوپ تارتقان ساڭلاققا قوشەمەت كورسەتتى. ال كوزدەرى شاراسىنان شىققان تورەشىلەر جاڭا رەكورد قويىلعانىن جاريالاۋعا اسىقپادى. بۇل كورسەتكىشتى ەسەپكە الماۋدىڭ جولىن ىزدەگەن ولار ءار نارسەگە كيلىكتى. بىراق ەرەجەگە قايشى كەلەتىن تۇك تاپپاعاننان سوڭ اراعا جارتى ساعات سالىپ, امەريكالىق رالف بوستون مەن كسرو-نىڭ مىقتىسى يگور تەر-وۆانەسياننىڭ الەمدىك رەكوردىن 22 جاستاعى بوب بيمون باقانداي 55 سانتيمەترگە جاڭارتقانىن جالپاق جۇرتقا جاريا ەتتى. سول كەزدە چەمپيوننىڭ ءدال قاسىندا تۇرعان تەر-وۆانەسياننىڭ «مىنا جىگىتتىڭ ناتيجەسىنىڭ قاسىندا بىزدىكى كوشەدە جۇرگەن ءبىر بالانىڭ جاي ەرمەگى سەكىلدى بولىپ قالدى عوي» دەپ باس شايقاعانى بار.
كەيىننەن بيمون تالاي بايراقتى باسەكەلەرگە قاتىسقانىمەن مەحيكوداعى كورسەتكىشىنە ماڭايلاي دا العان جوق. وعان سەبەپ, اياق سىڭىرلەرىنىڭ سوزىلۋى. بۇل رەكورد مۇرتى بۇزىلماعان كۇيى 33 جىل بويى تۇردى. تەك 1991 جىلى توكيودا وتكەن الەم چەمپيوناتىندا بۇل كورسەتكىشتى اقش-تىڭ تاعى ءبىر اتاقتى جەڭىل اتلەتى مايكل پاۋەلل جاڭارتتى. جاپونيانىڭ استاناسىندا ول 8 مەتر 95 سانتيمەترگە سەكىرگەن ەدى. سودان بەرى دە شيرەك عاسىردان اسا ۋاقىت ءوتتى. نەبىر دۇلدۇلدەر قانشا جانتالاسىپ, ارەكەت ەتكەنىمەن پاۋەلدىڭ وسىدان 27 جىل بۇرىنعى رەكوردىن جاڭارتا الماي ءجۇر...
عالىم سۇلەيمەن,
«ەگەمەن قازاقستان»
