كاسىپكەرلەر ۇيىندە وبلىستىق «وزىڭە سەنە باستا» اتتى مۇمكىندىگى شەكتەۋلى كاسىپكەرلەردىڭ ونىمدەرىنەن وبلىستىق كورمە-بايقاۋى ءوتتى. شاراعا ءارتۇرلى سالادا كاسىپكەرلىكپەن اينالىسىپ جۇرگەن بارلىعى 50 ادام قاتىستى.
بايقاۋ بارىسىندا قاتىسۋشىلاردىڭ اعاش, توقىما, سۋرەت, تاعام مەن كوپتەگەن باسقا دا ونىمدەرىنەن كورمە ۇيىمداستىرىلدى. وبلىس اكىمى قىرىمبەك كوشەرباەۆ شاراعا قاتىسىپ, بايقاۋ جەڭىمپازدارى مەن قاتىسۋشىلارىن ماراپاتتادى.
«جۇمىسپەن قامتۋ كەز كەلگەن مەملەكەت ءۇشىن قاشاندا وزەكتى ماسەلەلەردىڭ ءبىرى بولىپ تابىلادى. ال ازاماتتاردى جۇمىسپەن قامتۋدىڭ بالاماسى ول - كاسىپكەرلىك. بۇگىن مۇمكىندىگى شەكتەۋلى كاسىپكەرلەردى قولداۋ ءارى ولاردىڭ دامۋىنا جول اشۋ ماقساتىندا «وزىڭە سەنە باستا» كورمە-بايقاۋىن وتكىزىپ وتىرمىز.قاتىسۋشىلار - تاعدىر تاۋقىمەتىنە قاراماستان, قوعامدا ءوز ورنىن تاۋىپ, ءوزىن جۇمىسپەن قامتىپ, ءتىپتى وزگەلەرگە جۇمىس تاۋىپ بەرگەن ازاماتتار. ولار كوپكە ۇلگى بولۋعا لايىقتى جانە قوعامدى ماسىلدىق كوزقاراستان ارىلتۋعا سەپتىگىن تيگىزەدى»,- دەدى ايماق باسشىسى.
بايقاۋ جەڭىمپازدارىن وبلىستىق ءماسليحات دەپۋتاتتارى, «نۇر وتان» پارتياسى وبلىستىق فيليالىنىڭ وكىلدەرى, كاسىپكەرلەر پالاتاسىنىڭ مۇشەلەرى, «دامۋ» قورى مەن الەۋمەتتىك قورعاۋ ۇيىمى قىزمەتكەرلەرىنەن قۇرىلعان كوميسسيا انىقتادى.
سونىمەن, بايقاۋدىڭ جەڭىمپازى «كادەسىي جاساۋ جوباسىمەن جاڭاقورعان اۋدانىنان قاتىسقان قاسيەت ورال وبلىس اكىمىنىڭ العىس حاتى مەن 1 ميلليون تەڭگەگە يە بولدى. ەكىنشى ورىن يەگەرى, «اياقكيىم جاساۋ» جوباسىمەن قارماقشى اۋدانىنان قاتىسقان ەرلىبەك جارماحانوۆ 700 مىڭ تەڭگەمەن, ءۇشىنشى ورىن يەگەرى «كارىز جۇيەلەرى ءونىمى, تەمىر جانە سۋرەت بۇيىمدارى» جوباسىمەن قىزىلوردا قالاسىنان قاتىسقان اسلان ەرتوحاەۆ 500 مىڭ تەڭگە سىياقىمەن ماراپاتتالدى. سونىمەن قاتار, بايقاۋدىڭ بارلىق 50 قاتىسۋشىسى دا گراموتا مەن تۇرمىستىق تەحنيكالىق تاۋارلار سەرتيفيكاتىنا يە بولدى.
«بىرنەشە جىل بۇرىن جاقىندارىمنىڭ كومەگىمەن كادەسىي جاساۋمەن اينالىسا باستادىم جانە كاسىپكەرلىكتى قولداۋعا باعىتتالعان ءتۇرلى مەملەكەتتىك باعدارلامالاردا ۇزدىك ناتيجەلەرگە قول جەتكىزدىم. بايقاۋدا جەڭىمپاز اتانعانىما وتە قۋانىشتىمىن, ۇيىمداستىرۋشىلارعا وسىنداي بايقاۋ وتكىزگەنى ءۇشىن جانە قولداۋ كورسەتكەن جاندارعا العىس بىلدىرەمىن. مۇنداي شارالار ءوز كاسىپتەرىن دامىتۋ ءۇشىن وتە قاجەت دەپ ەسەپتەيمىن», - دەيدى ميلليوننىڭ يەگەرى قاسيەت ورال.
اتاپ وتەيىك, قازىرگى تاڭدا وبلىستا مۇمكىندىگى شەكتەۋلى 29353 ادام تىركەلگەن. ونىڭ ىشىندە I توپتاعى مۇگەدەكتەردىڭ سانى – 2827, II توپتاعى – 11145, III توپتاعى – 10526 بولسا, ال 18 جاسقا دەيىنگى بالالاردىڭ سانى – 4855-ءتى قۇرايدى.
2018 جىلدىڭ ءبىرىنشى جارتىجىلدىعىندا جۇمىسپەن قامتۋ ورتالىعى ارقىلى 376 مۇمكىندىگى شەكتەۋلى ادامدى جالپى جۇمىس ورىندارىمەن, ونىڭ ىشىندە 148 مۇگەدەك جاندى تۇراقتى جۇمىس ورىندارىمەن قامتىپ وتىر. 2012 جىلدان باستاپ وڭىرىمىزدە «ينۆاتاكسي» قىزمەتى ۇيىمداستىرىلعان. باستاپقىدا ينۆاتاكسي تەك 2 بولسا, بۇگىنگى كۇنى ولاردىڭ سانى 18-گە جەتتى. ارباداعى ازاماتتاردى تاسىمالداۋعا ارنالعان اپپارەلى بار ارنايى باسپالداقپەن جابدىقتالعان 112 اۆتوبۋس قىزمەت كورسەتۋدە. سونىمەن قاتار, مەملەكەتتىك باعدارلامالار اياسىندا كاسىپكەرلىكپەن اينالىسۋدى قالاعان مۇمكىندىگى شەكتەۋلى قىزىلوردالىقتار ءار سالادا ءوز ىستەرىن كەدەرگىسىز باستاۋ ءۇشىن جان-جاقتى كومەك الا الادى.
