ءوڭىردىڭ جىلىتۋ ماۋسىمىنا دايىندىعىن وبلىس باسشىسى التاي كولگىنوۆ جەكە باقىلاۋىنا العان. بۇگىنگى جاعداي بويىنشا 2018-2019 جىلىتۋ ماۋسىمىنا 388 دەنساۋلىق ساقتاۋ نىسانىنىڭ 367-ءسى, 638 ءبىلىم بەرۋ نىسانىنىڭ 601-ءى, 387 مادەني عيماراتتىڭ 373-ءى تولىق دايىن بولىپتى. ورال قالاسىنداعى كوپقاباتتى تۇرعىن ۇيلەردىڭ 50 پايىزدان استامى گيدراۆليكالىق سىناقتان ويداعىداي وتكەن. بۇل ولاردىڭ جاڭا ماۋسىمعا تولىق دايىن ەكەندىگىن كورسەتەدى. جاقىن كۇندەرى جىلۋ قۇبىرلارىن قىسىممەن سىناۋ اقساي قالاسىندا دا جۇرگىزىلمەك.
– وبلىس بويىنشا 40 شاقىرىمدىق جىلۋ جەلىلەرىن جوندەپ جاڭعىرتۋ جوسپارلانعان ەدى. ونىڭ 11,5 شاقىرىمى ورال قالاسىنا, 28,8 كيلومەترى اقساي قالاسىنا تيەسىلى. سونىڭ ىشىندە «نۇرلى جول» باعدارلاماسى بويىنشا جالپى كولەمى 32 شاقىرىمنان استام جەلىنى قايتا جاڭعىرتىپ جاتىرمىز. بۇل ءۇشىن 2 ملرد تەڭگەدەي قارجى كوزدەلگەن. بۇگىنگى تاڭدا وسى باعدارلاما اياسىندا ورال قالاسىندا 2 كم, اقسايدا 15,8 كم جىلۋ قۇبىرلارى جەلىسى جاڭعىرتىلدى. وسىناۋ كەشەندى جۇمىستاردىڭ ناتيجەسىندە وبلىس ورتالىعىنداعى جىلۋ جەلىلەرىنىڭ توزۋى 51,6%-عا ازايدى. ال اقساي قالاسىنداعى توزىعى جەتكەن جەلىلەر 43%-دان 7%-عا ءبىر-اق ازايدى, – دەيدى باتىس قازاقستان وبلىستىق ەنەرگەتيكا جانە تۇكش باسقارماسىنىڭ باسشىسى رۇستەم زاكارين.
«جايىقجىلۋقۋات» اق جەتەكشىسى مۇرات بايمەنوۆتىڭ ايتۋىنشا, جەرگىلىكتى جىلۋ-قۋات ورتالىعىنىڭ (تەتس) قازاندىقتارى مەن جىلۋ قۇبىرلارىنىڭ 72 پايىزىنا جوندەۋ جۇرگىزىلىپ, 6 شاقىرىمعا جۋىق جەلى جاڭعىرتىلعان.
– قازىرگى تاڭدا ءبىزدىڭ مەكەمە قۇزىرىندا 20 قازاندىق بار, ولاردان شىعاتىن جىلۋ جەلىلەرىنىڭ ۇزىندىعى – 21,88 كم. بۇل قازاندىقتاردا 55 قازان بار, ونىڭ 51-ءى – سۋمەن, تورتەۋى – بۋمەن جىلىتىلادى. 20 قازاندىقتىڭ 9-ى جىل بويى, 11-ءى ماۋسىمدا عانا جۇمىس ىستەيدى. ءدال قازىر 2018-2019 جىلىتۋ ماۋسىمىنا 80 پايىز دايىنبىز. ياعني 20 قازاندىقتىڭ 16-سى ساقاداي ساي تۇر. «نۇرلى جول» باعدارلاماسى بويىنشا جالپى ۇزىندىعى 4804 مەترلىك ءتورت جىلۋ ماگيسترالى جوندەلدى, – دەيدى م.بايمەنوۆ.
قىسقا دايىندىق شارالارىن دەر كەزىندە جۇرگىزۋ حالىققا كورسەتىلەتىن قىزمەت ساپاسىن كوتەرىپ, ەكى جاققا دا ءتيىمدى ەتە تۇسەدى. ويتكەنى اشىق-جارىقتا جاسالعان ساپالى جوندەۋ جۇمىستارى جىلۋ جەلىلەرىندە سۋدى ءراسۋا قىلماي, جىلۋ شىعىنىن ازايتادى, قوسىمشا قوندىرعىلاردىڭ تيىمدىلىگى ارتادى. ءسويتىپ, حالىقتى جىلۋمەن قامتۋ ساپاسىن كوتەرەدى.
«نۇرلى جول» باعدارلاماسى اياسىندا ورال قالاسىندا جالپى قۇنى 1 ملرد تەڭگە ءبولىنىپ, 10 كم سۋ قۇبىرلارى جاڭعىرتىلا باستادى. ءدال ءۇازىر 1,5 شاقىرىمدىق جەلى جوندەلىپ ۇلگەردى.
جوعارىدا ايتىلعاندارعا سايكەس, وڭىردە ەلەكتر جەلىلەرىن جوندەۋ ءىسى دە قىزۋ جۇرۋدە. «باتىس قازاقستان رەك» اق الداعى قىسقى ماۋسىمعا دايىندىق ءۇشىن 242,5 ملن تەڭگە كولەمىندە قارجى ءبولىپ, 3 مىڭ شاقىرىمدىق ەلەكتر جۇيەسىن تەكسەرىپ شىقتى. ءدال قازىر 19 ەلەكترلىك جانە 310 ترانسفورماتورلىق ستانسالاردا جوندەۋ جۇمىسى جۇرگىزىلۋدە. 80%-دان ارتىق جۇمىس ورىندالدى.
«قازترانسگازايماق» اق-نىڭ باتىس قازاقستان وبلىستىق فيليالى دا 7 مىڭ شاقىرىمنان استام گاز تاراتۋ جەلىلەرىن سىناقتان وتكىزدى. قاھارلى قىستا اق جايىق تۇرعىنداردىڭ سۋىقتى سەزىنبەي, ۇياداي جىلى جەردە وتكىزۋ ماسەلەسىن وبلىس باسشىلىعى قاتاڭ قاداعالاپ وتىر.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
