مەملەكەت باسشىسى جۇرتشىلىق الدىندا سويلەگەن سوزىندە بارشا قازاقستاندىقتى قۇربان ايت مەرەكەسىمەن قۇتتىقتاپ, بۇل مەيرامنىڭ بەيبىتشىلىك پەن ادال نيەتكە نەگىزدەلگەن سيمۆولدىق ءمانىنىڭ زور ەكەنىن جانە يسلامنىڭ مىزعىماس رۋحاني قۇندىلىقتارىن ايقىندايتىنىن, سونداي-اق مەيىرىمدىلىك پەن ىزگىلىكتىڭ, جاقسىلىقتىڭ جارشىسى بولىپ سانالاتىنىن اتاپ ءوتتى.
«بۇكىل مۇسىلماندار, حالقىمىز نامازىن وقىپ, پارىزىن ورىنداۋ ماقساتىندا مەنىڭ جارلىعىممەن بۇل كۇن مەيرام دەپ جاريالانعان. حالقىمىز وسى كۇندى ەرەكشە اتاپ ءوتىپ, ناماز وقىپ, قۇلشىلىق جاساپ, اللادان تىلەك تىلەگەن. بۇل ‒ اللانىڭ كورسەتكەن جولى, پايعامباردىڭ ءىزى. قازاقستاننىڭ بارشا مۇسىلمان قاۋىمىن وسى مەرەكەمەن قۇتتىقتايمىن! سىزدەردىڭ بارلىق دۇعا-تىلەكتەرىڭىزدى اللا قابىل ەتسىن!» دەدى ن.نازارباەۆ.
قازاقستان پرەزيدەنتى قۇربان ايتتىڭ ءمان-ماڭىزى تەك ناماز وقۋمەن جانە قۇرباندىق شالۋمەن شەكتەلمەيتىنىن ايتتى, سونداي-اق جاعدايى جوق وتباسىلارعا, جەتىمدەرگە, قارتتار مەن بارلىق مۇقتاج جاندارعا قايىرىمدىلىق تانىتىپ, كومەك كورسەتۋگە شاقىردى.
«بۇل مەرەكە ەلدىڭ بىرلىگى مەن بولاشاعىن نىعايتىپ, يمان, قاناعات, قايىرىمدىلىق ماعىناسىن بىلدىرەدى. وسى كۇندەرى اعايىن-تۋىسقان قاۋىشىپ, ءبىر-ءبىرىنىڭ ۇيىندە ءدام تاتىپ, كەمتارلارعا كومەكتەسىپ, جاقسىلىق جاسايدى. قازىرگى تاڭدا ەلىمىزدىڭ ازاماتتارى «رۋحاني جاڭعىرۋ» باعدارلاماسىمەن ءوزىنىڭ تۋعان جەرىنە, اۋىلىنا جاقسىلىق جاساپ, اۋرۋحانا, بالاباقشا, مەكتەپ سالىپ بەرىپ جاتىر. مۇنداي قايىرىمدىلىق تا ساۋاپتى بولادى دەپ ەسەپتەيمىز. وسىنداي يگى ىستەردى جالعاستىرا بەرۋ كەرەك», دەدى ەلباسى.
مەملەكەت باسشىسى بۇگىندە قازاقستاندا دىندەردىڭ وركەندەۋى ءۇشىن جانە ولاردىڭ كونفەسسيالىق ۇستانىمدارىنا قاراماستان, ءدىني عۇرىپتارىنىڭ ورىندالۋىنا بارلىق جاعداي جاسالىپ وتىرعانىن ايتتى.
«جۋىردا استانادا جاھاندىق جانە كونفەسسياارالىق ديالوگ پەن قارىم-قاتىناستاردىڭ ودان ءارى دامۋىنا سەرپىن بەرەتىن الەمدىك جانە ءداستۇرلى دىندەر كوشباسشىلارىنىڭ VI سەزى وتەدى», دەدى ن.نازارباەۆ.
قازاقستان پرەزيدەنتى قۇربان ايتتىڭ تەرەڭ ءمان-مازمۇنى قوناقجايلىلىقتى, دوستىق پەن بىرلىكتى قاستەرلەيتىن حالقىمىزدىڭ رۋحاني قۇندىلىقتارىمەن جانە مادەنيەتىمەن ۇندەسەتىنىن اتاپ ءوتتى.
«بارشاڭىزعا زور دەنساۋلىق, ءاربىر وتباسىنا باق-بەرەكە تىلەيمىن! قازاقستانىمىز وركەندەپ, ەلىمىزدە ءاردايىم دوستىق, تىنىشتىق پەن تۇراقتىلىق سالتانات قۇرا بەرسىن!» دەدى مەملەكەت باسشىسى.
سوڭىندا نۇرسۇلتان نازارباەۆ وتانداستارىمىزدى قۇربان ايتپەن تاعى دا قۇتتىقتاپ, قازاقستان حالقىنا باق-بەرەكە تىلەدى.
اباي اسانكەلدى ۇلى,
«ەگەمەن قازاقستان»
