ەلىمىزگە تانىمال شاكيزادا بايباتجانوۆا, قۇرمان شويىنباەۆ, ساۋلە جەلدىباەۆا, مارات ءايتىموۆ, نۇرعالي تۇرلىبەكوۆ, حاديشا سەيىتوۆا, جۇبانىش جەكسەن ۇلى, گۇلجازيرا قايىربەكوۆا, توقتار سەرىكوۆ, اسقار جۇنىسبەكوۆ, «جىگىتتەر» كۆارتەتى, «سارىن» توبى سىندى كوپتەگەن ونەر يەلەرى 1992 جىلدان بەرى داستۇرگە اينالعان وسى بايقاۋدان قانات قاققانىن ايتا كەتەلىك. ءار جىلعى بايقاۋدىڭ وزىندىك ەرەكشەلىگى, جاڭالىعى بار. مىسالى, بيىلعى جەتىستىگى ۇلى كومپوزيتوردىڭ ورىندالماي جۇرگەن 15-تەن اسا ءانى جارىققا شىعارىلىپ, ارنايى اسپاپتاردىڭ سۇيەمەلدەۋىمەن تىڭدارمانعا جول تارتتى. ولاردىڭ قاتارىندا «كەل, بۋرابايعا», «بايقوڭىر», «كەلىن كەلدى», «كوككولدەگى كەشتەر-اي», «ەگىز ماقتا», «عاشىق كۇندەر» جانە اباي قۇنانباەۆتىڭ سوزىنە جازىلعان «تىڭدا مەنى, دوستارىم» سىندى اندەر بار.
بيىل 26-شى رەت وتكىزىلگەن بايقاۋ ونەرسۇيەر قاۋىمعا جاڭا ەسىمدەردى ايگىلەدى. الدىمەن تۇركىستان وبلىسىنىڭ مادەنيەت جانە تىلدەردى دامىتۋ باسقارماسى, وبلىستىق مادەنيەت جانە حالىق شىعارماشىلىعى ورتالىعىنىڭ ۇيىمداستىرۋىمەن وتكەن ءان بايقاۋى ء«شامشى الەمى» گۇلزارىنداعى كومپوزيتور ەسكەرتكىشىنە گۇل شوقتارىن قويۋ راسىمىنەن باستاۋ الىپ, ش.قالداياقوۆ اتىنداعى وبلىستىق فيلارمونيادا جالعاسىن تاپتى. ماقساتى – ءشامشى قالداياقوۆتىڭ شىعارمالارىن دارىپتەۋ, حالىق اراسىندا ءان ونەرىن دامىتۋ, قازاق اندەرىن ورىنداۋشىلار اراسىنان جاس تالانت يەلەرىن انىقتاپ, كاسىبي باعدار بەرۋ, جەكە شىعارماشىل تۇلعالاردىڭ قالىپتاسۋىنا ىقپال ەتۋ, انشىلەردىڭ ورىنداۋ شەبەرلىكتەرىن ارتتىرا وتىرىپ, ولارعا قولداۋ كورسەتۋ جانە وتانسۇيگىشتىككە باۋلۋ, ۇلتتىق رۋحتا تاربيەلەۋ بولاتىن ءداستۇرلى ونەر دوداسىنىڭ اۋدان, قالادا وتكەن ءبىرىنشى كەزەڭىنە 200-گە جۋىق ۇمىتكەر ءوتىنىش بىلدىرگەن. ونىڭ ىشىنەن 21 ۇمىتكەر فينالعا كەزەڭگە جولداما الدى. ونەر بايگەسىنە 15 - 29 جاس ارالىعىنداعى ۇمىتكەرلەر قاتىستى. ال ۇمىتكەرلەردىڭ تالانتىن ءشامشىتانۋشى, بەلگىلى كومپوزيتور قالدىبەك قۇرمانالى توراعالىق ەتكەن قازىلار القاسى تارازىلادى.
كوپشىلىككە كەرەمەت اسەر سىيلاعان, ءشəمشى قالداياقوۆتىڭ تۋعان كۇنىنە وراي ۇيىمداستىرىلعان «مەنىڭ قازاقستانىم» ءان بايقاۋىنىڭ جەڭىمپازدارى انىقتالىپ, الدىمەن وبلىس اكىمىنىڭ ارنايى جۇلدەسى بەرىلدى. ايتۋلى ماراپات شاردارانىڭ جاس تالانتى گۇلمارال جاقىپبايعا تاپسىرىلدى. جۇلدەلى 3-ورىنعا ارىس قالاسىنىڭ تۋماسى ەردوس سەيىلحان لايىق دەپ تانىلدى. ەكىنشى ورىنعا جەتىسايدىڭ ۇكىلەگەن ءۇمىتىن ارقالاي كەلگەن ارۋ ماليكا قالدىباي يە بولدى. ءبىرىنشى ورىندى كەلەس اۋدانىنىڭ ءانشىسى بەكسۇلتان وتاربەكوۆ ەنشىلەدى. ال باستى سىي – باس جۇلدەنى تۇلكىباس اۋدانىنىڭ تالانتى – باعدات نىسانباي جەڭىپ الدى. جەڭىمپازعا 500 مىڭ تەڭگە قارجىلاي سىي-تارالعى تاپسىرىلدى. ماراپاتتاۋ ءراسىمى, وسى ونەر دوداسىنان تۇلەگەن جانە وزگە دە جەرگىلىكتى ونەر جۇلدىزدارىنىڭ قاتىسۋىمەن قورىتىندى-كونتسەرتكە ۇلاستى.
عالىمجان ەلشىباي,
«ەگەمەن قازاقستان»
تۇركىستان وبلىسى
