ەلىمىزدە باستاۋ العان ء«بىر ەل – ءبىر كىتاپ» اكتسياسى كوپشىلىكتىڭ رۋحانياتقا دەگەن قىزىعۋشىلىعىن وياتىپ, ادەبيەت الەمىنە جەتەلەي تۇسەتىنى ءسوزسىز. بيىلعى جىلى شاكارىم قۇدايبەردى ۇلىنىڭ شىعارمالارى, باۋىرجان مومىش ۇلىنىڭ «ۇشقان ۇيا» جانە نەمات كەلىمبەتوۆتىڭ ء«ۇمىت ۇزگىم كەلمەيدى» اتتى كىتاپتارى وقۋعا تاڭدالعان بولاتىن. وسى ورايدا اتالعان اكتسيا اياسىندا جامبىل وبلىستىق زاعيپ جانە كوزى ناشار كورەتىن ازاماتتار كىتاپحاناسىنىڭ ۇيىمداستىرۋىمەن «ۇلت رۋحانياتىنىڭ ءۇش دىڭگەگى» اتتى ادەبي-سازدى كەش ءوتتى.
شارا بارىسىندا كىتاپحاناشىلار قارلىعاش بيتورەەۆا مەن مايا ازىمقۇلوۆا اتالعان قالامگەرلەردىڭ ءومىر جولىنا توقتالىپ, كىتاپتاردىڭ قازاق ادەبيەتى ءۇشىن ماڭىزدىلىعىن ايتتى. سونىمەن قاتار ءۇش قالامگەردىڭ شىعارمالارىنداعى ستيلدىك ەرەكشەلىكتەر دە سارالاندى.
بۇدان كەيىن اتالعان كىتاپحانانىڭ ساعىمكۇل شادىرقۇلوۆا, بالتاش ەسەپباەۆ سىندى تۇراقتى وقىرماندارى شاكارىمنىڭ «بۇل ءان بۇرىنعى اننەن وزگەرەك», «انادان العاش تۋعاندا» اندەرىن ناقىشىنا كەلتىرە ورىنداپ, كوپشىلىكتىڭ كوڭىلىن تەربەتتى. سونداي-اق انۋاربەك وتەلوۆ, ەربول بەگىموۆ, ءپىرمات ماحمۇت اباي قۇنانباي ۇلىنىڭ «كوزىمنىڭ قاراسى», «جەلسىز تۇندە جارىق اي» اندەرىن تىڭدارماندارعا تارتۋ ەتتى. ءوز كەزەگىندە تاراز قالاسىنداعى يۋ.گاگارين اتىنداعى №29 ورتا مەكتەپتىڭ وقۋشىسى مەيىرجان قۋانىشباەۆ پەن №1 مەكتەپ-گيمنازيانىڭ وقۋشىسى جالعاس مىقتىبەك شاكارىم شىعارمالارىمەن قاتار, اباي جانە مۇقاعالي ماقاتاەۆ ولەڭدەرىن جاتقا وقىپ بەردى.
ايتا كەتەرلىگى, ادەبيەتسۇيەر قاۋىمعا شارا بارىسىندا بىرقاتار كوركەم شىعارمالار جيناعى تەگىن تاراتىلدى. ۇلت رۋحانياتىن دارىپتەۋگە, قازاق قالامگەرلەرىنىڭ شىعارماشىلىعىن ناسيحاتتاۋ ماقساتىندا ۇيىمداستىرىلعان شارا جوعارى دەڭگەيدە ءوتتى. جيىن سوڭىندا اتالعان كىتاپحانانىڭ ادىسكەرى فاريدا مەتەرقۇلوۆا ءسوز الىپ, كەش قوناقتارى مەن كىتاپحانانىڭ تۇراقتى وقىرماندارىنا العىس ءبىلدىردى.
حاميت ەسامان,
«ەگەمەن قازاقستان»
جامبىل وبلىسى
