قر دەنساۋلىق ساقتاۋ مينيسترلىگى فارماتسيا كوميتەتىنىڭ ءتورايىمى ليۋدميلا بيۋرابەكوۆانىڭ ايتۋىنشا,تەگىن ءدارى-دارمەك ءۇشىن ساتىپ الىناتىن دارىلەر مەن مەديتسينالىق بۇيىمداردىڭ ءتىزىمى 1144 جولدان تۇرادى. وعان دارىلەردىڭ 829 اتاۋى مەن 315 مەديتسينالىق بۇيىم كىرگەن.
«بيىل 45 اۋرۋ بويىنشا ديسپانسەرلىك ەسەپتە تۇرعان ناۋقاستاردى ەمحانادا ەمدەۋ ءۇشىن ءدارى-دارمەكتەردىڭ 550-دەن استام اتاۋى بەكىتىلدى. وتكەن جىلى ءدال وسىنداي ماقساتتا 482 اتاۋمەن ءدارى-دارمەكتەر ساتىپ الىنعان», دەدى ليۋدميلا بيۋرابەكوۆا.
«سك-فارماتسيا» جشس باسقارماسى توراعاسىنىڭ مىندەتىن اتقارۋشى بەرىك ءشارىپ ساتىپ الۋ پروتسەدۋراسى بارلىق پرەپاراتتار بىرىڭعاي ديستريبيۋتوردىڭ قويماسىنا ۇستىمىزدەگى جىلدىڭ سوڭىنا دەيىن ءتۇسۋ ءۇشىن قاجەت ەكەنىن ايتادى.
«تەندەرلىك پروتسەدۋرالار ەكى ايداي ۋاقىتتى الادى. تەندەردىڭ ناتيجەلەرى بويىنشا كەلىسىم شارتتار جاسالىپ, ءدارى-دارمەكتەر قويمالارىمىزعا جىلدىڭ اياعىندا تۇسەتىن بولادى», دەدى ب. ءشارىپ.
بىرىڭعاي ديستريبيۋتەردىڭ ايتۋىنشا, پرەپاراتتاردى الۋعا جىبەرىلگەن وتىنىشتەر بىردەن بەكىتىلمەيدى. اۋرۋحانالار مەن ەمحانالار «سك-فارماتسيامەن» كەلىسىم جاساۋ كەزىندە وتىنىشتەرگە تاعى ءبىر مارتە تۇزەتۋلەر ەنگىزە الادى.
«سك-فارماتسيا» جشس باسشىسى بيىلعى جىلى ءدارى-دارمەك پەن مەديتسينالىق باعىتتاعى بۇيىمداردى ساتىپ الۋ العاش رەت ەلەكتروندىق فورماتتا جۇرگىزىلەتىنىن ايتتى.
